2 Timuti 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Kitabi meꞌ sapantun sundalu ndiyoan si Isa Almasi

¹ Na Timuti, anak, mangasa jaꞌ ko ni aseꞌ-tabang si Isa Almasi nganggaosan kau.

² Siga tōꞌ ma bay takale nu man ku, yana tōꞌ ma bay pasaplag ku ni pag-awpan siga baanan jama, pasampayun na ni kalallahan ma taasahan nu, ma pandoy noan jama sarī.

³ Magpalapay ko niyaku natasan jinisan katiksaan kalnaꞌ si Isa Almasi meꞌ karuha sundalu kanaalla natas njawom bonoꞌ mehe.

⁴ Indanan nu bitsala ku. Bong ina sundalu kanaalla, yaꞌ ya palamud ni jinisan hāl ma pinandang leꞌ siga sibilyan. Iya pandang na, meꞌ na nulut kahandak komandel na.

⁵ Maka ngaddoꞌ ko suntuan njataꞌ jama maglumbaꞌ sonse. Bong ina ya yaꞌ mmeꞌ ni siga aturan lumbaan, malaingkan yaꞌ luu haddiya takoleꞌ na.

⁶ Damikiyan ngaddoꞌ du ko suntuan njataꞌ tukang huma. Pagka iya bay maghulas-sangsāꞌ tanom, sapatut na iya du sina duhuꞌ mangan buwaꞌ tinanom na.

⁷ Na tōꞌ ku ilay siꞌ ningkau, pamikihan nu sa paayad. Binuwanan du sina ko meꞌ Papuꞌ pangahati supaya takoleꞌ nu hantak bitsala ku siꞌ.

⁸ Kannahun na pin kabanahan pasal si Isa Almasi. Numbul satu, pus na bay pinapatoy, lay du ya pinakallum pabalik. Maka iya na Sultan bay tinunaꞌ mattoꞌ, ma panubuꞌ Sultan Daud. Inaa ina yana umanat mahap ma ndang pinasaplag meꞌ ku.

⁹ Salla na, sabap meꞌ ku masaplag, daran na ga ku bininsanaꞌ. Sampay lay na ga taabut man ku tatalungkuꞌ njawom jīl binuwat subay ga jama tukang ngalangga saraꞌ. Sugaꞌ san itu ku pinusas ka karina, bong inawnan umanat Tuhan, basta yaꞌ baw sina takoleꞌ kinarinahan.

¹⁰ Umanat Tuhan ilay siꞌ kaboo kasalamatan ni soysoy pitsayaꞌ. Sangkon atas ku na natasan oy-oy jaꞌ kamalasahiyan kalnaꞌ sagannap ma bay pineneꞌ meꞌ Tuhan. Kainagon ku koleꞌ jaꞌ sila kasalamatan njataꞌ si Isa Almasi sampay tumabeꞌ ni kabantugan na saumu-umu.

¹¹ Na ituu tu bitsala kanaalla: Bong itu kitabi bay ngingat dī tabi lay na tabeꞌ ni kapatoy Almasi, malaingkan tabeꞌ na du kitabi ni kaallum na.

¹² Bong itu kitabi natas na pin njawom kamalasahiyan kalnaꞌ iya, mastiꞌ kapatabeꞌ du kitabi niiya magsultan ni sinōng. Sugaꞌ bong kitabi yaꞌ kuhi mangaku sukuꞌ na kitabi, malaingkan yaꞌ du kitabi aku na sukuꞌ na.

¹³ Bong itu kitabi yaꞌ kanaalla, basta iya, mastiꞌ kanaalla jaꞌ batan ndang inaa tabiat na. Boꞌ tunmanūn sina meꞌ na maluba tabiat na.

¹⁴ Na pasal ilooy ma bay sabbut ku siꞌ, pasampayun sa ni sukuꞌ si Isa nnaa man nu maintoman sila. Maka baan nu sila, ilu na Tuhan pakale-kale, subay sila yaꞌ na palamud ni pagjawapan jama pasal hatiyan siga bitsala. Yaꞌ du sina luu sōng na. Gam pin, inaa na kaboo sagannap ma bay pakale magsiꞌ man kabanahan.

