1 Timuti 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

1 TIMUTI

¹ Ituu itu aku, yana si Pol, disu rasul si Isa Almasi man panohoan Tuhan, yana poonan kasalamatan tabi maka man panohoan si Isa Almasi, yana pag-asa tabi.

² Itu suwat ku pa mman nu Timuti. Kau ina subay ga anak ku na rahasiyaꞌ sabap meꞌ ta dambuwaꞌ atay pitsayaꞌ ni Papuꞌ Isa. Kamura-murahan binuwanan na pin ko kasannangan ka timbang saltaꞌ na barakat meꞌ Mmaꞌ ta Tuhan ka Papuꞌ ta si Isa Almasi.

Siga jama ni Epesus ma mōꞌ tōꞌ palsu

³ Na Timuti, intomun bay halap ku ningkau waktu ku bay palakka man naa lān ku bay pitu pa Masidunya. Ngkon nu ilay bay sohoꞌ ku tamban nnaa ni Epesus supaya tasohoꞌ nu patagong sagannap ma mōꞌ tōꞌ palsu njawom baanan sukuꞌ si Isa. Sugaꞌ batnaa tu, luhud ku gi ngahalap ningkau pabalik.

⁴ Sohoun na sila patagong masensengan waktu da mitsala pasal siga pali-pali ka usuwan kabboꞌ-bboan. Siga hāl meꞌ naa ina yaꞌ luu kapuspusan na. Boꞌ na, inaa na sina poonan pagjawapan. Dari pada meꞌ naa, gam na sila mōꞌ tōꞌ ma katabang ni jama ngahati garaꞌ Tuhan pasal kasalamatan njataꞌ pangando ni si Isa.

⁵ Baan nu sila ngkon tabi noan jama umanat Tuhan supaya sila maasean pagkahi da manusiyaꞌ. Maaseꞌ ina, mastiꞌ takaya da jaꞌ bong sutsiꞌ niyat atay da, maka yaꞌ na sila buwat oy maka oy na ma nulang ni honaꞌ-honaꞌ da, maka bong sila kanaalla mangando ni si Isa Almasi.

⁶ Salla na, kasohean jama bong ni hāl meꞌ naa, yaꞌ san paruli da. Iya hagaan ninsila magbilmaarup ni hāl ma yaꞌ luu kapuspusan na.

⁷ Angan-angan da dari guru tanyag na sila ni saraꞌ agama. Salla na, yaꞌ san katoonan da bong oy maksud saraꞌ. Kanna da, katuwaꞌ na sila nōꞌ, boꞌ ko, niyaꞌ san.

⁸ Na Timuti, katoonan ta bong inawnan saraꞌ, mahap jaꞌ. Sat na jaꞌ, subay baw tuwaꞌ meꞌ makoy.

⁹ Tahati ta na bong inawnan saraꞌ Tuhan, saꞌ para ni jama intong. Arapun kon na ina bay pinamuwan man motang hukuman ni jama maat, ni sagannap ma yaꞌ pandoy ngasip, maka ni jama ma yaꞌ tawu pa Tuhan. Saraꞌ ina para ni siga baldusa, para sagannap ma yaꞌ sutsiꞌ, para jama ma yaꞌ ngisbat Tuhan, maka para sagannap ma mapatoy jama sampay ga mmaꞌ da atawa nneꞌ da.

¹⁰ Damikiyan, saraꞌ ina bay pinōꞌ man motang hukuman ni jama ma magjina, maka ni siga bantut sampay ni jama ma dagangan pagkahi da manusiyaꞌ binuwat ata. Damikiyan, saraꞌ ina para ni sagannap ma ngandustaꞌ, ma yaꞌ pabonto naksiꞌ, sampay sagannap ma buwat jinisan kalaatan sarī ma nulang tōꞌ sabanna.

¹¹ Inawnan tōꞌ sabanna ina, yana oy-oy tōꞌ ma magbēꞌ ka umanat mahap pasal si Isa Almasi. Boꞌ umanat mahap ina, malahil ehe kaayaran Tuhan ma tawop pinudji saumu. Boꞌ inaa na sina umanat ma bay hinalap niyaku nohoꞌ pinasaplag.

