2 Korin 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Baran bahau

¹ Na baran tabi itu meꞌ sapantun lumaꞌ sandaꞌ-sandaꞌ jaꞌ man tabi pahantiꞌ halloman tabi taꞌ junyaꞌ. Maka katoonan tabi du, bong lay na langkat, mastiꞌ luu du gantiꞌ na lumaꞌ bahau ndooy ni sulgaꞌ. Intong na, baran bahau. Boꞌ lumaꞌ looy ilay mintu saꞌ na meꞌ hantang lumaꞌ ma pinabuwat meꞌ manusiyaꞌ, batan lakka man Tuhan ka natas saumu-umu.

² Batnaa tu, dari ko ngawon, ngandahing na kitabi ni kaehe kainagon tabi koleꞌ lumaꞌ looy. Awnan ku ilay siꞌ yana baran bahau man sulgaꞌ.

³ Baran tabi ilay mintu man sulgaꞌ tadalil pa juba nyawa tabi mari kitabi yaꞌ taawnan nantang.

⁴ Halloman tabi itu pahantiꞌ ni baran tabi batnaa, dari ko ngawon, ngandahing na kitabi sabap meka kasusahan tabi. Sugaꞌ saꞌ baw tu ga hatiyan na doman na kitabi matoy. Sat na jaꞌ, agon yaꞌ na kitabi kaagad masa man baran tabi ma kuhi gi matoy ginantian ka ilooy ma llum saumu-umu.

⁵ Kitabi itu, ndang lay na sinaddiya meꞌ Tuhan koleꞌ baran lakka man sulgaꞌ. Lagiꞌ na, Tuhan du sina bay maasok Rū Sutsiꞌ ningkitabi, yana buktiꞌ man tabi kasiguru koleꞌ mimon bay sinukuꞌ ningkitabi bbos-bbos.

⁶ Sangkon tatantu tabi mastiꞌ luu jaꞌ sina kasongan tabi ayad banahan. Kamasaꞌ, katoonan tabi du, halloman tabi itu yaꞌ gi bay ngambanan baran tabi ma biyasa ntuu ni junyaꞌ, yaꞌ gi kitabi kapagdambuwaꞌ ka Papuꞌ Isa.

⁷ San meꞌ looy, halloman tabi itu llum ni junyaꞌ tuu, mangando jaꞌ kitabi ni Papuꞌ Isa san yaꞌ gi takita tabi ilooy ma bay hinalliꞌ ningkitabi.

⁸ Sannang na pamiki tabi batan tatantu tabi mastiꞌ luu jaꞌ kaayaran ngagad kitabi. Batan katoonan tabi na, mas mahap gi kitabi sakkat ka baran tuu supaya kitabi kapagdambuwaꞌ na ka Papuꞌ Isa.

⁹ Dari sabagay lay na kitabi ngambanan baran tuu atawa niyaꞌ, pakutuꞌ tabi na jaꞌ meꞌ tabi nulut kahandak Almasi.

¹⁰ Batan ndang bay sina ginantaꞌ ningkitabi sikamimon pinaawop ni Almasi hinukum. Pag-anu, boꞌ tabi tinungbasan na sabapan mimon ma bay pabuwat tabi mahap-maat.

Angan-angan si Pol moo jama pa jawom okoman Tuhan

¹¹ Na pagka katoonan kami katawu-tawu hukuman Papuꞌ Isa, sabuli-buli kami na situ mitsalahan jama nohoꞌ pitsayaꞌ niiya. Katoonan Tuhan du sina yaꞌ luu sarī niyat njawom atay kami. Kamura-murahan kaam pun, tabista bi du.

¹² Bitsala ku ilay siꞌ ni suwat tuu, yaꞌ luu maksud ku muhung sinanglitan. Arapun lay jaꞌ ku maan kaam kabanahan supaya luu man bi ngandapitan kami ni siga guru palsu nnaa ma tigiꞌ madiyoꞌ kami. Sila ina, ilooy du hagaan ninsila mantug ntan da, boꞌ yaꞌ san paruli da bong oy niyat njawom atay da.

¹³ Kasohean ina nnaa, pag ndaꞌ da biddaꞌ na ehe tuyuꞌ kami kalnaꞌ Tuhan, baꞌ-bāꞌ da, lungay kami man panganna. Sugaꞌ yaꞌ dari oy na bong bistahan da lungay kami man panganna atawa niyaꞌ. Ilooy du puhung kami bong pin sinanglitan jaꞌ Tuhan maka bong pin koleꞌ jaꞌ kam kaayaran njataꞌ kami.

¹⁴ Ngkon kami itu magtuyuꞌ kalnaꞌ Almasi sabap tabista kami ehe aseꞌ na ni manusiyaꞌ. Inaa sina muwansangan kami masaplag. Tandaꞌ ehe aseꞌ Almasi, lay na ga ya nongan umu na gantiꞌ manusiyaꞌ sikamimon. Dari meꞌ tabi ngingat, mimon kitabi lay na du tabeꞌ matoy niiya.

¹⁵ Kon na ilay Almasi bay matoy gantiꞌ sikamimon supaya sagannap ma koleꞌ kaallum bahau makutuꞌ kahandak na, saꞌ na kahandak da. Boꞌ pataꞌ du baw lay batan iya bay matoy sampay pinakallum pabalik kalnaꞌ manusiyaꞌ sikamimon.

¹⁶ Sangkon batnaa, pagka pakutuꞌ tabi na kahandak Almasi, yaꞌ na sibuꞌ meꞌ tabi manding jama ka bay jaman tabi yaꞌ gi pitsayaꞌ ni Almasi. Jaman looy ilay, sampay Almasi sarī du bandingan tabi niiya.

¹⁷ Pag batnaa, tabista tabi na, soysoy tibuuk ka Almasi, sibuꞌ du karuha da ka jama bahau bay pinapayak. Pagkajama da maruhuꞌ ma nabiat nulut dī da, yaꞌ na luu. Yaꞌ na sibuꞌ ka maruhuꞌ batan luu na pagkajama da bahau ka kaallum da bahau.

¹⁸ Na ilooy ilay siꞌ, sikamimon man gantaan Tuhan. Bistahun bi doꞌ, san kitabi bay ndusa pa Tuhan sibuwa, lay gi ya buwat jalan man tabi mahap na niiya njataꞌ pabuwatan Almasi. Boꞌ lay gi Tuhan nguwakilan kitabi nohoꞌ mahati jama bong pooy meꞌ da mahap na niiya.

¹⁹ Dari meꞌ tuu situ umanat bay sohoꞌ Tuhan pinasampay ningkitabi: Njataꞌ kapatoy Almasi, ilooy na man Tuhan muwanan sikamimon manusiyaꞌ lawang man da mahap na niiya sampay yaꞌ na initung meꞌ na dusa da.

²⁰ Kitabi itu yana siga wakil Almasi. Sangkon bila kitabi mitsalahan jama, sibuꞌ du karuha tabi ka Tuhan mitsalahan sila. Halling tabi ninsila, “Junjung kami na ningkaam kalnaꞌ si Isa Almasi, tusun bi na lān man bi mahap na pa Tuhan.

²¹ Bistahun bi doꞌ, san yaꞌ luu dusa Almasi samasakali, lay na ga ya binuwat meꞌ Tuhan subay ga baldusa batan mimon dusa tabi lay na tinanggung meꞌ na. Kon na bay buwat meꞌ looy supaya dari jama intong na kitabi meꞌ karuha kaintongan Tuhan man sabapan pagkatibuuk tabi ka Almasi.”