2 Pitel 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pitel mahati siga sukuꞌ si Isa pasal guru palsu

¹ Na kanabi-nabihan looy ilay siꞌ intong. Sugaꞌ ni jaman looy, luu du baw ndooy ni Israil jama magnabi-nabihan. Damikiyan, luu na du sina mintu siga guru palsu ni baanan bi masalluk tōꞌ bingkok ma kabinasa ningkaam. Boꞌ tuwak da lagi Papuꞌ tabi. Padahal, lay na ga ya nongan umu na bong pin tapaddusan na jaꞌ sila man jawom komkoman Ibilis. Sangkon, saꞌ ga bina oy, miha jaꞌ sila man da deꞌ-dēꞌ binasa.

² Meka na sina mintu ni baanan bi takoleꞌ binitsalahan meꞌ da sampay mmeꞌ meꞌ uwahan da buwat jinisan kasabuhan. Dari pag toklas na, binitsala na sina mintu pa kalaatan kabanahan ma inantanan meꞌ tabi.

³ Ni kamulakab napsu ga guru meꞌ looy ilay, bbuwatan da ina mintu nulun-nulun siga dustaꞌ bong pin koleꞌ jaꞌ sila sīn mman bi. Sugaꞌ jama meꞌ sila ina, man maruhuꞌ lagi ndang bay sinukuꞌ meꞌ Tuhan minulkaan. Boꞌ kabinasahan da ina mintu, ndang luu na bay sinaddiya.

⁴ Tattap jaꞌ sina sila minulkaan. Mindoga jaꞌ kam ni palas siga malaikat ma bay buwat dusa mattoꞌ. Yaꞌ du sila bay pinabiya meꞌ Tuhan amu-amu buwat dusa. Sangkon lay na sila tinahan pa njawom lowang tangob ngkod-ngkoran yaꞌ gi taabut llaw hukuman bbos-bbos.

⁵ Damikiyan, manusiyaꞌ ma yaꞌ tawu pa Tuhan ni bay jaman Nabi Nū, yaꞌ du bay pinabiya meꞌ Tuhan amu-amu buwat dusa. Saꞌ ba, palas njataꞌ da, lay sila katis matoy ndunukan? Ilooy du bay sinalamat meꞌ Tuhan yana Nabi Nū ma bay masaplag lān kaintongan ninsila. Maka luu gi soheꞌ na pituꞌ lay du salamat.

⁶ Damikiyan luu lagi silay siga jama ndooy ni Sodom ka Gomora lay du kalabuan hukuman Tuhan mattoꞌ. Saꞌ ba, lay jaꞌ sila ampud leꞌ Tuhan, sampay ga daira da pun, bay du dari abu sadjaꞌ. Dari njataꞌ da, ndooy na kitabi ngaddoꞌ matakaddam bong oy palas jama ma yaꞌ luu tawu da pa Tuhan.

^7-8 Sugaꞌ ndooy ilay ni Sodom, luu gi baw disu lalla, yana si Lut, lay sinalamat meꞌ Tuhan. Iya ilay jama intong. Halloman na maglahat ka ga jama jahat ni daira looy, ndang tud kamaatan ya lassa ngandaꞌ kadarihan da. Batan llaw pa dangallaw, takita na sila buwat jinisan kasabuhan sampay takale na jinisan bitsala da lakaꞌ-lakaꞌ.

⁹ Sangkon ni mimon bay sabbut ku siꞌ, tumatandaꞌ na pandoy Tuhan maddusan jama ma ngisbat iya man jawom kasusahan. Damikiyan, pandoy du baw ya niksaꞌ jama ma yaꞌ intong njawom tahanan ngabut sampay sila pinidjalaꞌ ni llaw hukuman.

¹⁰ Maka tud bohat sina pidjalaꞌ na ni sagannap ma amu-amu nganduwan napsu da buwat jinisan kasabuhan sampay ni sagannap ma yaꞌ kuhi lillaꞌ ni kapatut na. Boꞌ meꞌ looy na du silay bana kadari siga guru palsu ma bay sabbut ku siꞌ. Tud takabbu sila sampay nawakka buwat oy-oy karomanan da san tagga pa Tuhan. Yaꞌ san sila tawu madiyoꞌ sagannap ma ngantanan kawasa-kapatut mehe, ma subay pinaehe.

¹¹ Minsan siga malaikat ma ngantanan kawasa-kapatut langkaw banahan man siga guru palsu, yaꞌ du sila mitsala siga guru meꞌ looy pa kalaatan ni pag-awpan Tuhan.