¹⁵ Timuti, pagbuli-bulihan nu meꞌ nu makitahan Tuhan kau disu sosohoan ma tawop niiya. Umanat kabanahan ma pinasampay meꞌ nu, daa pabiyahun sinakotan ka tōꞌ palsu. Bong siꞌ ina takaya nu meꞌ naa, yaꞌ luu meꞌ nu hinaꞌ ni mata Tuhan.

¹⁶ Ilagan nu pagbitsalahan pasal tōꞌ ma yaꞌ luu kapuspusan na, ma yaꞌ san luu kabigiꞌ-bigian na ni hāl ma puntukan pa Tuhan. Siga tōꞌ meꞌ looy ilay malawak jama na pin man Tuhan.

¹⁷ Sibuꞌ du karuha tōꞌ meꞌ looy ka saki kansel ngalelet njawom baran jama ngabut sampay man na binasa. Boꞌ meꞌ naa na du sina tōꞌ si Haymeneyus ka si Pilitus.

¹⁸ Tud lay na silay sila magsiꞌ man kabanahan. Baꞌ-bāꞌ da, lai na bay pingkaꞌ masa jama matoy pinakallum pabalik. Dari sabapan tōꞌ da, lay na ga jadjuꞌ pangando kasohean sukuꞌ si Isa.

¹⁹ Sugaꞌ san du ina dangoy tōꞌ palsu pinaantup, bong inawnan kabanahan man Tuhan, mastiꞌ taasahan jaꞌ. Sibuꞌ du sina karuha na ka pananggehan lumaꞌ ma yaꞌ takoleꞌ inusik. Maka luu gi sina duwa kabanahan bay sinuwatan ma subay iningat meꞌ ta. Disu, “Kinatoonan du sina meꞌ Tuhan bong soy sukuꞌ na,” kaduwa na, “Soysoy mangaku sukuꞌ Tuhan, subay tagongan da na buwat dusa.”

²⁰ Na ni kapasal Tuhan ka siga sukuꞌ na, meꞌ tuu situ karuha na: Ni lumaꞌ sawraga, magjinisan manganan na. Kasohean manganan na pilak porol atawa pun mmas bay binaba halliꞌ man motang ni siga llaw mulliya. Kuwan kasohean, yana manganan biyasa, ma binasaanan sadjaꞌ.

²¹ Na mimon manganan looy siꞌ tuwaꞌ pa siga sukuꞌ Tuhan. Sagannap ma lay na ngalabbahan mimon kalaatan, sibuꞌ na sina karuha da ka ga manganan looy ma hinalliꞌ ni siga llaw mulliya. Sutsiꞌ sila maka kaboo kabantugan pa Tuhan. Tawop na sila pinakoy meꞌ na man majatu jinisan pabuwatan ayad.

²² Sangkon, san meka meꞌ pag-umuhan nu taboo-boo meꞌ napsu da buwat jinisan karupangan, bong kau, basta palawak ko man arat-tabiat meꞌ looy. Iya pakutuun, yana kaintongan, pangando ni si Isa, aseꞌ ni jama maka kasalassayan. Sagannap ma ngisbat Papuꞌ ni kasutsiꞌ atay da, ndang meꞌ naa sina angan-angan da.

²³ Maka daa ko palamud ni pagjawapan ma yaꞌ luu kapuspusan na meꞌ ilooy ma pinaabak meꞌ jama awam ni kabanahan. Tasayu nu du sina, inaa na poonan jama sasaꞌ-manasaꞌ.

²⁴ Boꞌ inawnan sosohoan Papuꞌ ina, yaꞌ dari sasaꞌ. Subay ya magpahāp ni sikamimon maka pandoy noan jama. Maka subay du tahaꞌ pasensiya na.

²⁵ Bong ya sinulang meꞌ jama, pag tampung na, subay hanunut-hanunut jaꞌ meꞌ na naup sila. Meꞌ naa ina, balangkali binukaꞌ na meꞌ Tuhan puad da nawbat sampay koleꞌ pangahati ni kabanahan.

²⁶ Ilooy puhung ta mari sila katuwaꞌ na mamiki, boꞌ da lumappa na man komkoman Ibilis ma bay magbayaan sila nohoꞌ buwat kahandak na.