1 Pitel 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na pagka luu na kaallum bi bahau, timanan bi na mimon pabuwatan maat maka mimon dustaꞌ. Daa dan jinis bitsala bi, boꞌ sarī na baw pabuwat bi. Daa na kam dangkiꞌ atawa mitnahan pagkahi bi manusiyaꞌ.

^2-3 Pagka lay na takissa bi kaayaran Tuhan, kannahun bi na palman na. Yana meꞌ anak-anak bahau pinamaddihan magkainagon ni boheꞌ duruꞌ, kaam pun subay du meꞌ naa kainagon bi ni palman Tuhan. Batan palman Tuhan ina balanjaꞌ pulnaꞌ para ni nyawa bi. Sangkon kannahun bi na supaya magsasōng na pin meꞌ bi ngikut arat-tabiat Tuhan ngabut sampay magjatu na kasalamatan bi.

Si Isa meꞌ karuha pananggehan lumaꞌ Tuhan

^4-5 Na kitabi itu ma pitsayaꞌ ni si Isa ginalla lumaꞌ Tuhan sabap luu na Rū Tuhan bay pinaasok pa jawom atay tabi. Dari ko ngawon, kitabi itu meꞌ sapantun batu llum man Tuhan buwat lumaꞌ na. Kuwan si Isa, meꞌ sapantun batu lambu ma llum man lumaꞌ Tuhan pinatangge mari pagon. Sugaꞌ minsan ya hagaan saꞌ alang-alang sampay bay pineneꞌ meꞌ Tuhan, bay gi du ya tinuwak meꞌ manusiyaꞌ. Boꞌ kitabi baw itu, lay na kitabi nibuuk dī tabi ka iya. Pag toklas na, lay na kitabi dari siga imam sutsiꞌ. Dari yana meꞌ siga imam maruhuꞌ nongan kulban pa Tuhan, kitabi pun luu du songan tabi pa Tuhan, yana dī tabi buwat kahandak na. Boꞌ hinasi jaꞌ kitabi meꞌ Tuhan sabap lay na kitabi sinutsiꞌ meꞌ si Isa Almasi.

⁶ Na bitsala ku ilay siꞌ pasal si Isa magtuntun du ka palman Tuhan njawom kitab, ilooy ma yuk na, “Ndaun bi sa. Luu sina mintu batu lambu ma hagaan banahan bay peneꞌ ku binuwat pananggehan lumaꞌ ku. Nnaꞌ ku ya ndooy ni Zayon. Soysoy ina pitsayaꞌ niiya, yaꞌ luu masa na kaap-apan.”

⁷ Sangkon na ina, bong inawnan Almasi, mastiꞌ hagaan banahan ningkitabi ma pitsayaꞌ niiya. Boꞌ sagannap ma yaꞌ pitsayaꞌ, niyaꞌ san ya gunahan ninsila. Subay siꞌ mamintang doꞌ sila ni halling njawom kitab, ilooy ma yuk na, “Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.”

⁸ Maka luu gi suwat njawom kitab pasal Almasi, ilooy ma yuk na, “Iya na sina batu man jama sumantuk sampay habbaꞌ.” Na ngkon da ilay binilang sumantuk niiya sabap yaꞌ sila kuhi pitsayaꞌ ni umanat mahap pasal iya. Mingkan man maruhuꞌ lagi, ndang ilooy na bay ginantaꞌ ni soysoy yaꞌ pitsayaꞌ.

⁹ Boꞌ kaam ina ma pitsayaꞌ ni Almasi, lay na kam pineneꞌ meꞌ Tuhan binuwat baanan siga imam ka sultan njawman pamarinta na. Boꞌ lay gi kam pabuwat Tuhan bangsa sutsiꞌ ma inaku leꞌ na sukuꞌ na. Kahandak na masaplag na kam kaayaran na. Batan lay na kam pinōꞌ meꞌ na man jawom kalindoman, sampay lay na kam lliyun pa jawom karantaan na ma yaꞌ luu sibuꞌ sabanding na.

¹⁰ Sibuwa ilay, saꞌ gi kam sukuꞌ Tuhan, pag batnaa sukuꞌ na na kam. Maka sibuwa ilay, yaꞌ gi bay takissa bi aseꞌ Tuhan, pag batnaa lai na.

¹¹ Siga kakasi ku, junyaꞌ tuu itu saꞌ lahat tabi sabanna. Sampi jaꞌ kitabi ntuu. Sangkon junjung ku na ningkaam, daa na duwanun bi napsu maat ma pinaabak meꞌ jama ma nabiat mandang hāl junyaꞌ. Batan siga napsu meꞌ looy ilay, meꞌ karuha banta bi ma niksaꞌ nyawa bi.

