2 Pitel 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Llaw katakka Papuꞌ

¹ Na siga kakasi ku, ituu itu suwat ku ni kaduwa na ningkaam. Ngkon ku itu nuwatan kaam ni kaduwa na man ku maintoman kaam kabanahan pabalik mari tattog na pamiki bi.

² Yaꞌ ku doman takupan bi bay bitsala kanabi-nabihan ka siga panohoan Papuꞌ Isa, yana tukang nalamat kitabi. Boꞌ ilooy na silay siga panohoan ma bay pinasampay ningkaam meꞌ kami siga rasul na.

³ Sugaꞌ ilooy duhuꞌ subay tahati bi meꞌ tuu: Ni ahil jaman, meka sina mintu pangaludjum. Ilooy du meꞌ punu njawom atay da nganduwan napsu da sadjaꞌ.

⁴ Yuk da ina mintu ningkaam, “Saꞌ ba, Papuꞌ bi bay nganjanjiꞌ pabeleng? Bong mattan, ongoy yaꞌ gi luu? Labba man jaman kabboꞌ-bboan tabi bay matoy ngabut sampay batnaa, masi du sibuꞌ kaadaan lahat. Junyaꞌ tuu yaꞌ bay halin labba man jaman na bay pinapayak.”

⁵ Sugaꞌ siga pangaludjum meꞌ looy ilay, tahadjaꞌ da lupa. Ndang katoonan da du ngkon luu langit sabap Tuhan bay magpalman. Damikiyan, katoonan da du ngkon gumi bay mantuk sampay timbul man jawom boheꞌ man sabapan palman Tuhan du.

⁶ Maka mimon-mimon taꞌ babaw junyaꞌ mattoꞌ bay pingkaꞌ binasa meꞌ dunuk mehe man sabapan palman Tuhan du.

⁷ Damikiyan, gumi ka langit ma luu ni batnaa, ampud leꞌ api bbos-bbos man sabapan palman Tuhan du. Sugaꞌ nilantan gi sina ngkod-ngkoran yaꞌ gi taabut llaw hukuman, yana llaw man Tuhan makaat sagannap ma yaꞌ luu tawu da niiya.

⁸ Sugaꞌ siga kakasi ku, yaꞌ baw sina tatunaꞌ tabi bong sumilan binakbul mimon ituu siꞌ. Ingatun bi, bong pa Tuhan, dalibu taun sibuꞌ du ka dangallaw. Damikiyan, dangallaw sibuꞌ du ka dalibu taun.

⁹ Sangkon sagannap ma mista Papuꞌ lawun numan janjiꞌ na pabeleng, magsāꞌ sila. Arapun lantan na jaꞌ silay katakka na sabap tahaꞌ pasensiya na ngagad manusiyaꞌ, kawu-kawu nawbat sila. Batan kainagon na ina yaꞌ luu san disu jama tanalkaꞌ.

¹⁰ Sugaꞌ lantan yaꞌ lantan, mastiꞌ luu jaꞌ sina mintu llaw Papuꞌ pabeleng. Boꞌ kakuratan jaꞌ sina mintu jama ni katakka na meꞌ karuha jama kakuratan meꞌ sugaru. Ni llaw looy ilay mintu, luu gi ngallub boꞌ magti ampud mimon-mimon taꞌ langit sampay lanyap na du langit. Damikiyan gumi pun sampay na mimon-mimon taꞌ babaw junyaꞌ ampud na du sina leꞌ api.

¹¹ Na pagka mimon-mimon hinansu bbos-bbos, subay paliksaꞌ tabi dī tabi bong pooy tangge-tingkōꞌ tabi ni batnaa. Subay sutsiꞌ kawul-piil tabi. Maka subay kitabi lillaꞌ pa Tuhan

¹² halloman tabi ngagad sampay magdautan katakka Almasi ni llaw ma bay ginantaꞌ meꞌ Tuhan. Ni llaw looy ilay mintu, meꞌ halling sambat ku na siꞌ, ampud na sina langit maka tunaw ga mataallaw, buwan ka siga potean leꞌ hawa api.

¹³ Sugaꞌ san meꞌ looy, luu gi agad tabi pinasunuꞌ langit bahau ka junyaꞌ bahau ma bay njanjiꞌ meꞌ Tuhan para ni sukuꞌ na. Ndooy ilay mintu, isu-isu kaintongan sa pinabuwat.

¹⁴ Sangkon, siga kakasi ku, halloman bi ngagad siga pakaradjaan looy mintu binakbul, subay kam tattap paintong. Maka subay yaꞌ luu sutsutan njataꞌ bi supaya mahap na jaꞌ kam pa Tuhan.

¹⁵ Ingatun bi, tud tahaꞌ pasensiya Papuꞌ tabi. Llantan meꞌ na katakka na sabap muwanan na pin ya manusiyaꞌ dapat man da nawbat, boꞌ da salamat. Na siga pakaradjaan tuu itu siꞌ, lay na du bay sinabbut meꞌ danganakan tabi si Pol njawom suwat na ningkaam. Iya bay nuwatan kam man sabapan pangahati bay dean Tuhan niiya.

¹⁶ Tuktuk na nuwat, mastiꞌ patabeꞌ na jaꞌ siga pakaradjaan meꞌ ilooy ma bay sabbut ku siꞌ. Sugaꞌ luu baw silay bitsala njawom siga suwat na awod hinati. Dari kasohean jama ma kulang pangahati da saltaꞌ na yaꞌ luu katattogan pangando da ni si Isa, bbuwatan da nabid bitsala na. Boꞌ ndang ilooy na silay tabiat da minsan ni kitab ilooy kasohean. Miha jaꞌ sila man da binasa.

¹⁷ Sangkon, siga kakasi ku, pagka katoonan bi na mimon bay sabbut ku siꞌ, iyakinan bi tōꞌ jama ma yaꞌ ngisbat Tuhan, taggahaꞌ lay na baw kam mintu takoleꞌ da binoo magsiꞌ sampay man bi na ngalabbahan ntan bi.

¹⁸ Katapusan bitsala ku: Duhunan bi na pin meꞌ bi ngikut arat-tabiat Papuꞌ tabi si Isa Almasi, yana tukang nalamat kitabi. Maka mangasa na pin kam ni aseꞌ-tabang na ningkaam. Songan bi lagi meꞌ bi lungbid ka iya. Kamura-murahan pinudji na pin ya labba man batnaa sampay saumu-umu! Amin. Wassalam