1 Yahiya 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Subay iyakin sukuꞌ si Isa ni guru palsu

¹ Siga kakasi ku, daa kam os-os pitsayaꞌ sukat jama mangaku bahasa tōꞌ na lakka man Rū Tuhan. Arapun pindogahan bi doꞌ duhuꞌ tōꞌ na mari katoonan bi bong mattan ya sosohoan Tuhan atawa niyaꞌ. Batan meka na sina guru palsu njawom junyaꞌ.

² Man bi ngila guru ma pinagmundaan meꞌ Rū Tuhan meꞌ tuu: Soysoy māꞌ si Isa Almasi yana Anak Tuhan bay dari manusiyaꞌ, tumatandaꞌ bana-bana ya sosohoan Tuhan.

³ Sugaꞌ sagannap ma nuwak kabanahan pasal si Isa, yaꞌ sina luu Rū Tuhan mman da. Pikilan da ina sibuꞌ du ka pikilan ilooy ma Tukang Nguntra Almasi. Man maruhuꞌ lagi, saꞌ ba, ndang bay na takale bi bbos-bbos luu takka disu Tukang Nguntra Almasi magsian jama? San pun batnaa, luu na du siga jama meꞌ karuha iya nguntra kabanahan pasal Almasi.

⁴ Boꞌ kaam ina, siga anak, sukuꞌ Tuhan na kam. Lay na sina kam tumanjataꞌ man siga guru palsu batan yaꞌ kam bay takoleꞌ pinagsian. Kon meꞌ looy sabap mas mehe gi kawasa Rū Tuhan ningkaam man kawasa Ibilis ma magbayaan siga jama ma saꞌ sukuꞌ Tuhan.

⁵ Boꞌ siga guru palsu ina, tabeꞌ ni sagannap ma saꞌ sukuꞌ Tuhan. Tōꞌ da ina lakka man akka manusiyaꞌ sadjaꞌ. Sangkon sagannap ma yaꞌ pitsayaꞌ ni si Isa tigiꞌ pakale ninsila.

⁶ Boꞌ kitabi baw tu, anak Tuhan na kitabi. Sangkon bong ina bana-bana jama toon Tuhan, mastiꞌ pakale jaꞌ ningkitabi. Sugaꞌ kuwan sagannap ma saꞌ sukuꞌ Tuhan, yaꞌ sina doman pakale ningkitabi. Dari inaa na sina man tabi mindoga bong soy pinagbayaan meꞌ Rū Sutsiꞌ ma malahil kabanahan maka soy pinagbayaan meꞌ Ibilis ma magsian jama.

Tabiat Tuhan yana maaseꞌ

⁷ Siga kakasi ku, subay kitabi sikaaseꞌ-kaaseꞌ sabap inaa tabiat Tuhan. Jama ma maaseꞌ ina, tarang-tarang anak Tuhan maka katoonan na Tuhan.

⁸ Soysoy yaꞌ maaseꞌ, tumatandaꞌ yaꞌ katoonan na Tuhan sabap tabiat Tuhan yana maaseꞌ.

⁹ Man Tuhan bay makitahan aseꞌ na ningkitabi meꞌ tuu: Lay papitu na Anak Tungga na pa junyaꞌ supaya luu na dapat tabi koleꞌ kaallum bahau njataꞌ na.

¹⁰ Na inawnan aseꞌ sabanna, saꞌ ga aseꞌ tabi pa Tuhan, arapun aseꞌ Tuhan ningkitabi. Batan atas na bay mapitu Anak na nohoꞌ nanggung mulkaꞌ ma subay siꞌ bay labuꞌ pa jataꞌ tabi. Dari puwas na dusa tabi maka lay na kitabi inampun meꞌ Tuhan.

¹¹ Na siga kakasi ku, pagka meꞌ naa aseꞌ Tuhan ningkitabi, subay du kitabi sikaaseꞌ-kaaseꞌ.

¹² Man awwal tagnaꞌ lagi yaꞌ luu manusiyaꞌ bay ngita Tuhan. Sugaꞌ bong ina kitabi sikaaseꞌ-kaaseꞌ, tumatandaꞌ tattog Tuhan njawom baran tabi. Maka njataꞌ tabi pasampay na na aseꞌ na ni manusiyaꞌ.

¹³ Na man sabapan Rū Sutsiꞌ bay dean Tuhan kitabi, tatantu tabi na tattog na kitabi ni Tuhan maka Tuhan pun tattog na du ningkitabi.

¹⁴ Kami situ mismu bay ngita Anak Tuhan. Sangkon kabāꞌ kami tud mawjud Mmaꞌ na bay mapitu iya nohoꞌ nalamat manusiyaꞌ.

¹⁵ Dari soysoy ina mangaku si Isa yana Anak Tuhan, malaingkan tattog Tuhan niiya maka iya pun tattog du ni Tuhan.

¹⁶ Kitabi itu, katoonan tabi maka manganna kitabi tud kinaasean kitabi meꞌ Tuhan. Na meꞌ halling sambat ku na siꞌ, tabiat Tuhan ina yana maaseꞌ. Sangkon soysoy ina tattap maaseꞌ, mastiꞌ tattog Tuhan niiya, maka iya pun tattog du ni Tuhan.

¹⁷ Bong ina tattap aseꞌ tabi ni manusiyaꞌ, tumatandaꞌ du tattap aseꞌ tabi pa Tuhan. Maka tatantu tabi na pag mintu taabut llaw hukuman, yaꞌ na luu katawuhan tabi sabap lay na taakig tabi tabiat si Isa ntuu ni junyaꞌ.

¹⁸ Bong kita maasean Tuhan ka pagkahi ta manusiyaꞌ, yaꞌ na sina luu tawu ta pa Tuhan. Ilooy ya ilay man jama tawu bong bistahan da luu pidjalaꞌ Tuhan ngagad sila. Sangkon soysoy tawu pinidjalaꞌ, tarang-tarang kulang meꞌ na maaseꞌ.

¹⁹ Kitabi itu maaseꞌ sabap Tuhan bay duhuꞌ maasean kitabi.

²⁰ Bong luu halling, “Maaseꞌ ku pa Tuhan,” boꞌ lammis baw ni pagkahi na manusiyaꞌ, malaingkan ngandustaꞌ ya. Batan bong ina ya yaꞌ pandoy maasean pagkahi na ma takita, labi na Tuhan saꞌ niyaꞌ kaasean na ma yaꞌ san takita.

²¹ Sangkon na, luu panohoan Almasi ningkitabi meꞌ tuu: Bong ina jama bana-bana maaseꞌ pa Tuhan, subay du ya maasean pagkahi na manusiyaꞌ.