¹² Tamūd ina, sagannap ma yaꞌ pitsayaꞌ ni si Isa mitsala kaam pa kalaatan san yaꞌ luu dusa bi. Sangkon, amay-amay subay kam mogbogan kawul-piil ayad ni pag-awpan da. Kawu-kawu bukaꞌ na puad da pitsayaꞌ hangat sila ngita hāp tangge-tingkōꞌ bi. Dari pag taabut masa man Tuhan marantaan pamiki da, pudji da na du sina ya.

Sukuꞌ Papuꞌ Isa subay maglillaꞌ ni siga pa-mmean parinta

¹³ Na ni kapasal mimon jama ma marintahan kaam, subay kam maglillaꞌ ninsila supaya kam kaboo kabantugan ni Papuꞌ Isa. Labba man sultan ma langkaw banahan kapatut na

¹⁴ pa siga gubnul sampay pa siga saraꞌ ndiyoan da, subay sila inasip meꞌ bi. Ndang-ndang sila ilay bay binuwanan kapatut para kaayaran du ni lahat supaya tapidjalaꞌ da sagannap ma buwat maat, maka supaya tabuwanan da kabantugan sagannap ma buwat mahap.

¹⁵ Kainagon Tuhan ina, sabapan kaayaran bi, tapampan bi na behe jama ma kulang akka mitsala kaam pa kalaatan ni kaawam da.

¹⁶ Kaam ina, lay na kam pinaddusan man mulkaꞌ Tuhan. Sugaꞌ daa jaꞌ buwatun bi kasumunsayaan bi subay ga katarangan man bi buwat kalaatan. Gam pin, bogbogan bi arat-tabiat ma ndang hinolat ni siga ata Tuhan.

¹⁷ Mag-arat kam ni mimon manusiyaꞌ maka maaseꞌ kam ni pagkahi bi ma pitsayaꞌ ni si Isa Almasi. Subay kam tawu pa Tuhan sampay magmaltabat ni panghuluꞌ ni lahat bi.

Palbiatan si Pitel ni siga ata

¹⁸ Kuwan kaam ma ata, mahap-maat meꞌ siga papuꞌ bi ka kaam, bong lammaꞌ pangatayan da atawa bangis, lillaꞌ jaꞌ kam ninsila. Maka magmaltabat kam ninsila.

^19-20 Meꞌ naa ina nulut kam ni kahandak Tuhan. Na bong sawpama luu laat bay pabuwat bi man bi pataꞌ pinidjalaꞌ, boꞌ tinatasan na jaꞌ meꞌ bi, daa na kam ngaholat sanglit man Tuhan. Sugaꞌ bong baw kam ina buwat jaꞌ kaayaran, boꞌ bi bininsanaꞌ lagi, bong ina lillaꞌ na jaꞌ kam sabap pasando jaꞌ kam pa Tuhan, ilooy ya nulut ni kahandak na.

²¹ Batan lay na kam bay lliyun meꞌ Tuhan pa jawom okoman na supaya kam buwat kaayaran san gi man bi bininsanaꞌ. Sangkon tusun bi na limpaꞌ Almasi ma bay natasan kabinsanaan kalnaꞌ kitabi.

²² Bistahun bi doꞌ, yaꞌ san ya bay buwat dusa samasakali. Dustaꞌ pun, yaꞌ du luu bay pōꞌ man jawom behe na san sakayi.

²³ San ya bay pinadiyoꞌ, yaꞌ du ya bay ngumbang. San ya bay bininsanaꞌ, yaꞌ du ya bay nanggup mawos. Gam pin, lay jaꞌ suhuran na pa Tuhan, yana huwis ma patingkat intong.

²⁴ Boꞌ lay gi paglillaꞌ na baran na llansang taꞌ tehang bong pin tatanggung na jaꞌ dusa tabi. Kon na buwat meꞌ looy supaya patagong na kitabi buwat dusa boꞌ tabi makutuꞌ meꞌ buwat kaintongan. Dari meꞌ halling njawom kitab, “Man sabapan siga bakat bisa ni baran na, kaulian na kitabi.”

²⁵ Maruhuꞌ, sibuꞌ du karuha bi ka siga bili-bili magsiꞌ. Boꞌ batnaa, lay na kam pabeleng pa mman tukang ngipat kaam, yana Almasi ma ngayaran nyawa bi.