Timbang Tuhan ni si Pol

¹² Mehe meꞌ ku magsuku ni Papuꞌ ta si Isa Almasi ma nganggaosan aku buwat kahandak na. Magsuku ku niiya sabap lay na ku bilang na kanaalla sampay lay na ku peneꞌ na binuwat sosohoan na.

¹³ Lay ku peneꞌ na minsan ku bay pingkaꞌ malaat iya maruhuꞌ. Sarī gi, daran ku bay ngalaugan siga sukuꞌ na. Boꞌ yaꞌ luu pag-agak bila ku minsanaꞌ sila na. Lipara, yaꞌ du baw ku bay tuwaꞌ mulkaꞌ. Gam pin lay gi ku panimbangan Papuꞌ Isa, batan halloman ku yaꞌ gi bay pitsayaꞌ niiya, kalaatan bay pabuwat ku ni kaawam ku sadjaꞌ.

¹⁴ Tud biddaꞌ na sina ehe aseꞌ Papuꞌ ta si Isa Almasi! Bistahun doꞌ, lay gi bukaꞌ na puad ku pitsayaꞌ niiya. Sampay lay gi ku buwanan na aseꞌ ni pagkahi ku manusiyaꞌ!

¹⁵ Na ituu tu bitsala kanaalla ka pataꞌ kinanna meꞌ sikamimon: Maksud si Isa Almasi bay pitu pa junyaꞌ supaya tasalamat na siga baldusa. Man ku kasiguru, batan bong kinawnan baldusa, yaꞌ luu bay lumabi man aku.

¹⁶ San meꞌ looy, lay gi baw ku bay pinanimbangan meꞌ Tuhan. Dari man sabapan bay kadarihan ku, luu na pamintangan mehe ni jama man da mindoga bong pooy tahaꞌ pasensiya si Isa Almasi ni siga baldusa. Kamura-murahan ilooy na poonan da pitsayaꞌ na niiya sampay koleꞌ kasampulnaan nyawa ma yaꞌ luu katapusan na.

¹⁷ Pudji tabi Tuhan, yana Sultan Mahatinggi ma yaꞌ takita maka yaꞌ kuhi matoy. Magbayaꞌ ya ni sikamimon pangkat-mamangkat saumu batan isu-isu iya Tuhan. Kamura-murahan saumu-umu na ya binuwanan pudji mehe ka kabantugan. Amin.

¹⁸ Na Timuti, meꞌ kau sibuꞌ na ka anak ku, amay-amay mimon ma bay tugun ku siꞌ ningkau, pasampayun sa ni siga sukuꞌ si Isa nnaa. Ndang-ndang pabuwatan nu ina masampay kabanahan sikatuwaꞌ bana ka bay tunaꞌ siga pa-mmean sukuꞌ si Isa pasal kau. Bong ina tud kinanna du meꞌ nu bay tunaꞌ njataꞌ nu, inaa na sina buwansang mehe ningkau nulang kalaatan. Dari sibuꞌ du sina karuha nu ka sundalu basag ngatu njawom bonoꞌ mehe.

¹⁹ Njawom nu nulang kalaatan, subay wā hallot pangando nu ni Papuꞌ Isa. Maka ilagan nu mimon pabuwatan ma nulang ni honaꞌ-honaꞌ nu. Luu sina kasohean ma yaꞌ na maruli honaꞌ-honaꞌ da sampay man pangando da na ni Papuꞌ Isa langkat. Pangando da ina, bong ndalil pa adjung, lay na binasa bay lumangga ni manunggu.

²⁰ Meꞌ looy du silay kadari si Haymeneyus ka si Aleksandel. Sangkon lay na sila pa-ntan ku pa mman Ibilis. Dari pag taabut da mintu malasahi banahan, kawu-kawu magsiddik na sila buwat ilooy ma kadiyoꞌ ni awon Tuhan.