¹² Boꞌ siga guru palsu meꞌ looy ilay, minsan pakaradjaan ma yaꞌ tahati da, binitsala du meꞌ da pa kalaatan. Sibuꞌ du sila ka sattuwa tawun, yaꞌ luu honaꞌ-honaꞌ da. Boꞌ sattuwa ina, ilooy du kasongan da sinungkuban sampay pinapatoy. Damikiyan, siga guru meꞌ looy ilay, sabap kabinasa tōꞌ da ni jama, mastiꞌ binasa jaꞌ du sila mintu meꞌ Tuhan.

¹³ Kalaatan bay pabuwat da, tinungbasan du sila ka kalaatan. Tud yaꞌ luu kaiyaan da. Bbuwatan da nganduwan napsu da jaꞌ mōꞌ kasabuhan ni mayran. Tigiꞌ sila maglaw-lamud ka kaam mangan-mangan bahasa dambuwaꞌ atay sila ka kaam. Boꞌ ko, sarī maksud da. Sila ina meꞌ sapantun tamak ni badjuꞌ poteꞌ.

¹⁴ Bila sila ngita danda, lanji jaꞌ njawom pamiki da. Tud yaꞌ luu dohong da buwat dusa. Bbuwatan da ngaliboy jama ma kulang iman mmeꞌ ni kalaatan da. Maka alistu sila ngulihal altaꞌ jama ni kamulakab napsu da. Jama meꞌ sila ilay minulkaan meꞌ Tuhan.

¹⁵ Lay na sila magsiꞌ man lān intong. Lay na sila ngikut tabiat si Balaam, anak si Beyol mattoꞌ. Si Balaam ilay, ni kaehe kainagon na ni sīn, kuhi jaꞌ ya buwat kalaatan bong pin ya ndugangan jaꞌ paeka.

¹⁶ Sugaꞌ yaꞌ na bay darahan na niyat na buwat karupangan sabap bay ya tapampan leꞌ bitsala kuraꞌ na. San hayop yaꞌ kabitsala, luu na ga suwara manusiyaꞌ bay pōꞌ man behe kuraꞌ na.

¹⁷ Balik ta pa siga guru palsu, tud yaꞌ luu pūs da. Kaap-apan jaꞌ jama meꞌ da. Sibuꞌ du karuha da ka tagaꞌ yaꞌ magboheꞌ. Maka sibuꞌ du karuha da ka andom ma pingkaꞌ jaꞌ bay tinuran meꞌ baliyu yaꞌ san uwan ni huma. Jama meꞌ sila ilay, ndang luu na bay hinalliꞌ ninsila kasusahan njawom lugar lindom.

¹⁸ Basag sila ngabbu saula-ula pandoy sila, boꞌ ko, karupangan jaꞌ bitsala da. Baꞌ-bāꞌ da, san gi oy kinanapsuhan meꞌ jama, dari jaꞌ nduwan. Sabapan tōꞌ da meꞌ looy, kasohean jama ma bahau jaꞌ pitsayaꞌ ni Papuꞌ Isa, ma bahau jaꞌ bay ngalabbahan napsu da ma maat, lay na baw taboo-boo bbeleng pabalik pa bay kalaatan da.

¹⁹ Baꞌ-bāꞌ ga guru meꞌ looy, bong sila binean, nammu konoꞌ kita kasumunsayaan buwat oy-oy karomanan ta. Mingkan, sila na mismu yaꞌ sumunsayaꞌ sabap takawum sila meꞌ napsu da ni kalaatan ma makaat sila. Yaꞌ tasayu da, oy-oy ina napsu ma yaꞌ agak ta, inaa na baw magbayaan kita subay ga papuꞌ ta.

²⁰ Na sibuwa ilay, siga guru palsu looy siꞌ bay ngahasi kabanahan pasal tukang nalamat kitabi, yana Papuꞌ tabi si Isa Almasi. Pag toklas na, lay na labbahan da mimon kawul-piil da maat ma katamak ni manusiyaꞌ. Pag batnaa, meꞌ ga takawum na baw sila balik meꞌ napsu da buwat dusa. Dari mas maat gi kaadaan da ni batnaa man jaman da yaꞌ gi bay mmeꞌ ni si Isa.

²¹ Sagannap ma toon lān intong, gam na yaꞌ bay katoonan da bong papagsiꞌ du sila sampay yaꞌ na ngasip ni siga panohoan Tuhan ma bay pinasampay ninsila.

²² Jama meꞌ looy ilay, tud lay bana tuwaꞌ pa sila sambatan ilooy ma yuk na, “Tiyap-tiyap idoꞌ ina, pabeleng mangan utaꞌ na,” atawa yuk kasohean, “Tiyap-tiyap bawi ina, san sawpama bay na pinandi, pabeleng du tugub pa jawom pesak.”