2 Korin 6 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na meꞌ kitabi tu saliꞌ-saliꞌ limbang Tuhan ngaliyun manusiyaꞌ pa mman na, junjung kami na ningkaam, daa na pasensengan bi aseꞌ Tuhan ningkaam.

² Intomun bi palman njawom kitab, ilooy ma yuk Tuhan, “Pag mintu taabut waktu bay gantaꞌ ku, kabbul ku na duwaa bi. Tabang ta sa kam mari kam salamat.” Siga danganakan ku, baan ta kam banahan, ituu na situ waktu bay awnan Tuhan. Hati na, ituu na situ masa man manusiyaꞌ koleꞌ kasalamatan.

³ Sangkon kami itu, sabuli-buli kami ngilagan oy-oy kawul-piil gantaꞌ man kami tasahawi. Ilooy ilagan kami taggahaꞌ luu gi sabapan man jama nuwak umanat kasalamatan ma pinasaplag meꞌ kami.

⁴ Kainagon kami ni mimon tangge-tingkōꞌ kami tumatandaꞌ ni jama bana-bana kami sosohoan Tuhan. Inaa sina kon kami natasan jinisan kabinsanaan, kamalasahiyan ka kasusahan.

⁵ Tamūd llagpiꞌ kami sampay njīl. Tamūd llān kami meꞌ siga baanan jama hiluhalaꞌ nguntra kami. Sarī gi, daran yaꞌ luu kahali kami hangat kami maghulas-sangsāꞌ masampay umanat mahap. Tamūd natas na jaꞌ kami yaꞌ tuli timpus dambahangi sampay naggaan lingantu.

⁶ Maka tandaꞌ kami sosohoan Tuhan, yaꞌ luu pabuwat kami oy maka oy na man kami taawnan sabu. Boꞌ na, tumatandaꞌ du luu pangahati kami ni kitab. Sarī gi, tahaꞌ pasensiya kami maka manimbang kami ni jama. Maka tumatandaꞌ du pinagmundaan kami meꞌ Rū Sutsiꞌ. Maka hilas jaꞌ aseꞌ kami ni mimon manusiyaꞌ.

⁷ Bila kami magnasihat, kabanahan jaꞌ mimon ma pinōꞌ meꞌ kami, boꞌ tumatandaꞌ luu jaꞌ kawasa Tuhan njataꞌ kami. Kaintongan kawul-piil kami yana pakakas kami man ngatuhan soysoy nguntra kami.

⁸ Dari kami itu, sinanglitan na ka kami atawa pinadiyoꞌ, pinitnahan na ka kami atawa binitsala pa kaayaran, basta buwat jaꞌ kami kaintongan. Salla na, san kami bonto, baꞌ-bāꞌ kasohean, pangandupang lagi kami.

⁹ Meꞌ kasohean buwat kami, subay ga jama yaꞌ takila. Mingkan, kinatoonan kami meꞌ sikamimon. Daran gi kami nontongan kapatoy. Kahapan masi gi du baw kami llum. Damikiyan, daran kami binonoꞌ. Kahapan yaꞌ gi du baw kami bay matoy.

¹⁰ San yaꞌ taambat kamalasahiyan talingkaan kami, yaꞌ du baw bay maglumba kagakan njawom atay kami. San kami miskin, meka na baw jama magkadayahan meꞌ kami ka altaꞌ ma natas saumu-umu. San yaꞌ luu oy maka oy na ni junyaꞌ tuu ma taawnan kami dapu, pagka kami tibuuk na ka Almasi, mimon ma luu niiya, ningkami na du.

¹¹ Na siga danganakan kami nnaa ni Korin, kami itu mitsala, yaꞌ luu sinipuk njawom atay kami, batan tud maaseꞌ kami ningkaam.

¹² Bong sabagay lay na maglumba meꞌ tabi sikaaseꞌ, saꞌ na situ man kami.

¹³ Dari pagka meꞌ ku ngingat anak ta na kam, bong siꞌ dari, sibuan bi na aseꞌ kami ningkaam.

Yaꞌ dari sukuꞌ si Isa tibuuk ka jama ma yaꞌ pitsayaꞌ

¹⁴ Siga danganakan, daa kam nibuuk dī bi ka jama ma yaꞌ pitsayaꞌ ni si Isa. Batan yaꞌ sina dari jama intong maglimbang ka jama ma ngalangga saraꞌ Tuhan. Dan jinis meꞌ halling, pooy meꞌ dantaꞌ kapagtibuuk ka lindom?

¹⁵ Yana meꞌ Almasi yaꞌ luu kabigiꞌ-bigian na ni tabiat Ibilis, damikiyan, kitabi pun ina ma pitsayaꞌ ni Almasi yaꞌ du sina luu kabigiꞌ-bigian tabi ni tabiat jama ma yaꞌ pitsayaꞌ niiya.

¹⁶ Lagiꞌ na, yana meꞌ lumaꞌ Tuhan yaꞌ dari llamuran siga tuhan-tuhan, damikiyan kitabi pun, yaꞌ du dari mmeꞌ meꞌ uwahan jama ma yaꞌ pitsayaꞌ ni si Isa. Batan kitabi na situ binilang lumaꞌ Tuhan sabap Tuhan sabanna ma llum saumu-umu patannaꞌ njawom baran tabi. Meꞌ halling sambat palman Tuhan njawom kitab, yuk na, “Patannaꞌ na sina ku mintu njawom baran da maka luu na pin ku ngunungan sila. Aku na sina mintu Tuhan da maka sukuꞌ ku na sila.” Maka lay gi magpalman Tuhan, yuk na,

¹⁷ “Palawak na kam man sagannap ma buwat maat. Pasakkat na kam mman da. Maka daa na kam palamud ni oy-oy kalalamaan, boꞌ bi hasi ku.

¹⁸ Aku na Mmaꞌ bi, maka anak ta na kam.” Dari ilooy na silay siꞌ palman Tuhan Sangat Kawasa.