1 Pitel 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Palbiatan ni siga karandahan ma llahan

¹ Na kuwan kaam karandahan, subay kam maglillaꞌ ni lla bi. Meꞌ naa ina, san sawpama lla bi nuwak umanat mahap pasal si Isa, balangkali taboo bi na sila pitsayaꞌ sabapan hāp arat-tabiat bi. Minsan ina kam yaꞌ na mitsalahan sila, kawu-kawu pitsayaꞌ na du sila ni si Isa

² pag takita da na hāp arat bi maka ehe maltabat bi pa Tuhan.

³ Daa subay na pin isu-isu lingkat bi ni poan pakutuꞌ bi meꞌ kasohean ma wā magdanda-danda ka matuk pamakoy hagaan sampay magmmas-mmas.

⁴ Arapun iya pakutuun bi, meꞌ bi malingkat njawom atay bi meꞌ sapantun magpadiyoꞌ sampay pahatu-hatu. Lingkat meꞌ naa ina yaꞌ na kuhi baluba. Boꞌ na, hagaan lagi banahan pa Tuhan.

⁵ Maka inaa na sina arat-tabiat bay pinakutuꞌ meꞌ karandahan ma mangando pa Tuhan mattoꞌ. Meꞌ da bay malingkat dī da, lay sila maglillaꞌ ni lla da.

⁶ Disu danda meꞌ looy ilay yana bay jaman Sitti Sara. Saꞌ ba, ngasip jaꞌ ya ni lla na, yana Nabi Ibrahim, sampay bay gi bilang na subay ga papuꞌ na? Na kaam karandahan ni batnaa, bong kam pauru ni hāp arat-tabiat Sitti Sara sampay yaꞌ kam kuhi takawum leꞌ tawu, malaingkan binilang na sina kam siga anak Sitti Sara.

⁷ Na bitsala tuu ma pasunuꞌ para ningkaam kalallahan. Subay kam pandoy mogbogan kasalassayan ka nda bi. Maka isbatun bi meꞌ bi nabangan sila batan yaꞌ sibuꞌ anggawtaꞌ da ka lalla. Magmaltabat kam ninsila, batan sibuꞌ-sibuꞌ du kam bay kapusakahan ladjikiꞌ man Tuhan, yana kasampulnaan nyawa saumu-umu. Bong ina yaꞌ mahap meꞌ bi buwat nda bi, malaingkan yaꞌ du kinabbul duwaa bi meꞌ Tuhan.

Siga sukuꞌ si Isa subay sikaaseꞌ-kaaseꞌ

⁸ Na dambuli man inaa, meꞌ kaam sukuꞌ si Isa sikamimon, subay kam dambuwaꞌ atay maka sikaddoꞌ-kaddoꞌ parasahan. Subay kam sikaaseꞌ-kaaseꞌ meꞌ karuha jama magdanganakan. Sipanimbang-panimbang kam maka subay diyoꞌ pangatayan bi saliꞌ-saliꞌ.

⁹ Sagannap ma buwat maat ningkaam, daa na tungbasan bi ka maat. Damikiyan, bong luu madiyoꞌ kaam, san daa na umbangan bi. Gam pin buwat gi kam kaayaran ninsila, batan ndang inaa sina kahandak Tuhan ningkaam. Bong siꞌ inaa bean tabi, mastiꞌ sinupaatan jaꞌ kitabi meꞌ Tuhan.

¹⁰ Meꞌ halling sambat njawom kitab, “Soysoy doman kaallum mahap ka doman njawom kagakan, subay niyaꞌ mitsala pagkahi na pa kalaatan maka subay ya yaꞌ ngandustaꞌ.

¹¹ Subay timanan na mimon kalaatan supaya isu-isu kaayaran pabuwat na. Maka subay pagbuli-bulihan na miha kasalassayan ka jama.

¹² Batan Tuhan ina ngayaran sagannap ma intong maka wā ya saddiya pakale ni duwaa da. Sugaꞌ bong kinawnan sagannap ma buwat maat, kinuntra meꞌ na.”

¹³ Na bong ina kam tigiꞌ buwat mahap, jalangan sina jama makaat kaam.

¹⁴ Sugaꞌ sawpama kam bay bininsanaꞌ sabap meꞌ bi paintong, mastiꞌ luu supaat Tuhan njataꞌ bi. Sangkon daa kam hanggaw atawa tawu ni manusiyaꞌ.

¹⁵ Arapun ituu ya kannahun bi: Almasi yana Papuꞌ bi. Sangkon isbatun bi ya. Maka bila luu nilaw kaam bong oy kamumpaatan hinolat meꞌ bi taggahaꞌ ilu na kam mmeꞌ ni Almasi, subay kam ndang wā saddiya ka tampung ayad.

¹⁶ Maka bila kam nampungan jama, subay bitsala hanunut-hanunut man bi magmaltabat ninsila. Maka ilagan bi buwat oy maka oy na ma nulang ni honaꞌ-honaꞌ bi. Meꞌ naa ina, bong luu bay mitsala kaam pa kalaatan, iyaꞌ jaꞌ sina sila pag takita da hāp tangge-tingkōꞌ bi njawman Papuꞌ Isa.

¹⁷ Sangkon, bong hati ginantaꞌ meꞌ Tuhan subay kam ngalingkaan kabinsanaan, gam na sabap ni kaintong bi; daa jaꞌ sabap meꞌ bi bay buwat maat.

¹⁸ Mamintang jaꞌ kam ni Almasi. San ya intong gi man intong, lay du ya bininsanaꞌ. Sampay lay na ga ya matoy sakayi labba du kalnaꞌ mimon baldusa pangkat-mamangkat. Lay na tanggung na mimon dusa tabi supaya kitabi mahap na pa Tuhan. Dari siꞌ, bay na pinapatoy jasad na, sugaꞌ lay na baw ya pinakallum ka jasad bahau ma yaꞌ na kuhi matoy.

¹⁹ Sugaꞌ sasang jasad na masi matoy, kuwan Rū na bay pilay pa tahanan siga nyawa pinalisu. Ndooy siꞌ, lay ya masampay umanat ninsila.

²⁰ Sila ilay siꞌ yana nyawa sagannap ma yaꞌ bay kuhi ngasip ni Tuhan ni jaman Nabi Nū buwat bahitlaꞌ. San tahaꞌ pasensiya Tuhan ngagad ga jama looy nawbat, yaꞌ du sila kuhi. Dari lay jaꞌ sila katis matoy leꞌ dunuk sampay lay na pinalisu nyawa da ni tahanan jama matoy. Ilooy du bay salamat wawuꞌ jama, yana ga Nabi Nū batan lay sila taꞌ bahitlaꞌ inangkat meꞌ boheꞌ dunuk.

²¹ Kasalamatan da ilay ni boheꞌ dunuk looy mattoꞌ, tadalil tabi pa boheꞌ man tabi bay pinandi tandaꞌ tabi lay na salamat man hukuman Tuhan. Kitabi ilay bay pinandi, saꞌ ga pandihan man ngalakkahan lumut ni baran tabi. Arapun pandihan tabi ina yana sipat lay na kitabi maku ampun man Tuhan mari hayang na pamiki tabi. Boꞌ kasalamatan tabi itu mawjud na batan lay na pinakallum pabalik si Isa Almasi.

²² Na si Isa ilay, lay na inangkat pa sulgaꞌ sampay luu na ya ni bihing Tuhan huwin pa kawnan. Ndooy ilay, iya magbayaan mimon malaikat ka mimon ma ngantanan kawasa-kapatut mahap-maat.