2 Korin 11 - Sabahagiꞌ Kitab Tawrat: Panagnaan ni Awwal Jaman maka Kitab Injil

Siga sukuꞌ si Isa subay iyakin ni siga jama ma mangaku rasul si Isa

¹ Batnaa, tatasan bi na doꞌ samantalaꞌ pakale niyaku ngakig jama dupang meꞌ ku mantug dī ku.

² Aku itu, meꞌ Tuhan na du sēng ningkaam. Batan meꞌ ku ka kaam, sibuꞌ du kam ka budjang bay pinagsitunang meꞌ ku ka disu lalla, yana Almasi. Sangkon subay kam jagahan ku paayad.

³ Ilooy kahanggawan ku, taggahaꞌ lay na baw kam mintu inakkahan meꞌ karuha jaman Sitti Hawa bay takoleꞌ inakkahan meꞌ sō mattoꞌ. Hanggaw ku taggahaꞌ takoleꞌ na baw kam pinagsian sampay man lungay na kasutsian bi ka hilas atay bi ngisbat Almasi.

⁴ Gampang ku la ningkaam. Bong luu jama pilu moo tōꞌ sarī pasal si Isa ma yaꞌ magbēꞌ ka tōꞌ kami, kuhi-kuhi jaꞌ kam pitsayaꞌ. Damikiyan, bong luu noan kaam pasal Rū Sutsiꞌ atawa pasal umanat mahap, kuhi-kuhi jaꞌ du kam pitsayaꞌ san yaꞌ sikatuwaꞌ tōꞌ da ka ningkami.

⁵ Sugaꞌ bistahan ku, san gi soy guru bi nnaa ma kanna bi rasul si Isa ninggi taꞌ mimon rasul, basta yaꞌ baw tu ku tamban leꞌ da.

⁶ Marean ta yaꞌ du situ ku pintal mitsala meꞌ sila, sugaꞌ ni hāl pangahati pasal Tuhan, basta yaꞌ baw tu ku tamban meꞌ da. Kaam pun ina, katoonan bi na du, batan lay na du takale bi tōꞌ ku.

⁷ Bay jaman ku noan kaam nnaa umanat mahap pasal Almasi, yaꞌ ku bay pingkaꞌ maku hasil. Bay jaꞌ ku magpadiyoꞌ para kaayaran ningkaam. Bong ningkaam, dari dusa kilay niyaku sukat ku yaꞌ bay maku hasil?

⁸ Halloman ku nnaa ni lahat bi, iya bay malanjaan aku yana siga baanan sukuꞌ si Isa man siga lahat sarī. Inaa ko ngawon, lay jaꞌ ku mangan hulas-sangsāꞌ da bong pin kam tatoan ku.

⁹ San ku bay kakatisan balanjaꞌ hallang-hallangan looy, yaꞌ du ku bay pingkaꞌ maku hasil mman bi, batan luu na baw bay takka siga danganakan tabi lakka man Masidunya bay nulung aku. Dari labba man sibuwa sampay batnaa, sabuli-buli ku naggaꞌ yaꞌ maku hasil bong pin yaꞌ jaꞌ kam sigpit sabapan ku. Damikiyan, sumawung-sumilan, masi du sina meꞌ naa meꞌ ku ka kaam.

¹⁰ Meꞌ aku itu disu jama mogbogan kabanahan pasal Almasi, kanaalla situ bitsala ku siꞌ. Basta yaꞌ baw sina luu san disu jama ni sikaliput Akaya kabāꞌ ngandustaꞌ ku bong sawpama ku magpabantug ni hāl meꞌ ku yaꞌ bay maku hasil mman bi.

¹¹ Ni bistahan bi, yaꞌ kina kam kaasean ku sukat ku yaꞌ koleꞌ tulung lakka mman bi? Katoonan Tuhan du sina bong pooy ehe aseꞌ ku ningkaam.

¹² Boꞌ darahan ku gi situ meꞌ ku yaꞌ maku hasil ningkaam. Meꞌ looy ilay, sagannap ma mangaku rasul si Isa nnaa yaꞌ luu dapat da ngabbu saula-ula sibuꞌ du pabuwatan da ka kami.

¹³ Sila ina rasul palsu. Pandoy sila ngandustaꞌ sampay buwat dī da subay ga rasul Almasi.

¹⁴ Sugaꞌ daa na kitabi haylan, batan Ibilis pun ina ngakka du sampay manyalupa gi pa malaikat nahayaꞌ na bahasa lakka man Tuhan.

¹⁵ Sangkon san tabi yaꞌ na haylan bong siga sosohoan Ibilis mangaku sosohoan Tuhan saula-ula matangge sila kaintongan. Sugaꞌ ngagad na sila, basta hinisab du sina sila ni bay kalaatan da.

¹⁶ Na kamura-murahan yaꞌ du kam luu mista aku jama dupang. Sugaꞌ bong sabagay luu, meꞌ bay halling sambat ku na siꞌ, tatasan bi na doꞌ pakale niyaku san ku magpabantug samantalaꞌ.

¹⁷ Kamasaꞌ bila ku tu magpabantug, saꞌ ga arat Papuꞌ Isa akig ku. Iya akig ku jama dupang.

