2 Timuti 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Timuti sinohoꞌ masaplag

¹ Na pag bbeleng Papuꞌ Isa ina mintu pa junyaꞌ magsultan, ngahukum na ya manusiyaꞌ sikamimon, llum-matoy. Sangkon, itu na ni pag-awpan Tuhan ka si Isa Almasi, sohoꞌ ta na ko

² masaplag umanat Tuhan. Pagbuli-bulihan nu na noan jama kabanahan, doman-yaꞌ sila doman mmeꞌ. Paintoman nu na pin sagannap ma magsāꞌ atawa amu-amu buwat dusa. Bitsalahan nu sila nohoꞌ nawbat. Patagguhun na pin iman da. Maka bila ko noan sila, subay tahaꞌ jaꞌ pasensiya nu.

³ Kon nu ina sohoꞌ ku na masaplag batnaa batan luu sina mintu masa kaekahan manusiyaꞌ yaꞌ na doman pakale ni tōꞌ sabanna. Ilooy du ina mintu katagihan da pinakale, yana tōꞌ ma magbēꞌ ka kainagon da buwat oy-oy kinanapsuhan meꞌ da. Dari bbuwatan da ina mintu miha siga guru ma mōꞌ bitsala ma lassa ni tinga da.

⁴ Sugaꞌ bong hāl kabanahan, tuwak da na. Ilooy ya pinakale meꞌ da, yana pali-pali ma bay jaꞌ tinulun-tulun meꞌ manusiyaꞌ.

⁵ Na kuwan kau Timuti, subay ko wā ngagak dī nu ni mimon kahalan nu. Bong ko tumabbaꞌ njawom kamalasahiyan kalnaꞌ Papuꞌ, tatasan nu jaꞌ. Pagbuli-bulihan nu masaplag umanat mahap pasal si Isa. Pajatuhun na mimon ma bay hinalap meꞌ Tuhan ningkau.

⁶ Kuwan aku tu, yaꞌ na meꞌ noy tahaꞌ umu ku. Tapit na situ waktu man ku limbu man junyaꞌ tuu.

⁷ Sugaꞌ san situ ku matoy na, ndang-ndang lay na du ku bay magtuyuꞌ matangge kabanahan san du pooy meꞌ bay naggaꞌ aku. Ibaratan sundalu ni bonoꞌ mehe, lay na du pupusan ku basag ku ngatu. Ibaratan jama maglumbaꞌ sonse, lay na pulan ku basag ku sampay lay na taabut ku tōng lumbaan. Tud lay na silay bogbogan ku kabanahan ma kinapitsayaan meꞌ tabi.

⁸ Dari pag batnaa, ndang luu na silay haddiya ginalla karuna kaintongan hinalliꞌ niyaku. Boꞌ ndean du silay mintu aku meꞌ huwis looy ma patingkat intong, yana Papuꞌ Isa pag taabut llaw hukuman. Sugaꞌ saꞌ du baw sina mintu sat aku kabuwanan haddiya meꞌ looy, arapun sampay mimon ma bay magkainagon ni katakka Papuꞌ, mastiꞌ kabuwanan du.

⁹ Timuti, pagbuli-bulihan nu na magdeꞌ-dēꞌ pitu.

¹⁰ Gunahan niyaku tabang, batan si Demas lay na pilay pa Tesaloneka. Lay na ku mbanan na sabap hagaan niiya nganduwan napsu na ni hāl junyaꞌ. Kuwan si Keresen, lay pa Galatiya. Kuwan si Taytus, lay pa Dalmatiya.

¹¹ Ituu sa soheꞌ ku tamban ntuu yana si Lukas. Bong anu, kaddoun doꞌ si Malkus, boꞌ boonun pitu, batan katabang mehe sina ya ni pabuwatan ku.

¹² Kuwan si Tikikus, lay sohoꞌ ku pilu pa Epesus.

¹³ Doꞌ ko beꞌ, bong ko pitu, boonun doꞌ badjuꞌ kapa ku. Lay mbanan ku man si Kalpus ndooy ni Troas. Siga būk ku pun, boonun du. Maka amay-amay daa takupan nu siga logoran suwat ku.

^14-15 Sarī man naa, iyakin ko ni si Aleksandel, lalla looy ma tukang maba tumbagaꞌ, batan tud bay basag sina ya bay nulang umanat kami. Maka meka sina kalaatan bay pabuwat na niyaku. Sugaꞌ biyahun na, hinisab du sina ya meꞌ Papuꞌ sikapataꞌ ka bay pabuwatan na.

¹⁶ Ni kapasal palkalaꞌ ku ntuu, sibuwa ku bay sinumariya meꞌ huwis, yaꞌ luu san disu danganakan ta bay pasabu nanggehan aku. Lay jaꞌ ku pabiya da dangan-dangan ku. Sugaꞌ kamura-murahan inampun du sila meꞌ Tuhan.

¹⁷ Para na pin, jaman ku bay sinumariya, lai du ku bana inunungan meꞌ Papuꞌ Isa. Boꞌ bay gi ya nganggaosan aku masaplag umanat na labbasakayi ni mimon jama saꞌ Yahudi ndooy. Sat na jaꞌ, sasang ku ilay siꞌ bay sinumariya, parasahan ku subay ga ku hayop liput na meꞌ baanan halimaw. Kahapan, lay du ku sinalamat meꞌ Papuꞌ man bahaya looy.

¹⁸ Maka katoonan ku du mastiꞌ sinalamat du sina mintu ku meꞌ Papuꞌ man mimon kalaatan ma song tumiluꞌ njataꞌ ku. Maka boo na du sina ku pa jawom pamarinta na ndooy ni sulgaꞌ. Pudji mehe niiya pangkat-mamangkat saumu-umu! Amin.

¹⁹ Dambuli man inaa, pasampayun doꞌ salam duwaa ku pa mman ga si Prisila ka si Akila sampay pa mman jama lumaꞌ ga si Onesiporus.

²⁰ Doꞌ ko beꞌ la, mari tahati nu, si Erastus lay tamban ni Korin. Kuwan si Tropimus lay saki. Dari lay doꞌ ya mbanan ku ndooy ni Miletus nohoꞌ inintu.

²¹ Na meꞌ halling sambat ku na siꞌ, pagbuli-bulihan nu na magdeꞌ-dēꞌ pitu padpad yaꞌ gi taabut timpu tanne. Luu gi beꞌ ga si Yubulas, si Pudens, si Linus ka si Kladiya sampay mimon danganakan ta ntuu bay du nohoꞌ masampay salam duwaa da pa mman nu.

²² Katapusan bitsala ku, kamura-murahan inunungan na pin ko meꞌ Papuꞌ sampay binuwanan barakat. Wassalam