2 Tesaloneka 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

2 TESALONEKA

¹ Ituu itu aku, yana si Pol. Itu suwat kami ka ga si Saylas ka si Timuti pa mman bi baanan sukuꞌ si Isa nnaa ni Tesaloneka, yana kaam ma tibuuk ka Mmaꞌ tabi Tuhan ka Papuꞌ tabi si Isa Almasi.

² Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

Mehe pagsukuhan si Pol pa Tuhan

³ Siga danganakan, pataꞌ na du situ kami wā muwan pagsukuhan pa Tuhan sabapan bi, batan pabasag na pin pangando bi ni si Isa maka magsasōng na pin meꞌ bi sikaaseꞌ-kaaseꞌ.

⁴ Sangkon bila kami maglaw-lamud ka baanan sukuꞌ Tuhan ni kalahat-lahatan, wā kami nanglitan kaam. Bāꞌ kami ninsila, minsan kam kansang nilaugan atawa pun tumabbaꞌ njawom kamalasahiyan, basta tinatasan na jaꞌ meꞌ bi. Maka yaꞌ na pin kam kuhi patatak pitsayaꞌ ni Papuꞌ Isa.

⁵ Na tatas bi ina ni jinisan laug ka kabinsanaan kalnaꞌ pamarinta Tuhan, yana sipat intong du bandingan Tuhan njataꞌ bi. Batan ni bandingan na, mastiꞌ tawop jaꞌ kam tabeꞌ ni pamarinta na.

⁶ Maka ni kaintong hukuman na, kuwan sagannap ma niksaꞌ kaam, mastiꞌ pinidjalaꞌ du sina mintu meꞌ na.

⁷ Boꞌ kaam baw ina ma bininsanaꞌ sampay na kami, gam pin binuwanan sina mintu pahaliyan pag taabut katakka Papuꞌ Isa man sulgaꞌ ddas ka siga malaikat na ni kaehe kawasa da.

⁸ Iya ina mintu duwai ddas ka api noleyab man na midjalaꞌ sagannap ma nuwak Tuhan ka sagannap ma yaꞌ mmeꞌ ni umanat mahap pasal Papuꞌ tabi si Isa.

⁹ Pidjalaꞌ njataꞌ da ina mintu, inannaꞌ sila ni nalkaꞌ saumu-umu lawak man Papuꞌ tabi si Isa. Yaꞌ sila hampit ni kabantugan na atawa pun ehe kawasa na saumu.

¹⁰ Ni llaw katakka na ina mintu, pinudji na ya sampay binuwanan kabantugan mehe meꞌ siga sukuꞌ na, yana sikamimon ma pitsayaꞌ niiya. Boꞌ tud haylan banahan mintu sila ngandaꞌ iya ni kaehe kawasa na. Kaam pun, mastiꞌ tabeꞌ na du sina kam ni siga sukuꞌ na ni llaw looy mintu sabap lay na kam bay pitsayaꞌ ni kabanahan ma bay pasaplag kami ningkaam.

¹¹ Dari wā situ kami makuhan kaam duwaa. Pakuhan kami kam tabang man Tuhan supaya wā nulut ni kahandak na kawul-piil bi. Meꞌ looy ilay, initung na kam meꞌ Tuhan tawop bay lliyun meꞌ na pa jawom pamarinta na. Kamura-murahan man kawasa Tuhan njataꞌ bi, tapajatu bi na mimon kaayaran ma karomanan bi pinabuwat man sabapan pangando bi ni si Isa Almasi.

¹² Meꞌ looy ilay mintu, koleꞌ na Papuꞌ tabi si Isa kabantugan man sabapan bi. Damikiyan kaam pun, koleꞌ na du kabantugan man sabapan na. Na ituu itu siꞌ, binakbul jaꞌ sina mintu man sabapan aseꞌ-tabang Tuhan tabi ka Papuꞌ tabi si Isa Almasi ni jataꞌ bi.