Galatiya 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Batnaa buwanan ta doꞌ kam dalil. Bong luu disu anak sawraga lay na matoy mmaꞌ na, minsan mimon altaꞌ mmaꞌ na pamusaka niiya, halloman na dikiꞌ lagi, saꞌ gi du iya ngantan. Sibuꞌ du kapatut na ka ata ma yaꞌ luu dapat na ngantanan oy maka oy na.

² Lagiꞌ na, subay luu na pin nganjagahan iya sampay magpandoyan iya halloman yaꞌ gi bay taabut waktu bay ginantaꞌ meꞌ mmaꞌ na man na koleꞌ pusaka na.

³ Damikiyan, meꞌ naa du sina bay karuha tabi halloman yaꞌ gi bay takka Almasi. Sibuꞌ du karuha tabi ka anak-anak ma subay na pin njagahan. Batan maruhuꞌ, ilooy du katoonan tabi meꞌ mogbogan jinisan aturan ka tōꞌ siga kabboꞌ-bboan tabi.

⁴ Sugaꞌ pag taabut na gantaan Tuhan, lay na papitu na Anak na pa junyaꞌ, boꞌ na dari manusiyaꞌ pinamaddihan leꞌ danda meꞌ karuha kitabi du. Maka iya ilay bay du lumingkaꞌ njawman sakup saraꞌ Nabi Musa.

⁵ Ngkon na ilay bay pinapitu supaya tapaddusan na kitabi man jawom sakup saraꞌ maka supaya kitabi taaku na meꞌ Tuhan anak na ma koleꞌ mimon supaat na.

⁶ Dari pagka anak Tuhan na kitabi, lay na kitabi pinaasokan leꞌ Tuhan Rū Anak na pa jawom atay tabi. Maka ilooy na poonan tabi dari na ngawnan Tuhan Mmaꞌ tabi.

⁷ Maka saꞌ na kitabi meꞌ sapantun ata ma yaꞌ luu kapatut na, batan anak Tuhan na kitabi. Boꞌ na, tiyap-tiyap ina jama lay na dari anak Tuhan, mastiꞌ takoleꞌ na jaꞌ mimon ma bay hinalliꞌ meꞌ Tuhan ni siga anak na.

Sukuꞌ si Isa ni Galatiya kinasusahan meꞌ si Pol

⁸ Kaam ina nnaa ma saꞌ turunan bangsa Yahudi, saꞌ ba, bay jaman yaꞌ gi katoonan bi Tuhan, bay jaꞌ kam ngisbat siga tuhan-tuhan? Waktu looy ilay, subay ga kam ata siga tuhan-tuhan bi hangat bi numba sila.

⁹ Lipara batnaa katoonan bi na Tuhan sabanna. Boꞌ na, kaayaran labi man naa, batnaa iya na mismu ngahasi kaam. Sugaꞌ pag batnaa, ituu baw tu man ku jayip, meꞌ ga doman na baw kam pabeleng pa bay kahalan bi maruhuꞌ mogbogan jinisan aturan. Mingkan, yaꞌ san silay katabang ningkaam man bi kinahopan meꞌ Tuhan. Ongoy baw taggahaꞌ pabalik na baw kam buwat dī bi ata siga aturan?

¹⁰ Habal takka niyaku, bbuwatan bi konoꞌ magtuyuꞌ mogbogan siga aturan bangsa Yahudi. Tatammu bi na baw ga ngakig siga Yahudi maehe siga llaw ka buwan, sampay siga musim ka ga taun saula-ula inaa na katabang man nalamat kaam.

¹¹ Ituu kahanggawan ku, taggahaꞌ lai jaꞌ lopas mimon bay sangsāꞌ ku noan kaam.

¹² Sangkon siga danganakan, junjung ku na ningkaam, akigun bi jaꞌ ku mari kam meꞌ aku na du paddus na man sakup saraꞌ bangsa Yahudi. Bong siꞌ taintom bi jaman ku nnaa mman bi, lay jaꞌ ku buwat dī ku meꞌ karuha kaam ma yaꞌ ngantanan saraꞌ Yahudi. Siga danganakan, yaꞌ situ takupan ku ayad meꞌ bi bay buwat aku jaman ku nnaa.

¹³ Sibuwa ku bay pilu masaplag umanat mahap ningkaam, adak yaꞌ san bay taboo ku baran ku ni kalamma ku.

¹⁴ Sugaꞌ san ku bay kasasat ningkaam, yaꞌ du ku bay padiyoꞌ bi, gam pin lay gi ku hasi bi. Meꞌ bi buwat aku, subay ga ku malaikat man Tuhan atawa pun tud dī si Isa Almasi mismu.

¹⁵ Tud bay gāk kam niyaku. Sugaꞌ pag batnaa sarī na la meꞌ bi ka aku. Maruhuꞌ jaman ku nnaa mman bi, bong siꞌ luu bay paku ku ningkaam, sarunduun du kam muwan. Kumpas ku, san gi mata bi, bong bay paku ku, atas bi nguwiriꞌ boꞌ ndean aku.

¹⁶ Pag batnaa, meꞌ bantuk binanta na ku la meꞌ bi sukat ku maan kaam kabanahan.

