1 Pitel 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Halap si Pitel ni siga pa-mmean sukuꞌ Papuꞌ Isa

¹ Na kaam, siga pa-mmean baanan sukuꞌ si Isa, luu situ halap ku ningkaam batan aku pun disu pa-mmean meꞌ kaam du. Boꞌ bay gi ku kasakup ka mata ku ma duwa kabinsanaan njataꞌ Almasi. Maka meꞌ aku pun disu ma tabeꞌ ni kabantugan Almasi ni sinōng, junjung ku na ningkaam,

² basta ayaran bi banahan siga sukuꞌ Tuhan ma njawman bi. Ipatun bi sila paayad meꞌ karuha baanan bili-bili inayaran meꞌ tukang ngipat sila. Daa kam magmaksud ngayaran sila supaya meka sīn takoleꞌ bi atawa man sabapan bay jaꞌ kam llogos. Meꞌ bi ngayaran sila, subay man gasad bayaꞌ bi ni kagāk bi saltaꞌ na ni katagi bi nulut kahandak Tuhan.

³ Maka daa kam buwat sagannap ma njawman bi subay ga tindog bi, saula-ula kaam na papuꞌ da. Arapun subay kam makitahan sila kawul-piil ayad mari luu suntuan taakig da.

⁴ Meꞌ naa ina, koleꞌ jaꞌ sina kam mintu kabantugan ma yaꞌ kuhi baluba saumu yana tungbas ndean kaam ni katakka panghuluꞌ siga tukang ipat, yana Almasi.

⁵ Na kuwan kaam ma masi baddung, subay kam lillaꞌ ni siga matatoa ni baanan bi. Maka kitabi sikamimon subay magpadiyoꞌ saliꞌ-saliꞌ ni pagkahi tabi, batan yuk njawom kitab, “Kinuntra meꞌ Tuhan sagannap ma abbuhan, sugaꞌ tabangan na sagannap ma diyoꞌ pangatayan da.”

⁶ Sangkon, magpadiyoꞌ jaꞌ kam pa Tuhan Sangat Kawasa, boꞌ bi buwanan na kabantugan pag taabut masa bay ginantaꞌ meꞌ na.

⁷ Suhuran bi na mimon kasusahan bi pa Tuhan sabap hagaan kam niiya.

⁸ Iyakin kam maka papatong kam mamiki sabap Ibilis ina, yana banta bi, doman jaꞌ nasat supaya kam patatak man si Isa. Sibuꞌ du sina karuha Ibilis ka halimaw ngallong, parampong-parampong miha sabbatan na.

⁹ Sangkon subay tattap meꞌ bi mangando ni Papuꞌ Isa man bi naggaꞌ Ibilis. Ingatun bi, meka du sina pagkahi bi sukuꞌ si Isa ni sikaliput junyaꞌ tuwaꞌ kabinsanaan meꞌ ningkaam du batnaa.

¹⁰ Sugaꞌ pus bi bay natas samantalaꞌ njawom kabinsanaan, tinabang du sina kam meꞌ Tuhan. Pahallotan na sina pangando bi maka pinataggu meꞌ na iman bi supaya kam meꞌ karuha poon kayu ma yaꞌ kuhi habbaꞌ sabap lawom gamut na. Bistahun bi doꞌ, ni kaehe aseꞌ-tabang Tuhan, lay na kam liyun na pa jawom okoman na. Maksud na supaya kam tumabeꞌ ni kabantugan na man sabapan pagkatibuuk bi ka si Isa Almasi. Boꞌ kabantugan na ina yaꞌ luu katapusan na.

¹¹ Pudji tabi ya sabap tud tawop ya magbayaꞌ saumu-umu! Amin.

Katapusan bitsala si Pitel

¹² Na ni kapasal suwat tuu, luu situ bay sohoꞌ ku nuwatan bitsala ku, yana si Saylas, disu danganakan tabi kanaalla. Suwat tuu itu man ku mataggu iman bi maka man ku maintoman kaam pasal ehe aseꞌ-tabang Tuhan ningkaam mari kasengan bi.

¹³ Sarī man naa, luu situ ntuu ni Babilon siga pagkahi tabi ma pitsayaꞌ du ni Papuꞌ Isa lay nohoꞌ masampay salam duwaa da ningkaam. Meꞌ kaam du situ sila bay pineneꞌ meꞌ Tuhan. Si Malkus pun, ma binilang na meꞌ ku anak ku, lay du bay nohoꞌ masampay salam duwaa na ningkaam.

¹⁴ Na bila kam sitammu-tammu, jara-jara kam meꞌ ndang tabiat jama sikaaseꞌ-kaaseꞌ. Dambuli man naa, sikamimon kam ma tibuuk ka Almasi, kamura-murahan binuwanan na pin kam meꞌ Tuhan kasannangan njawom atay bi. Wassalam