2 Timuti 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Arat-tabiat jama ni ahil jaman

¹ Na Timuti, indanan nu bitsala ku. Ni ahil jaman, yaꞌ na sina mintu taambat katiksaan njawom junyaꞌ.

² Batan kaekahan na sina mintu manusiyaꞌ, dī da du kaasean da. Maka magnapsu mulakab na sila ni sīn. Pangabbu gi sila ni kalangkaw atay da. Boꞌ meka gi sina yaꞌ paagak mitsala jama pa kalaatan. Yaꞌ sila ngasip ni induꞌ-mmaꞌ da, yaꞌ ngintom buddi maka yaꞌ tawu pa Tuhan.

³ Bbos-bbos meka na sina yaꞌ manimbang ni jama atawa pun yaꞌ kuhi miha kasalassayan, maka yaꞌ kuhi ngampun. Gam pin sipitna-pitna gi sila. Meka na sina mintu yaꞌ pandoy ngagak dī da. Maka meka na dahulakaꞌ sampay yaꞌ na luu dawom da ni kaintongan.

⁴ Meka na sina mintu panipu ka os-os buwat karupangan ni kapondok pamiki da sampay takabbu lagi. Ilooy du ina mintu hagaan ninsila meꞌ da nganduwan jaꞌ oy-oy kinanapsuhan meꞌ da. Sugaꞌ bong aseꞌ pa Tuhan, yaꞌ luu ninsila.

⁵ Bong ndaꞌ mata, meꞌ bantuk ngisbat sila Tuhan. Sugaꞌ sabana na, tuwak da Tuhan ka kawasa na ngahalin pangatayan da. Sangkon daa ko samod ka ga jama meꞌ looy.

⁶ Kasohean ina sila dutai pa taꞌ lumaꞌ jama mōꞌ tōꞌ palsu. Boꞌ luu gi takoleꞌ da pitsayaꞌ ni tōꞌ da kasohean danda ma kulang iman da, yana sagannap danda ma yaꞌ na taambat dusa da sabap takawum sila meꞌ napsu da ni jinisan.

⁷ Ga danda meꞌ naa ina, inaa katagihan da pakale ni jinisan tōꞌ bahau. Salla na, yaꞌ sila pandoy nilang mamooy tōꞌ palsu ka mamooy tuwaꞌ.

⁸ Kuwan sila ina ma tukang masampay siga tōꞌ palsu, ndang bingkok na pamiki da. Yaꞌ hilas pangando da pa Tuhan. Nulang sila kabanahan meꞌ bay jaman ga si Jannes ka si Jambres bay nulang Nabi Musa mattoꞌ.

⁹ Sugaꞌ tōꞌ jama meꞌ looy ilay, yaꞌ du sina hallom tatasan na. Batan tabista du sina mintu meꞌ sikamimon karupangan da, meꞌ bay karuha jaman ga si Jannes ka si Jambres.

¹⁰ Sugaꞌ kuwan kau Timuti, akigun jaꞌ ku. Kau ina, ndang hallom na du bay taindan nu tōꞌ ku sampay kawul-piil ku. Katoonan nu na du maksud ku. Lay na du tasakup nu pangando ku ni Papuꞌ maka pasensiya ku sampay aseꞌ ku. Maka tasayu nu na du bong pooy tatas ku njawom jinisan katiksaan kalnaꞌ Tuhan.

¹¹ Yaꞌ na du ko awam pasal kabinsanaan maka laug bay talingkaꞌ ku jaman ku ndooy ni Antiyok ka ni Ikoniyum sampay ndooy ni Listra. Kahapan song hallom, lay du ku bay pinaddusan meꞌ Papuꞌ.

¹² Sugaꞌ ni sabana na, mimon jama ma tibuuk ka si Isa Almasi, ma doman buwat kahandak Tuhan, mastiꞌ luu jaꞌ du sina masa da nilaugan.

¹³ Batan jama maat ina ka jama pangakka, magsasōng na pin sina mintu kalaatan da. Ngakkahan sila jama, sugaꞌ sila pun inakkahan du.

¹⁴ Sugaꞌ kau, Timuti, subay ko kanaalla mmeꞌ ni kabanahan ma bay tinōꞌ ningkau. Ndang-ndang sikabiyasa du ko banahan ka ga jama ma bay noan kau. Katoonan nu du tapangandohan nu sila.

¹⁵ Man kadikiꞌ nu lagi, ndang lay na ko tinoan kabanahan njawom kitab. Inaa na sina man nu bay koleꞌ pangahati pasal kasalamatan para ni soysoy pitsayaꞌ ni si Isa Almasi.

¹⁶ Sikamimon ina njawom kitab yana palman Tuhan bay pinalahil meꞌ na ni manusiyaꞌ. Mehe kapansahaliyan na man noan jama kabanahan maka man makitahan sila dusa da sampay man maintoman sila lān tuwaꞌ bong luu kasaan da, maka man noan sila arat-tabiat intong.

¹⁷ Bong ina tud kinanna du meꞌ siga sukuꞌ Tuhan isi kitab, malaingkan yaꞌ na luu kulang da man da majatu mimon pabuwatan mahap bay sinukuꞌ ninsila.