2 Yahiya 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

2 YAHIYA

¹ Ituu itu aku, yana si Yahiya, disu pa-mmean ni sukuꞌ si Isa. Itu suwat ku pa mman danda looy ma bay pineneꞌ meꞌ Tuhan sampay pa mman siga anak na. Maaseꞌ ku banahan ningkaam. Sarī man aku, sampay mimon ntuu ma toon kabanahan, maaseꞌ du ningkaam.

² Kaasean kami kam sabap saliꞌ-saliꞌ kitabi pitsayaꞌ ni kabanahan, boꞌ kabanahan naa ina, yaꞌ na kuhi lakka man jawom atay tabi saumu-umu.

³ Kamura-murahan tattap na pin timbang ka barakat saltaꞌ na kasannangan ningkitabi man Mmaꞌ tabi Tuhan ka Anak na si Isa Almasi. Kinabbul jaꞌ situ njataꞌ kitabi ma sikaaseꞌ-kaaseꞌ maka mmeꞌ ni kabanahan.

⁴ Tud bay gāk ku sitammu ka kasohean anak nu batan ndaꞌ ku mmeꞌ du sila ni kabanahan ma bay sohoꞌ Mmaꞌ tabi Tuhan ningkitabi.

⁵ Na kuwan kau Nang, paku ku ningkau subay kitabi sikaaseꞌ-kaaseꞌ. Inaa ina saꞌ panohoan bahau, batan ndang bay na takale tabi man maruhuꞌ lagi, jaman tabi bohoꞌ bay mmeꞌ ni si Isa.

⁶ Bong ina kitabi maaseꞌ ni Tuhan ka siga pagkahi tabi manusiyaꞌ, mastiꞌ bean tabi jaꞌ oy-oy sohoꞌ Tuhan ningkitabi. Boꞌ man maruhuꞌ lagi, ndang bay na kitabi sohoꞌ na sikaaseꞌ-kaaseꞌ.

⁷ Batnaa tu, meka na guru palsu ni junyaꞌ magsian jama. Baꞌ-bāꞌ da, si Isa saꞌ Almasi bay pitu pa junyaꞌ magbaran manusiyaꞌ. Pangandustaꞌ sila maka tukang nguntra Almasi.

⁸ Sangkon iyakin kam mari yaꞌ senseng mimon bay hulas-sangsāꞌ kami noan kaam maka supaya takoleꞌ bi du mimon supaat ma bay hinalliꞌ meꞌ Tuhan ningkaam.

⁹ Batan soysoy yaꞌ tattap mmeꞌ ni tōꞌ Almasi, boꞌ magsiꞌ lagi, mastiꞌ yaꞌ ya tibuuk ka Tuhan. Sugaꞌ soysoy tattap mmeꞌ ni tōꞌ Almasi, malaingkan tibuuk ya ka Tuhan sampay Anak na.

¹⁰ Na bong luu jama pilu pa mman bi nōꞌ sarī man tōꞌ Almasi, daa na padutaihun bi maka daa san gallakun bi.

¹¹ Batan bong ina sila bay hinasi meꞌ bi, malaingkan binilang du kam bay tabeꞌ ni kalaatan da.

¹² Meka gi situ karomanan ku pinamāꞌ ningkaam, sugaꞌ yaꞌ na doꞌ patabeꞌ ku ni suwat tuu. Bong yaꞌ luu baya-baya, pilu sa ku ngandaꞌ-ngandaꞌ kaam, boꞌ tabi kapagbitsala balharapan mari pannoꞌ na atay tabi leꞌ kagakan saliꞌ-saliꞌ.

¹³ Dambuli man inaa, siga anak danganakan nu ma bay du pineneꞌ meꞌ Tuhan nohoꞌ masampay salam duwaa da ningkau. Wassalam