2 Korin 12 - Sabahagiꞌ Kitab Tawrat: Panagnaan ni Awwal Jaman maka Kitab Injil

Pakaradjaan kainu-inu bay pinalahil meꞌ Tuhan ni si Pol

¹ Na inawnan magpabantug, san katoonan ku yaꞌ luu pūs na, gam pin talpaksaꞌ darahan ku gi sabapan bi. Sangkon tuntutan ta doꞌ kam siga pakaradjaan bay pinalahil meꞌ Papuꞌ niyaku

^2-3 luu na sapu-mpat taun bay pingkaꞌ. Jaman looy, luu disu lalla katoonan ku ma pitsayaꞌ ni Almasi bay inangkat pa katallu pangkat sulgaꞌ. Yaꞌ baw katoonan ku bong nyawa na sadjaꞌ ka, atawa lay tabeꞌ sampay baran na. Isu-isu Tuhan tau. Sugaꞌ katoonan ku baw, basta mattan ya bay nakka pa sulgaꞌ.

⁴ Ndooy siꞌ, luu bay takale na pakaradjaan kainu-inu ma yaꞌ luu bitsala tatammu man mahati. Boꞌ na, yaꞌ dari sinabbut meꞌ manusiyaꞌ.

⁵ Na siga pakaradjaan ma bay talingkaan lalla looy ilay siꞌ, pataꞌ binantug. Sugaꞌ pagka aku na lalla looy siꞌ, yaꞌ du ku doman magpabantug hāl meꞌ looy. Ituu du tu binantug meꞌ ku yana hāl yaꞌ luu kawasa ku ni dī ku.

⁶ Sugaꞌ bong siꞌ ku ilay bay doman magpabantug ni hāl ma bay pinalahil niyaku, san ku yaꞌ na magdupang-dupang ngalabihan bitsala batan yaꞌ ku mitsala bong saꞌ kabanahan. Sugaꞌ agak ku gi situ dī ku nuntut hāl ma bay pinalahil niyaku. Karomanan ku bong ku binantug, subay yaꞌ labi man ilooy ma bay tasakup jama ni jataꞌ ku.

⁷ Dari supaya ku yaꞌ takabbu sabapan jinisan pakaradjaan bay pinalahil meꞌ Tuhan niyaku, lay na Tuhan mabiya disu sosohoan Ibilis niksaꞌ aku. Boꞌ ndang ituu na situ kasanggalang niyaku meꞌ sapantun sisib njawom isi ku.

⁸ Min tallu na situ bay njunjung meꞌ ku nohoꞌ llakkahan ni Papuꞌ.

⁹ Sugaꞌ yaꞌ ku bay nduwan. Iya tampung na, “Mangasa jaꞌ ko ba ni aseꞌ-tabang ku. Mangkin na ina yaꞌ luu kawasa nu, mangkin tumatandaꞌ na basag kawasa ku njataꞌ nu.” Sangkon mas gāk gi ku magpabantug ni hāl yaꞌ luu kawasa ku. Batan tuktuk yaꞌ luu kawasa ku, patakka na baw kawasa Almasi ni jataꞌ ku.

¹⁰ Sangkon, magsuku na du ku san yaꞌ luu kawasa ku ni dī ku, san ku pinadiyoꞌ, nilaugan, sampay njawom katiksaan kalnaꞌ Almasi. Batan mangkin yaꞌ luu kawasa ku, mangkin na takka kawasa Almasi njataꞌ ku.

¹¹ Na man sabapan kadarihan bi, lay na ga ku talpaksaꞌ mōꞌ dupang ku magpabantug. Subay siꞌ bay ku dapitan bi tuktuk ku pinitnahan. Minsan yaꞌ luu pūs ku, yaꞌ baw tu ku samasakali tamban meꞌ sagannap ma buwat dī da subay ga rasul si Isa patingkat man kasohean.

¹² Bong siꞌ taintom bi bay jaman ku nnaa natasan kabinsanaan, tumatandaꞌ na pagkarasul ku. Batan jinisan pabuwatan kahaylan-haylan maka sipat kawasa Tuhan bay takita bi njataꞌ ku.

