1 Timuti 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Arat-tabiat pataꞌ ni siga pa-mmean sukuꞌ si Isa

¹ Timuti, ituu tu bitsala kanaalla: Bong luu doman magpa-mmean ni siga sukuꞌ si Isa, mahap du sina angan-angan na batan ntan meꞌ naa ina tud puntukan.

² Sangkon, bila kam meneꞌ pa-mmean, subay ya jama ma yaꞌ luu sutsutan njataꞌ na maka subay disu du nda na. Boꞌ na, subay ya jama pandoy ngagak dī na. Maka subay ya patong mamiki maka hatu. Subay ya pangahulmat maka alistu noan jama.

³ Subay ya yaꞌ palalango maka subay yaꞌ bangis. Gam pin subay lammaꞌ pangatayan na maka subay ya pandoy ngilagan pagjawapan. Maka subay ya yaꞌ magnapsu mulakab ni sīn.

⁴ Subay mahap meꞌ na magpandoy ni anak-nda na. Maka subay ya inasip sampay pinag-aratan meꞌ mimon anak na.

⁵ Batan bong ina ya yaꞌ pandoy magtakōk ni jama lumaꞌ na mismu, pooy meꞌ na pandoy magtakōk ni baanan pagkahi na sukuꞌ Tuhan?

⁶ Maka subay ya jama saꞌ bahau jaꞌ bay mmeꞌ ni Papuꞌ Isa, taggahaꞌ takabbu na baw ya sampay man na na baw mintu tuwaꞌ hukuman meꞌ karuha ilooy ma bay katuwaꞌ ni Ibilis.

⁷ Maka soysoy magpa-mmean, subay du mahap kawul-piil na sampay ni bandingan jama ma saꞌ sukuꞌ Papuꞌ Isa. Meꞌ naa ina, yaꞌ na luu man na tabitsala pa kalaatan sampay yaꞌ na luu lawang man na tadallot leꞌ Ibilis.

Arat-tabiat pataꞌ ni tukang nabang

⁸ Damikiyan, sagannap ma pineneꞌ binuwat tukang nabang ni siga pa-mmean, subay du hatu. Maka subay sila mmeꞌ ni lapa da. Damikiyan, subay du sila yaꞌ palalango atawa magnapsu mulakab ni sīn.

⁹ Subay sila tattap pitsayaꞌ ni kabanahan ma bay pinalahil meꞌ Tuhan ningkitabi. Maka subay sila yaꞌ buwat oy maka oy na ma nulang ni honaꞌ-honaꞌ da.

¹⁰ Sangkon Timuti, subay bay doꞌ duhuꞌ lliling arat-tabiat da. Bong hati tawop du sila, dari na sila binuwat tukang nabang.

¹¹ Damikiyan, kuwan nda tukang nabang, subay du hatu maka subay yaꞌ pandoy mitna. Subay ya pandoy ngagak dī na sampay taasahan buwat mimon ma sinukuꞌ niiya.

¹² Tukang nabang ina, subay disu du nda da maka subay mahap meꞌ da magpandoy ni anak da sampay ni mimon jama lumaꞌ da.

¹³ Na bong ina mintu kanaalla du sila ni mimon ma bay sinukuꞌ ninsila, malaingkan mahap jaꞌ awon da ni jama. Boꞌ na, pasōng na sina tawakka da mitsala pasal pangando da ni si Isa Almasi.

^14-15 Na Timuti, kainagon ku tu deꞌ-dēꞌ na ku kapilu pa mman nu, sugaꞌ mura situ lantan gi katakka ku pilu. Sangkon suwatan ta na jaꞌ doꞌ ko duhuꞌ supaya katoonan nu na arat-tabiat tawop ni sagannap ma ginalla jama lumaꞌ Tuhan. Awnan ku ilay siꞌ kitabi sikamimon ma pitsayaꞌ ni Almasi. Kitabi na situ ngantanan kabanahan ma bay hinalap meꞌ Tuhan sabanna ma llum saumu-umu ningkitabi. Dari sukuꞌ tabi itu nanggehan kabanahan ka nganjaga mari yaꞌ tabaluba.

¹⁶ Kabanahan ina ma kinapitsayaan meꞌ tabi, yaꞌ tapakilubaan, boꞌ tud kahaylan-haylan. Maruhuꞌ yaꞌ gi bay tahati meꞌ manusiyaꞌ. Pag batnaa, lay na pinalahil meꞌ Tuhan ningkitabi. Meꞌ tuu situ karuha na: Almasi ina bay dari manusiyaꞌ ntuu ni junyaꞌ. Maka iya ilay, luu na pin Rū Sutsiꞌ bay mōꞌ buktiꞌ bong soy ya. Boꞌ lay gi ya tinammuhan meꞌ siga malaikat. Awon na lay na pinasaplag pa kabangsa-bangsahan. Maka kinapitsayaan na ya meꞌ manusiyaꞌ ni sikaliput junyaꞌ. Boꞌ lay gi ya inangkat pa sulgaꞌ njawom kabantugan mehe.