2 Timuti 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

2 TIMUTI

¹ Ituu itu aku, yana si Pol, disu rasul si Isa Almasi man kahandak Tuhan. Aku itu bay sinohoꞌ meꞌ Tuhan masaplag pasal kaallum bahau ma bay njanjiꞌ meꞌ Tuhan ni soysoy ma tibuuk ka si Isa Almasi.

² Itu suwat ku pa mman nu Timuti, kakasi ku. Kau ina sibuꞌ na du ka anak ku. Kamura-murahan binuwanan na pin ko kasannangan ka timbang saltaꞌ na barakat meꞌ Mmaꞌ ta Tuhan ka Papuꞌ ta si Isa Almasi.

³ Mehe pagsukuhan ku pa Tuhan ma bay inisbat meꞌ kabboꞌ-bboan ku sampay na aku. Meꞌ aku itu ngisbat Tuhan, sannang na atay ku, batan katoonan ku yaꞌ na luu pabuwat ku ma nulang ni honaꞌ-honaꞌ ku. Magsuku ku pa Tuhan sabapan nu. Sangkon, tuktuk ku maku duwaa pa Tuhan, sangom na ka, llaw na ka, yaꞌ situ lipas meꞌ ku nabbut awon nu.

⁴ Timuti, tud basag situ kainagon ku sikita ka kau pabalik. Yaꞌ na pin situ takupan ku boheꞌ mata nu ngattap waktu ta bay sakkat. Bong siꞌ itu kita nduwan gi sitammu pabalik, landuꞌ na ehe kagakan ku.

⁵ Niyaꞌ takupan ku hilas pangando nu ni Papuꞌ Isa. Pangando nu ina, sibuꞌ du hantang na ka pangando bboꞌ nu Daꞌ Lowis ka nneꞌ nu si Yunis. Tumatandaꞌ na niyaku meꞌ bay na sinaynan pangando da ni jataꞌ nu.

⁶ Sangkon, pagka meꞌ looy na du basag pangando nu, sapatut na subay ko paintoman ku pasal kapandoyan ma bay dean Tuhan ningkau llaw looy jaman ku bay nappak bumbunan nu. Ladjikiꞌ looy ilay siꞌ ma luu na ningkau subay pakoyun, daa pasensengan nu. Bong dalil ta pa bā api, diripan nu lagi mari llum banahan.

⁷ Daa ko tawu buwat ma bay sinukuꞌ meꞌ Tuhan ningkau. Batan Tuhan ilay bay matannaꞌ Rū na njataꞌ ta supaya luu na gaos ta ka aseꞌ sampay tabang ngagak dī ta. Saꞌ ga silay supaya kita subay na pin tawu.

⁸ Sangkon daa na ko tawu maan jama pasal Papuꞌ ta. Damikiyan, daa na du ko tawu mangaku ga aku soheꞌ nu sukat ku njawom jīl. Gam pin, magpalapay na ko niyaku natasan oy-oy kamalasahiyan kalnaꞌ umanat mahap pasal Papuꞌ ta. Ndang-ndang luu du kawasa Tuhan nganggaosan kita.

⁹ Maka ndang-ndang, iya du bay nalamat kita sampay ngaliyun kita supaya kita dari sukuꞌ na ma sutsiꞌ halloman ta llum. Sugaꞌ iya ilay bay nalamat kita, saꞌ baw ga man sabapan ni lilingan na mahap arat-tabiat ta. Arapun kon na ilay bay nalamat kita sabap ndang inaa garaꞌ na yaꞌ gi san junyaꞌ bay pinapayak. Ndang luu na garaꞌ na makitahan manusiyaꞌ aseꞌ-tabang na njataꞌ pabuwatan si Isa Almasi.

¹⁰ Boꞌ lai na situ pinalahil aseꞌ-tabang na pag taabut na bay mapitu si Isa Almasi pa junyaꞌ, yana tukang nalamat kitabi. Batan lay langkat si Isa kawasa kapatoy pag taabut na pinakallum pabalik. Maka lay gi ya masampay umanat mahap supaya soysoy pitsayaꞌ niiya koleꞌ kasampulnaan nyawa ma yaꞌ luu katapusan na.

¹¹ Kuwan aku, lay na ku peneꞌ Tuhan binuwat disu rasul ka guru supaya tapasaplag ku umanat mahap.

¹² Boꞌ ituu na situ kon ku tiksaꞌ ntuu njawom jīl. Kamasaꞌ, yaꞌ du tu ku iyaꞌ batan katoonan ku ilooy ma asahan ku, yana si Isa Almasi. Boꞌ na, tatantu ku du mastiꞌ takaya na jaꞌ ngayaran ma bay pa-ntan ku niiya ngabut sampay llaw katapusan.

¹³ Na Timuti, bila ko noan jama, amay-amay daa sihinan nu san dangkitiꞌ tōꞌ sabanna ma bay takoleꞌ nu man ku. Maka meꞌ kau tibuuk na ka si Isa Almasi, subay tattap pangando nu niiya. Maka subay du tattap aseꞌ nu ni siga pagkahi nu manusiyaꞌ.

¹⁴ Siga tōꞌ naa ina ma bay hinalap ningkau, hagaan jaꞌ sina. Sangkon, man tabang Rū Sutsiꞌ ma tattog njawom atay ta, jagahan nu paayad mari yaꞌ kalamuran leꞌ jinisan tōꞌ palsu.

¹⁵ Na ndooy ilay ni Asiya, katoonan nu na du, adak katis na mimon danganakan ta nikutan aku. Sampay ga si Pijilus ka si Helmojinis, lai na du.

^16-17 Sugaꞌ kuwan si Onesiporus ka ga paglūng na, kamura-murahan pinanimbangan du sila meꞌ Papuꞌ. Batan takdang na ilay bay takka pitu pa Rom, yaꞌ bay luu katagong na miha ngkod-ngkoran ku yaꞌ gi bay tatammu na. Yaꞌ san ya bay iyaꞌ takita magpangandaꞌ aku san ku bay taingkot ka karina. Daran ya bay magamgaman aku.

¹⁸ Kau pun ina, katoonan nu du, yaꞌ taambat bay tabang na niyaku bay jaman ku nnaa ni Epesus. Kamura-murahan pinanimbangan du ya meꞌ Papuꞌ ni llaw hukuman.