Galatiya 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Lawak pagbiddaan mogbogan saraꞌ agama ka meꞌ pitsayaꞌ ni Almasi

¹ Kuwan kaam baw nnaa ni Galatiya, subay ga kam jama yaꞌ luu panayu bi. Meꞌ bay na kam hinikmatan. Batan tatammu bi na baw ga mmeꞌ-mmeꞌ ni jama nnaa ma māꞌ subay bogbogan bi saraꞌ agama Yahudi boꞌ bi dari initung intong. Boꞌ ko, isu-isu kapatoy Almasi taꞌ tehang poonan manusiyaꞌ initung intong. Tud tallak na bilay la meꞌ ku bay mahatiyan kaam.

² Tilaw ta teꞌ kam. Pooy meꞌ bi bay koleꞌ Rū Sutsiꞌ? Man sabapan meꞌ bi kilay bay mogbogan saraꞌ? Mastiꞌ ssaꞌ silay! Arapun ngkon bi ilay bay pinaasokan Rū Sutsiꞌ sabap meꞌ bi bay pitsayaꞌ ni umanat mahap ma bay takale bi man kami.

³ Kaam ina ma doman tabeꞌ njawman saraꞌ siga Yahudi, meꞌ ga yaꞌ luu panayu bi. Sibuwa bi mmeꞌ ni Almasi, lay na kam mangasa ni tabang Rū Sutsiꞌ man bi intong pa Tuhan. Pag batnaa, ongoy taggahaꞌ kanna bi subay na pin luu gi jinisan taat pabuwat bi man bi majatu kaintongan bi?

⁴ Marean ta bistahan bi mimon kabinsanaan ma bay tatasan bi sabapan pangando bi ni Almasi yaꞌ na luu pūs na. Saꞌ silay meꞌ looy.

⁵ Saꞌ ba, lay na dean Tuhan Rū na ningkaam, boꞌ lay gi ya makitahan kaam jinisan pabuwatan kahaylan-haylan? Sugaꞌ saꞌ silay sabap meꞌ bi bay buwat jinisan taat saraꞌ agama. Arapun iya ilay bay buwat meꞌ looy sabap meꞌ bi bay pitsayaꞌ ni umanat ma bay takale bi pasal si Isa.

⁶ Pamintangan bi na suwat njawom kitab, ilooy ma yuk na, “Lay pitsayaꞌ si Ibrahim ni palman Tuhan sampay ilooy na man na bay initung meꞌ Tuhan intong.”

⁷ Sangkon pahamun bi banahan, sagannap ma pitsayaꞌ ni janjiꞌ Tuhan meꞌ karuha Nabi Ibrahim, sila na sina initung meꞌ Tuhan siga anak Nabi Ibrahim.

⁸ Sarī gi, man maruhuꞌ-ruhuꞌ lagi, ndang luu na garaꞌ Tuhan ngitung manusiyaꞌ intong lakka man mimon kabangsa-bangsahan basta sila pitsayaꞌ ni Almasi. Umanat mahap looy ilay siꞌ bay pinalahil meꞌ Tuhan ni Nabi Ibrahim. Batan njawom kitab, yuk Tuhan niiya, “Bbos-bbos kau ina poonan man mimon kabangsa-bangsahan taꞌ babaw junyaꞌ koleꞌ supaat.”

⁹ Na palman looy ilay, lay na du bay binakbul, batan meka na jama man kabangsa-bangsahan lay na sinupaatan sabap meꞌ da pitsayaꞌ ni panubuꞌ Nabi Ibrahim, yana si Isa Almasi. Lay na sila initung intong meꞌ karuha Nabi Ibrahim du bay initung intong sabap meꞌ na bay pitsayaꞌ ni palman Tuhan.

¹⁰ Boꞌ sagannap ma mangasa ni hulas-sangsāꞌ da mogbogan saraꞌ man da initung intong, yaꞌ sina sila koleꞌ supaat. Ilooy du takoleꞌ da mulkaꞌ batan yaꞌ tabogbog da labbasakayi. Boꞌ magbēꞌ du bana ka suwat njawom kitab, ilooy ma yuk na, “Njawom mulkaꞌ soysoy yaꞌ mogbogan mimon saraꞌ njawom kitab.”

