2 Tesaloneka 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol nohoꞌ pinakuhan duwaa

¹ Siga danganakan, sarī man inaa, luu situ paku ku ningkaam. Bong anu, pakuhan bi doꞌ kami duwaa. Kamura-murahan tinabangan du kami meꞌ Tuhan supaya patanyag na deꞌ-dēꞌ umanat mahap pasal Papuꞌ Isa. Maka maku kam duwaa, kamura-murahan sagannap ma kale umanat mahap, meꞌ kaam na du pitsayaꞌ.

² Maka pakuhan bi du kami duwaa, kamura-murahan man tabang Tuhan, yaꞌ du kami kongoy-kongoy meꞌ siga jama dahulakaꞌ ma doman minsanaꞌ kami. Batan meka gi sina yaꞌ pitsayaꞌ ni umanat kami.

³ Kahapan kanaalla du Papuꞌ tabi si Isa. Taasahan bi sina ya mataggu iman bi sampay nganjagahan kaam supaya kam yaꞌ takoleꞌ sinasat meꞌ Ibilis.

⁴ Maka pagka tibuuk na kam ka Papuꞌ Isa, tatantu kami bean bi na sina mimon bay tugun kami ningkaam ngabut sampay ni sinōng.

⁵ Kamura-murahan tinabangan du kam meꞌ Papuꞌ mari pasōng pangahati bi pasal aseꞌ Tuhan ningkaam. Maka kamura-murahan natas na pin kam njawom kabinsanaan meꞌ bay karuha Almasi.

Sukuꞌ Papuꞌ Isa subay yaꞌ huskaw

⁶ Na siga danganakan, ni kapatut bay ndean kami meꞌ Papuꞌ tabi si Isa Almasi, luu gi situ panohoan ku ningkaam. Bong luu pagkahi bi sukuꞌ si Isa nnaa ma hūk buwat maka yaꞌ mean bay tōꞌ kami ningkaam, daa kam palamud ninsila.

⁷ Akigun bi jaꞌ suntuan kami. Kaam na silay mismu bay kasakup bay kadarihan kami jaman kami nnaa ni lahat bi. Lay jaꞌ kami magtuyuꞌ buwat. Yaꞌ kami bay takita bi nangge-nangge jaꞌ hūk ngusaha.

⁸ Man kami bay magbalanjaꞌ, yaꞌ kami bay pingkaꞌ mangasa ni hulas-sangsāꞌ jama. Sangom-llaw na kami bay magtuyuꞌ buwat bong pin yaꞌ jaꞌ kam paya malanjaan kami.

⁹ Kamasaꞌ, meꞌ kami itu sosohoan si Isa, pataꞌ du bong siꞌ kami bay binalanjaan meꞌ bi. Sugaꞌ honaꞌ-honaꞌ kami, gam na kami bay muwanan kaam suntuan ayad mari luu inakig meꞌ bi.

¹⁰ Saꞌ ba, jaman kami lagi nnaa, ndang bay kam baan kami bong luu pagkahi bi hūk buwat, subay ya yaꞌ pinakan?

¹¹ Kon bi itu paintoman kami meꞌ tuu, batan luu sina nnaa taaka kami ni baanan bi hūk buwat. Bbuwatan da bong saꞌ ningkōꞌ-ningkōꞌ, maglanyawan ngusiat kahalan jama padisu-padisu lumaꞌ.

¹² Na sagannap ma meꞌ looy arat da, ni kapatut Papuꞌ tabi si Isa Almasi njataꞌ kami, ituu tugun kami ninsila: Subay sila yaꞌ hangat nganjagahan kaadaan jama. Maka subay sila ngusahān dī da.

¹³ Na siga danganakan, daa kitabi jamu buwat kaayaran.

¹⁴ Bong ndaꞌ bi luu nnaa yaꞌ maruli ni pituwa kami jawom suwat tuu, indanan bi. Daa na kam palamud ninsila supaya tabista da na yaꞌ tuwaꞌ pabuwatan da, boꞌ da iyaꞌ ni dī da.

¹⁵ Daa jaꞌ baw sila pabuwatun bi subay ga banta bi. Arapun paintoman bi sadjaꞌ sila. Ndang-ndang danganakan bi du sila njawman si Isa.

Katapusan bitsala si Pol

¹⁶ Kamura-murahan ni mimon kahalan bi, binuwanan na pin kam kasannangan jawom atay bi meꞌ Papuꞌ, yana poonan kasannangan. Maka kamura-murahan luu na pin ya ngunungan kaam labbasakayi.

¹⁷ Ni katapusan suwat tuu, aku na situ, yana si Pol mismu, nuwat salam duwaa ku ningkaam ka tangan ku mismu. Ndang meꞌ tuu situ tabiat ku mupus mimon suwat ku.

¹⁸ Kamura-murahan binuwanan na pin kam sikamimon barakat meꞌ Papuꞌ tabi si Isa Almasi. Wassalam