1 Timuti 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na Timuti, luu situ tugun ku ma subay pasampay nu ni baanan sukuꞌ si Isa nnaa. Numbul satu, sohoun sila makuhan mimon manusiyaꞌ duwaa pa Tuhan supaya sila sinalamat. Maka sohoun du sila muwan pagsukuhan pa Tuhan sabap meꞌ na nalamat sila.

² Maka subay du pakuhan da duwaa siga sultan ka mimon ma ngantanan kawasa-kapatut marinta supaya yaꞌ luu kalingogan ni siga paglahat tabi, maka supaya sumunsayaꞌ na jaꞌ kitabi ngisbat Tuhan ka buwat kahandak na.

³ Mahap sina kitabi maku duwaa meꞌ naa. Boꞌ na, kasulut gi ni Tuhan, yana poonan kasalamatan tabi.

⁴ Kainagon Tuhan ina mimon manusiyaꞌ salamat sampay kahati ni kabanahan.

⁵ Kabanahan ina meꞌ tuu: Tuhan ina disu du. Damikiyan, disu du utusan ni antaraꞌ Tuhan ka manusiyaꞌ, yana si Isa Almasi, pagkahi tabi manusiyaꞌ.

⁶ Iya ilay, atas na bay nongan umu na supaya tatanggung na dusa manusiyaꞌ sikamimon mari sila kapaddus man hukuman ni dusa da. Boꞌ ituu na situ masa bay ginantaꞌ man umanat pasal iya pinasaplag.

⁷ Ituu situ kon ku bay pineneꞌ meꞌ Tuhan binuwat rasul na nohoꞌ masaplag umanat mahap ni siga bangsa saꞌ Yahudi. Toan ku sila supaya sila mangando ni si Isa Almasi ka pitsayaꞌ ni tōꞌ sabanna. Na pitsayaꞌ jama atawa niyaꞌ, basta kanaalla jaꞌ baw situ bitsala ku. Yaꞌ ku pandoy ngandustaꞌ.

Palbiatan si Pol ni kalallahan ka karandahan

⁸ Na nnoy-nnoy jaꞌ man sukuꞌ si Isa kumpo-kumpo numba Tuhan, tugun ku ni kalallahan, subay tatantu da sutsiꞌ na kawul-piil da boꞌ angkat da tangan da maku duwaa. Subay yaꞌ luu lasu da atawa laat atay da ni jama.

⁹ Kuwan siga karandahan, karomanan ku meꞌ da mamakoy subay pakayan basanayan ma yaꞌ kaiyaꞌ-iyaꞌ. Daa subay na pin meꞌ punu njawom atay da hāl lingkat dagbos da. Daa sila ngakig tabiat kasohean ma tigiꞌ magdanda-danda maka magmmas-mmas sampay matuk pamakoy hagaan.

¹⁰ Arapun ilooy ya pataꞌ pakutuꞌ da meꞌ da buwat kaayaran ni jama. Inaa ya sina arat tawop ni karandahan ma ngingat dī da ngisbat Tuhan.

¹¹ Maka bila luu na magnasihat ni baanan jamaa, kuwan karandahan, sapatut na, subay sila diyam-diyam jaꞌ pakale. Daa subay na pin sila magpandoy-pandoyan siga lalla ma noan sila.

¹² Bong aku, yaꞌ baw ku madari karandahan noan kalallahan ni langga atawa pun magtakōk ninsila. Subay sila diyam-diyam jaꞌ pakale.

¹³ Minsan bay jaman manusiyaꞌ bohoꞌ bay pinapayak, duhuꞌ du lalla bay pinapayak, yana Boꞌ Adam, boꞌ pasunuꞌ Sitti Hawa, binuwat limbang na ka tatabang na.

¹⁴ Boꞌ na, saꞌ du silay Boꞌ Adam bay inakkahan meꞌ Ibilis, arapun ma danda. Dari pag toklas na, iya bay duhuꞌ dari baldusa.

¹⁵ Inaa na sina kon karandahan kabisahan maddi. Sugaꞌ masi du baw ina sila salamat pa Tuhan bong yaꞌ du labbahan da pangando da ni si Isa, ka aseꞌ da, sampay kasutsian da ma tumatandaꞌ ni hatu kawul-piil da.