¹⁸ Honaꞌ-honaꞌ ku, pagka meka nnaa ngakig arat jama ma mandang hāl junyaꞌ meꞌ da mantug pabuwatan da, akig ku na doꞌ sila samantalaꞌ.

¹⁹ Ndang-ndang ni katahaꞌ akka bi, tinagi jaꞌ du kam pakale ni siga jama dupang.

²⁰ Ndaꞌ ku, san kam binuwat meꞌ kasohean nnaa subay ga ata da sampay kinugut lagi, kuhi-kuhi jaꞌ kam. San sila ngandakag ka malangkaw dī da, sampay nampa luwa bi lagi, sinaggaan na sadjaꞌ meꞌ bi.

²¹ Bong bay aku meꞌ sila, tud iyaꞌ ku. Tud yaꞌ ku kasogsog buwat kaam meꞌ naa. Dari pagka ndang tigiꞌ du kam pakale ni jama nnaa ma bahani ngabbu, akig ku na doꞌ sila magdupang-dupang mitsala. Yaꞌ baw sina luu tapag-abbu meꞌ da ma yaꞌ tapag-abbu meꞌ ku.

Si Pol nabbut siga kamalasahiyan na kalnaꞌ Papuꞌ Isa

²² Bong pinag-abbu meꞌ da sila bangsa Hibrani, aku pun bangsa Hibrani du. Bong yuk da sila panubuꞌ si Israil ka Nabi Ibrahim, aku pun iyadu.

²³ Bong yuk da sosohoan Almasi sila, labi na aku. Na bong siꞌ itu yaꞌ talpaksaꞌ, subay ga ku jama yaꞌ luu honaꞌ-honaꞌ na magpabantug meꞌ tuu. Para na pin, bana du bitsala ku. Pooy-pooy jaꞌ ina meꞌ guru bi bay maghulas-sangsāꞌ kalnaꞌ Almasi, basta yaꞌ baw ina sila lumabi man aku. San du sila min dangoy bay tajīl kalnaꞌ iya, basta yaꞌ baw sina lumabi man niyaku. Maka bong ni hāl lagpiꞌ, basta min meka gi niyaku. Kansang gi ku nontongan kapatoy ku.

²⁴ Min lima na ku bay llagpiꞌ meꞌ siga Yahudi ma nguntra kami. Boꞌ lay lagi ikut da tabiat da ngalagpiꞌ min tallumpuꞌ-siyam sakayi labba.

²⁵ Min tallu na ku bay kinaka. Sakayi, lay gi ku pingkaꞌ pinagbaan-baanan hiniyak ka batu. Min tallu na ku bay kabahayān ni tangngaꞌ dilawut tumande taꞌ adjung. Sampay lay na ga ku pingkaꞌ dambahangi dangallaw magpilampung jaꞌ ni tangngaꞌ dilawut.

²⁶ Hangat ku ngalataan kalahat-lahatan masaplag, wā ku njawom bahaya. Lay na ga ku lumingkaꞌ njawom bahaya ngalintas sōng maka njawom bahaya meꞌ mundu ka njawom bahaya meꞌ bangsa ku mismu sampay meꞌ siga bangsa ma saꞌ Yahudi. Pa dile, pa dilawut sampay njawom daira, njawom bahaya na sadjaꞌ ku. Boꞌ lay gi ku tuwaꞌ bahaya leꞌ siga jama ma magbawuꞌ-bawuꞌ mmeꞌ ni Almasi.

²⁷ Min meka na situ ku bay lumingkaꞌ lamma banahan hangat magtuyuꞌ kalnaꞌ Tuhan. Daran ku bay pingkaꞌ yaꞌ tuli timpus dambahangi. Kansang gi ku bay naggaan lingantu sampay tohoꞌ kallong. Daran gi ku bay kakatisan balanjaꞌ sampay natasan tanne, boꞌ kulang pamakoy gi ku.

²⁸ Sarī man katiksaan baran ku, tiksaꞌ gi sampay pamiki ku llaw pa dangallaw ni kagampang ku ni siga baanan sukuꞌ si Isa sikamimon.

²⁹ Bong luu danganakan tabi yaꞌ basag pangando na ni si Isa, tud susa ku. Damikiyan, bong luu taboo magsiꞌ, paddi du pamiki ku.

³⁰ Ni hāl magpabantug, yaꞌ du situ ku tanam, sugaꞌ bong talpaksaꞌ, gam na ku magpabantug ni hāl gaos ku yaꞌ luu.

³¹ Bay bitsala ku ilay siꞌ, tud bana silay. Tasayu du sina meꞌ ilooy ma tawop pinudji saumu-umu, yana Tuhan, Mmaꞌ Papuꞌ tabi si Isa.

³² Batnaa tuntutan ta doꞌ kam disu waktu bay tumatandaꞌ yaꞌ luu gaos ku. Bay jaman ku ndooy ni Damaskus, luu ndooy gubnul ndiyoan Sultan Aretas lay bay magpanohoꞌ nganjagahan mimon lawang kutaꞌ daira looy supaya ku tasungkub pag pōꞌ ku.

³³ Lipara lay ku bay tinonton njawom bakaꞌ mehe man taꞌ panandawan kutaꞌ looy supaya ku kapalahi.