¹¹ Sangkon tarang-tarang na yaꞌ luu jama initung meꞌ Tuhan intong sabap meꞌ da mogbogan saraꞌ agama. Boꞌ sikatuwaꞌ du ka suwat njawom kitab, ilooy ma yuk na, “Sagannap ma initung meꞌ Tuhan intong sabapan pangando da niiya, mastiꞌ koleꞌ kasampulnaan nyawa saumu-umu.”

¹² Boꞌ sila ina ma mista intong sila pa Tuhan sabap meꞌ da mogbogan saraꞌ, ilooy jaꞌ pakutuꞌ da meꞌ da magtaat, saꞌ ga pangando pa Tuhan. Batan yaꞌ kuhi lakka man jawom pamiki da bitsala Nabi Musa, ilooy ma yuk na, “Soysoy mogbogan siga saraꞌ tuu labbasakayi koleꞌ kasampulnaan nyawa ma yaꞌ luu katapusan na.”

¹³ Boꞌ kitabi itu, ndang katoonan tabi na mimon manusiyaꞌ ngalangga saraꞌ Tuhan. Sangkon pataꞌ kitabi minulkaan bbos-bbos. Lipara, luu na Almasi bay nongan umu na llansang taꞌ tehang supaya tapaddusan na na kitabi man mulkaꞌ Tuhan. Iya ilay gantiꞌ tabi minulkaan. Boꞌ magbēꞌ du silay ka suwat njawom kitab, ilooy ma yuk na, “Soysoy pinapatoy siniitan taꞌ tehang, tumatandaꞌ lay minulkaan meꞌ Tuhan.”

¹⁴ Na si Isa Almasi ilay bay maglillaꞌ pinapatoy supaya takoleꞌ meꞌ mimon kabangsa-bangsahan supaat ma bay njanjiꞌ ni Nabi Ibrahim, maka supaya kitabi ma pitsayaꞌ, pinaasokan na Rū Sutsiꞌ ma bay njanjiꞌ meꞌ Tuhan.

Saraꞌ agama yaꞌ luu kabigiꞌ-bigian na ni janjiꞌ Tuhan

¹⁵ Siga danganakan, buwanan ta doꞌ kam pamintangan. Bong sawpama luu duwa jama buwat pagsulutan, boꞌ luu gi kasuwatan bay sinaynan meꞌ da, mastiꞌ yaꞌ dari sinampunan atawa kinulangan bitsala da. Bong ina lai, mastiꞌ yaꞌ na sina sā pagsulutan da.

^16-17 Meꞌ naa du sina karuha bay pagsulutan Tuhan ka Nabi Ibrahim. Yaꞌ du dari sinampunan atawa kinulangan. Hati na, janjiꞌ Tuhan ni pagsulutan da ka Nabi Ibrahim yaꞌ du tasampunan ka saraꞌ Nabi Musa ma bay pasunuꞌ paddus mpat hatus tallumpūꞌ taun. Na bong ina lay na baw sinampunan ka saraꞌ, malaingkan yaꞌ na sā pagsulutan Tuhan ka Nabi Ibrahim. Na njawom janjiꞌ Tuhan ni Nabi Ibrahim, yuk na, “Bbos-bbos mimon kabangsa-bangsahan sinupaatan man sabapan panubuꞌ nu.” Na jaman Tuhan ilay bay halling, “man sabapan panubuꞌ nu,” saꞌ silay ga panubuꞌ Nabi Ibrahim ma meka bay awnan Tuhan, arapun tuwaꞌ pa disu du panubuꞌ na, yana Almasi.

¹⁸ Dari ni kapasal janjiꞌ Tuhan ilay siꞌ nupaatan mimon kabangsa-bangsahan, saꞌ ga meꞌ mogbogan saraꞌ man jama koleꞌ supaat looy. Batan bong subay na pin jama mogbogan saraꞌ, malaingkan yaꞌ na luu pūs bay janjiꞌ Tuhan ni Nabi Ibrahim. Arapun kon ilay tabi bay koleꞌ supaat meꞌ ilooy ma bay takoleꞌ Nabi Ibrahim sabap meꞌ tabi bay ngikut iya pitsayaꞌ ni janjiꞌ Tuhan.