¹⁷ Bong siꞌ ina bay tasayu bi, kuwan siga jama nnaa ma ngalogos kaam mogbogan saraꞌ Yahudi, san bantuk doman sila ngayaran kaam, bong niyat atay da, basta sarī sina. Kainagon da ina yaꞌ na kam palamud ningkami mari kam tiggo nanggehan sila.

¹⁸ Kamasaꞌ, mahap du baw silay bong kam tiggo nanggehan jama, luu-yaꞌ ku luu nnaa, basta sikatuwaꞌ jaꞌ tōꞌ da ka umanat mahap ma bay lakka man Almasi.

¹⁹ Siga anak, halloman ku ilay bay ngagad kaam pitsayaꞌ ni Almasi, tud bay gampang ku ningkaam. Sibuꞌ du parasahan ku ka danda magkamaddi-maddi ngagad anak na pōꞌ. Pag batnaa, meꞌ ga pabalik na baw gampang ku ningkaam, batan kahalloman ku la ngagad kawul-piil Almasi tumatandaꞌ ni jataꞌ bi.

²⁰ Kainagon ku luu na ku nnaa supaya kitabi kapagbitsala balharapan. Kawu-kawu yaꞌ na kam subay na pin sinahawi meꞌ ku. Ni batnaa, yaꞌ na ku pandoy bong pooy meꞌ ku mamikihan kaam.

²¹ Tilaw ta teꞌ kam. Kaam ma doman njawman sakup saraꞌ agama Yahudi, tasayu bi kina bong oy halling njawom kitab?

²² Njawom kitab ilay, luu bay sinuwatan pasal Nabi Ibrahim bay anakan duwa lalla. Disu yana anak na ka ata na. Kuwan ilooy disu, yana anak na ka nda na poon ma saꞌ ata.

²³ Kuwan anak Nabi Ibrahim ka ata na, bay pinamaddihan meꞌ kabiyasahan mimon danda du. Boꞌ anak na ka nda na ma saꞌ ata, tud kahaylan-haylan meꞌ na bay pinamaddihan. Iya bay pinamaddihan man Tuhan bay numan janjiꞌ na ni Nabi Ibrahim.

^24-25 Na ga danda looy ilay siꞌ sikaduwa tabilang sipat ni duwa pagsulutan antaraꞌ Tuhan ka manusiyaꞌ. Pagsulutan sibuwa ilay yana saraꞌ ma bay dean Tuhan ni Nabi Musa taꞌ Punu Saynay ndooy ni Arabiya. Danda looy ma ata, yana si Hajal, yana sipat ni pagsulutan looy. Batan yana meꞌ si Hajal ka anak na siga ata, damikiyan, mimon jama ma njawman saraꞌ Nabi Musa meꞌ karuha ata du. Maka si Hajal ilay tabilang du sipat ni daira bangsa Yahudi, yana Jerusalem. Batan yana meꞌ si Hajal nneꞌ ata, Jerusalem pun tabilang du nneꞌ bangsa ata, batan siga jama ni daira looy pinahata meꞌ saraꞌ.

²⁶ Boꞌ nda Nabi Ibrahim, ilooy ma saꞌ ata, yana Sitti Sara, yana sipat ni daira sarī yana Jerusalem ni sulgaꞌ. Batan yana meꞌ Sitti Sara ka anak na saꞌ ata, damikiyan, siga raayat ni daira looy pun saꞌ du ata. Dari pagka mimon kitabi ma pitsayaꞌ ni Almasi bay dari siga raayat ni daira looy, dari ko ngawon, inaa na daira ma tabilang nneꞌ tabi.

²⁷ Boꞌ luu gi bay sinuwatan njawom kitab disu tunaꞌ, ilooy ma yuk na, “Pagakun atay nu, Nang, minsan ko danda yaꞌ bay pingkaꞌ hanak. Ngalang ko pahaddo san ko yaꞌ bay pingkaꞌ maddi. Batan san ina ko bay pinabiya, meka gi sina mintu siga anak nu man danda looy ma llahan.”

²⁸ Na siga danganakan, kitabi itu lay dari anak Tuhan man sabapan janjiꞌ Tuhan bay kinapitsayaan meꞌ tabi. Sibuꞌ du karuha tabi ka si Isahak ma bay pinamaddihan man sabapan janjiꞌ Tuhan bay kinapitsayaan meꞌ Nabi Ibrahim.

²⁹ Jaman looy ilay, si Ismail, yana anak looy ma biyasa jaꞌ meꞌ na bay pinamaddihan, wā ngalaugan ariꞌ na si Isahak ma bay pinamaddihan man kawasa Rū Sutsiꞌ. Meꞌ naa du sina batnaa karuha tabi batan nilaugan du kitabi meꞌ siga jama ma ngalogos nohoꞌ mogbogan saraꞌ agama.

³⁰ Sugaꞌ pindogahan bi doꞌ bay halling jawom kitab, ilooy ma yuk na, “Palahiyun danda looy ma ata ka anak na sabap anak ata yaꞌ luu kabigiꞌ-bigian na ni pusaka ma bay hinalliꞌ ni anak danda looy ma saꞌ ata.”

³¹ Dari siga danganakan, kitabi itu yaꞌ meꞌ karuha anak si Hajal ma ata, arapun kitabi itu initung anak Sitti Sara ma sumunsayaꞌ. Batan pag lay jaꞌ tabi dari anak Tuhan, lay na kitabi pinaddusan man siga aturan ka taat ma bay mahata kitabi.