Galatiya 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol hinasi meꞌ siga pagkahi na rasul si Isa ni Jerusalem

¹ Na ni bay kalakka ku man Jerusalem jaman looy, noy bay na pingkaꞌ sapu-mpat taun boꞌ ku bay pabeleng pabalik. Pag beleng ku pilay, haboy na kami ka si Balnabas. Maka luu gi si Taytus bay boo kami.

² Ngkon ku bay pabeleng sabap ilooy kahandak Tuhan bay pinalahil niyaku. Takka ndooy, lay ku nammuhan siga pa-mmean sukuꞌ si Isa ndooy. Dari sasang kami-kami du ndooy, lay na bakka ku ninsila isi umanat mahap ma pinasaplag meꞌ ku ni kabangsa-bangsahan ma saꞌ Yahudi. Maksud ku ilay siꞌ masā bong tud magbēꞌ du umanat ku ka ninsila. Batan bong ilay bay niyaꞌ, taggahaꞌ senseng jaꞌ bay hulas-sangsāꞌ ku masaplag. Kahapan, pag bāꞌ ku ninsila isi umanat ku,

³ tabista da du tud bay sikatuwaꞌ isi umanat kami. Tandaꞌ yaꞌ luu man kami magsulemaꞌ, minsan katoonan da na soheꞌ ku si Taytus saꞌ bangsa Yahudi, yaꞌ na san ya bay llogos meꞌ da inislam. Katoonan da du tud tabeꞌ du ya ni sukuꞌ Tuhan san yaꞌ bogbogan na saraꞌ agama Yahudi.

⁴ Sugaꞌ luu du baw kasohean pasalluk ndooy yaꞌ kasulutan ni umanat ku. Kahandak da, mimon ma pitsayaꞌ ni si Isa subay llogos nohoꞌ mogbogan saraꞌ agama Yahudi. Sugaꞌ tabistu kami na du saꞌ sila danganakan kami sabanna. Lay jaꞌ sila pasalluk ni baanan kami mayu-mayu bong kami mogbogan saraꞌ agama atawa niyaꞌ. Sugaꞌ tabista kami du bong pamiki da binean, mastiꞌ kalangkat jaꞌ ni kasumunsayaan tabi njawman si Isa Almasi.

⁵ Sangkon yaꞌ kami bay kuhi mmeꞌ ninsila samasakali taggahaꞌ kasakotan na baw umanat mahap ma kinapitsayaan meꞌ bi ka tōꞌ palsu.

⁶ Na san meꞌ looy kadarihan kasohean, bong siga pa-mmean sukuꞌ si Isa ndooy, yaꞌ san luu bay tatammu da njawom umanat kami ma subay na pin sinaup atawa pun sinampunan. Boꞌ na, minsan sila tanyag jama langkaw ntan da, yaꞌ du ku bay loman ninsila batan ndang katoonan ku Tuhan yaꞌ magsitingka manusiyaꞌ.

⁷ Dari tabista du meꞌ siga pa-mmean ndooy sibuꞌ du kami ka si Pitel bay kawakilan leꞌ Tuhan masaplag umanat mahap pasal si Isa. Sat na jaꞌ niyaku, pa kabangsa-bangsahan ma saꞌ Yahudi. Kuwan niiya, pa bangsa Yahudi.

⁸ Batan tabista da du, yana meꞌ Tuhan nampulnaꞌ pabuwatan si Pitel magrasul ni siga Yahudi, meꞌ looy du meꞌ na nampulnaꞌ pabuwatan ku ni siga bangsa ma saꞌ Yahudi.

⁹ Dari sila siꞌ tu ma ndang tanyag pa-mmean sukuꞌ si Isa, yana ga si Yaꞌkub, si Pitel, ka si Yahiya, tabista da na lay du ku pineneꞌ leꞌ Tuhan binuwat rasul si Isa. Sangkon gāk na sila ngaku kami ka si Balnabas limbang da. Batan magtaayun na pamiki kami ni hāl meꞌ kami masaplag. Dari pagsulutan kami, kuwan kami ka si Balnabas pa kabangsa-bangsahan ma saꞌ Yahudi. Kuwan sila, pa bangsa Yahudi.

¹⁰ Ilooy du bay amay-amayan da ningkami, subay kami yaꞌ mabiya siga jama miskin. Boꞌ ndang tigiꞌ du ku nulung ninsila.

Si Pitel sinahawi

¹¹ Na hallom maka hallom na, kuwan si Pitel, lay pa Antiyok ngandaꞌ-ngandaꞌ kami. Sugaꞌ sasang na ndooy, tud bay magsāꞌ ya. Dari lay ya sahawi ku balharapan.