Maksud saraꞌ agama

¹⁹ Na adakala yuk kasohean na baw mintu, “Bong meꞌ naa, ongoy baw lay lagi Tuhan malahil saraꞌ na?” Bong yaꞌ katoonan bi, ngkon ilay saraꞌ bay pinalahil supaya tumatandaꞌ ni manusiyaꞌ dusahan sila pa Tuhan. Sugaꞌ saraꞌ ina, luu ka ngkoran na. Batan pag luu jaꞌ bay takka panubuꞌ looy disu ma bay njanjiꞌ meꞌ Tuhan, saꞌ na saraꞌ padduman tabi. Saraꞌ Tuhan ilay, bay sinohoꞌ meꞌ na pinalahil ni siga malaikat pa mman Nabi Musa. Pag-anu, boꞌ pinasampay na baw meꞌ Nabi Musa ni kabboꞌ-bboan kami.

²⁰ Boꞌ janjiꞌ Tuhan ni Nabi Ibrahim ilay, yaꞌ na ya bay mag-utusan. Iya na mismu bay nganjanjiꞌ ni Nabi Ibrahim.

²¹ Na adakala bistahan kasohean magsaggaꞌ saraꞌ Tuhan ka janjiꞌ na. Sugaꞌ saꞌ silay meꞌ looy. Sat na jaꞌ, yaꞌ sibuꞌ maksud da. Maksud saraꞌ ina man makitahan manusiyaꞌ dusa da. Boꞌ janjiꞌ Tuhan ina yana poonan man dusa pinuwasan. Bong siꞌ ina luu saraꞌ ma kapuwas ni dusa atawa kabuwan kaallum bahau, malaingkan initung na sina kitabi intong sabap meꞌ tabi mogbogan saraꞌ.

²² Sugaꞌ tallak na silay njawom kitab mimon manusiyaꞌ takawum leꞌ dusa. Sangkon yaꞌ takaya da mogbogan saraꞌ. Dari lay na Tuhan nganjanjiꞌ muwasan dusa da basta sila pitsayaꞌ jaꞌ ni si Isa Almasi.

²³ Na maruhuꞌ ilay, yaꞌ gi bay pinalahil meꞌ Tuhan bong pooy meꞌ manusiyaꞌ koleꞌ kaallum bahau. Jaman looy, kami siga Yahudi meꞌ sapantun tinalungkuꞌ jaꞌ meꞌ saraꞌ. Sakayi kami paddus, noy lay na kami pitsayaꞌ ni si Isa Almasi.

²⁴ Dan jinis meꞌ halling, saraꞌ ilay meꞌ sapantun tukang jaga bay magbayaan kami ngkod-ngkoran yaꞌ gi bay takka Almasi. Noy takka na Almasi boꞌ kami sumunsayaꞌ sampay initung na intong sabap meꞌ kami pitsayaꞌ niiya.

²⁵ Dari pagka luu na bay takka Almasi sampay kinapitsayaan na meꞌ kami, yaꞌ na kami njawman tukang jaga looy, yana saraꞌ.

²⁶ Kaam pun ina labbasakayi, anak Tuhan na du kam sabap meꞌ bi pitsayaꞌ ni si Isa Almasi.

²⁷ Maka pag lay jaꞌ kam pinandi tandaꞌ bi mmeꞌ na ni Almasi, sibuꞌ na du kam ka lay na nibuuk dī bi ka iya. Arat Almasi ina bong nnaꞌ ta pa juba, lay na patuk bi.

²⁸ Sangkon yaꞌ na kitabi magsitingka jama bong sila Yahudi atawa ssaꞌ, bong sila ata atawa ssaꞌ, bong sila danda atawa lalla. Sibuꞌ-sibuꞌ na kitabi sabap tibuuk na du kitabi saliꞌ-saliꞌ ka si Isa Almasi.

²⁹ Maka pagka sukuꞌ Almasi na kam, malaingkan initung na sina kam anak Nabi Ibrahim. Boꞌ na, kapakaam na mimon ma bay njanjiꞌ meꞌ Tuhan.