¹³ Sugaꞌ oy tu la bay dusa ku ningkaam taggahaꞌ yaꞌ na kam gakan aku? Napi ku ni dī ku, oy-oy bay pabuwat ku kalnaꞌ siga baanan sukuꞌ si Isa ni lahat sarī, meꞌ looy du meꞌ ku bay buwat kaam. Ilooy du pagbiddaan na, kuwan ningkaam, yaꞌ kam bay pakuhan ku hasil taggahaꞌ tiksaꞌ na baw kam sabapan ku. Na bong baw gantaan dari dusa niyaku meꞌ looy, ampunun bi lasa ku.

Aseꞌ si Pol ni sukuꞌ si Isa ndooy ni Korin

¹⁴ Batnaa tu, song pilu na ku ngandaꞌ-ngandaꞌ kaam. Bong itu ku bay tabawus, kamintallu tuu na situ ku nakka lahat bi. Sugaꞌ san baw tu ku mintu pilu, masi du ku yaꞌ maku hasil sabap kaam ya mehe niyaku, saꞌ ga sīn bi. Ndang-ndang saꞌ du sina sukuꞌ ga anak malanjaan induꞌ-mmaꞌ, arapun induꞌ-mmaꞌ ya subay malanjaan ga anak.

¹⁵ Gāk du situ ku magtuyuꞌ-tuyuꞌ kalnaꞌ kaam san gi man sīn ku katis sampay anggawtaꞌ ku bong pin sambu jaꞌ nyawa bi. Sugaꞌ tilaw ta teꞌ kam, meꞌ tuu na tamba-manamba na aseꞌ ku ningkaam, sikatuwaꞌ kina bong subay gi maglumba aseꞌ bi niyaku?

¹⁶ Sugaꞌ biyahun na luu, basta yaꞌ jaꞌ kam patiksaan ku pinakuhan hasil. Ilooy baw man ku jayip, baꞌ-bāꞌ kasohean, alistu ku konoꞌ ngandupang kaam supaya luu tahīs ku njataꞌ bi.

¹⁷ Doꞌ kam bi, sila ma bay sohoꞌ ku pilu maruhuꞌ, luu kilay bay pabuwat da man ku taawnan bay ngugut kaam?

¹⁸ Tasiguru ku, bong ilay ga si Taytus ka danganakan tabi ilooy disu ma bay sohoꞌ ku pilu mmeꞌ niiya, basta yaꞌ baw luu bay pabuwat da gantaꞌ man da mangan hāk bi. Ndang katoonan bi du bong inawnan si Taytus ka aku, sibuꞌ-sibuꞌ du arat kami maka saliꞌ-saliꞌ du kami mean kahandak Rū Sutsiꞌ.

¹⁹ Na kanna bi mareꞌ maksud ku nuwat meꞌ tuu man ku jaꞌ ngandapitan dī kami. Sugaꞌ siga kakasi ku, saꞌ sina meꞌ naa maksud ku. Meꞌ kami tu tibuuk ka Almasi, ilu na Tuhan pakale-kale, mimon pabuwat kami ka bitsala kami ningkaam, numbul satu maksud kami masambu nyawa bi.

²⁰ Ituu baw tu kahanggawan ku taggahaꞌ pag takka ku pilu, sarī holat ku, sarī na baw kadarihan bi. Boꞌ yaꞌ du sina mintu kam kamahapan bong subay na pin ku nahawi kaam. Ilooy kagampangan ku taggahaꞌ luu na pin kam nnaa sasaꞌ-manasaꞌ, sikadangkiꞌ-kadangkiꞌ, sikalasu-kalasu sampay yaꞌ ngaddoꞌ-ngaddoꞌ pa lassa. Maka gampang ku taggahaꞌ bbuwatan bi mitna, ngalimut, maglangkaw-langkawan sampay buwat kahiposan nnaa.

²¹ Bong ina sipais, meꞌ naa na pin kadarihan bi pag takka ku pilu, mehe meꞌ ku hinaꞌ pa Tuhan sabapan bi. Maka mehe sina mintu meꞌ ku magkasusahan bong luu gi nnaa yaꞌ gi bay nawbatan dusa da sampay masi buwat jinisan kalalamaan ka kasabuhan sampay kajinahan.