¹² Sibuwa na takka, tuwaꞌ arat na batan yaꞌ ya magsibiddaꞌ jama. Mmeꞌ ya siharung-harung mangan ka soysoy jaꞌ sampay siga jama ma saꞌ Yahudi. Sugaꞌ song hallom, luu na baw takka pagkahi na siga Yahudi man panohoan si Yaꞌkub lakka man Jerusalem. Dari bbuwatan si Pitel, lay tagongan na meꞌ na paharung mangan ni siga danganakan na ma saꞌ Yahudi. Kon na tagongan na batan tawu ya sinahawi meꞌ siga pagkahi na Yahudi sabap meꞌ na paharung mangan ni jama ma yaꞌ bay pingkaꞌ inislam.

¹³ Dari pag takita siga Yahudi kasohean ndooy ni Antiyok kadarihan si Pitel, bbuwatan da ngakig na du yaꞌ paharung mangan ni siga danganakan da ma saꞌ Yahudi. Sampay si Balnabas, lay na du ga taboo-boo meꞌ da san katoonan na na yaꞌ tuwaꞌ pabuwatan meꞌ looy.

¹⁴ Dari pag ndaꞌ ku bbuwatan da yaꞌ sikatuwaꞌ ka kabanahan ni umanat mahap, ilooy ma yuk ku ni si Pitel ni pag-awpan sikamimon, “Kau tu, hallang-hallangan tuu, yaꞌ na ko bay mogbogan saraꞌ agama bangsa ta Yahudi. Pag batnaa, sarī na la tikmas nu. Sat nu saꞌ māꞌ, subay na pin siga jama ma saꞌ Yahudi mean saraꞌ agama ta boꞌ da tahasi nu danganakan.”

¹⁵ Maka yuk ku gi niiya, “Nges, meꞌ kita itu turunan bangsa Yahudi, kanna ta maruhuꞌ intong gi kita man kabangsa-bangsahan saꞌ Yahudi sukat bangsa ta ngantanan saraꞌ Tuhan. Boꞌ na, nabiat lagi bangsa ta ngawnan sagannap ma saꞌ Yahudi, siga baldusa.

¹⁶ Sugaꞌ batnaa, labbahan ta na pamiki meꞌ looy. Batan katoonan ta na, ilooy ya man manusiyaꞌ initung meꞌ Tuhan intong yana sabap meꞌ da pitsayaꞌ ni si Isa Almasi, saꞌ ga sabap meꞌ da mogbogan saraꞌ. Inaa sina kon kita bay pitsayaꞌ niiya. Tabista ta na yaꞌ luu san disu jama koleꞌ kaintongan pa Tuhan meꞌ na bay mogbogan saraꞌ.

¹⁷ “Sugaꞌ kuwan siga pagkahi ta Yahudi, awnan da na baw kita baldusa pagka kita pitsayaꞌ na isu-isu Almasi poonan kaintongan ta. Maka sukat yaꞌ na kita mogbogan saraꞌ da, bistahan da Almasi na baw moo-moo kita buwat dusa. Sugaꞌ katoonan ta du tunmanūn meꞌ Almasi buwat meꞌ looy.

¹⁸ Arapun ilooy ya man ta tud bana-bana baldusa bong kita nanggehan tōꞌ ma lay na timanan ta, ilooy ma yuk na subay kita mogbogan saraꞌ bong kita doman intong pa Tuhan.

¹⁹ “Boꞌ aku baw tu, tabista ku na, san pooy basag ku bay mogbogan saraꞌ, basta yaꞌ du tabogbog ku labbasakayi. Dari lay na tikutan ku saraꞌ mari tatūs ku lān ma bay ginantaꞌ meꞌ Tuhan man jama nulut ni kahandak na. Meꞌ ku ngingat, pagkajama ku maruhuꞌ lay na tabeꞌ matoy ni Almasi llansang taꞌ tehang.

²⁰ Pag batnaa, Almasi na llum ni baran ku, saꞌ na aku. Sangkon kahandak na jaꞌ bean ku, saꞌ na kahandak ku. Maka batnaa, halloman ku llum, mangando jaꞌ ku ni Anak Tuhan. Batan maaseꞌ ya niyaku sampay lay na ga paglillaꞌ na dī na pinapatoy kalnaꞌ aku.

²¹ Sangkon bong itu ku mangasa na baw ni hulas-sangsāꞌ ku mogbogan saraꞌ man ku initung intong, sibuꞌ na du ka bay tuwak ku aseꞌ Tuhan niyaku. Batan sat ku saꞌ māꞌ yaꞌ luu kapuspusan kapatoy si Isa.”