1 Korin 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Pol mitsala pasal ehe hagaꞌ kapatoy si Isa

¹ Siga danganakan, taintom bi du sina jaman ku bay pilu masaplag umanat Tuhan ma yaꞌ lagi bay binakka maruhuꞌ. Yaꞌ situ ku bay pingkaꞌ makoy bitsala lawom, batan yaꞌ luu maksud ku mailo-ilohan jama ni kaalistu ku mitsala. Damikiyan, yaꞌ du luu maksud ku muhung binilang halul-akka.

² Batan ilooy du ilay bay hagaan niyaku bong pin tapasaplag ku jaꞌ umanat pasal Almasi sampay kapatoy na taꞌ tehang.

³ Aku ilay bay pilu masaplag, tud bay tabista ku du yaꞌ luu kawasa ku ni dī ku. Boꞌ agon mipig na ga ku ni kahanggaw ku, taggahaꞌ yaꞌ tapajatu ku pabuwatan ma bay hinalap meꞌ Tuhan niyaku.

^4-5 Aku ilay bay masaplag ka magnasihat nnaa, ndang katoonan bi na du, yaꞌ du ku bay makoy alat bitsala. Batan kahandak ku bong kam pitsayaꞌ, subay saꞌ man sabapan kapintal ku mitsalahan kaam. Arapun kainagon ku bong kam pitsayaꞌ, subay man sabapan siga sipat kawasa Tuhan bay tasakup bi maka sabapan Rū Sutsiꞌ bay mukaꞌ puad bi.

Kapandoyan Tuhan

⁶ Na kami tu, saꞌ baw ga yaꞌ na kami mōꞌ tōꞌ lawom. Batan tuktuk kami noan sagannap ma taggu iman da, mastiꞌ mōꞌ du kami. Sugaꞌ tōꞌ lawom ma pinasampay meꞌ kami saꞌ ga tōꞌ ma hagaan ni jama ma yaꞌ pitsayaꞌ ni si Isa. Maka saꞌ du tōꞌ ma hagaan ni siga pa-mmean ni junyaꞌ ma yaꞌ ngisbat Tuhan, yana sagannap ma yaꞌ luu kasongan da.

⁷ Arapun tōꞌ ma awnan ku itu yana pasal lawom akka Tuhan ka garaꞌ na ma yaꞌ gi bay pinalahil maruhuꞌ. Yaꞌ gi luu junyaꞌ, ndang luu na garaꞌ Tuhan matabeꞌ kitabi ni kabantugan na.

⁸ Sugaꞌ kuwan siga pa-mmean ma ngantanan kapatut ni junyaꞌ tuu, ndang awam sila ni garaꞌ Tuhan. Bong siꞌ ilay sila bay kasayu, yaꞌ bay sohoꞌ da nilansang taꞌ tehang Papuꞌ tabi ma yaꞌ luu sibuꞌ sabanding na.

⁹ Kahapan, sabapan kapatoy na, lay na bukisan Tuhan lawang man manusiyaꞌ koleꞌ jinisan supaat. Boꞌ magbēꞌ bana ka bay tunaꞌ njawom kitab, ilooy ma yuk na, “Luu siga supaat ma ndang bay hinalliꞌ meꞌ Tuhan ni sagannap ma maaseꞌ niiya. Siga supaat looy ilay yaꞌ gi bay pingkaꞌ takita maka yaꞌ gi bay takale sampay yaꞌ san bay taingat meꞌ pamiki manusiyaꞌ.”

¹⁰ Na siga supaat looy ilay siꞌ, lay na pinalahil meꞌ Tuhan ningkitabi man tabang Rū Sutsiꞌ muwanan kitabi pangahati. Batan katoonan Rū Sutsiꞌ mimon-mimon. Minsan hāl ma sinipuk banahan njawom atay Tuhan, katoonan na du.

¹¹ Yana meꞌ ilooy njawom pamiki tabi yaꞌ kinatoonan meꞌ manusiyaꞌ sarī man dī tabi, damikiyan, yaꞌ du luu toon njawom pamiki Tuhan sarī man Rū na.

¹² Boꞌ inaa na sina Rū ma bay pinaasok ningkitabi. Sabapan na, yaꞌ na sibuꞌ pamiki tabi ka siga jama ma mandang hāl junyaꞌ. Kon na ilay bay ndean supaya tahati tabi na siga supaat ma bay pamuwan Tuhan ningkitabi ni kaehe aseꞌ na.

¹³ Dari pag taabut kami masaplag, yaꞌ kami makoy bitsala ma bay ginuru lakka man manusiyaꞌ. Arapun iya pakoy kami yana bitsala ma lakka man Rū Sutsiꞌ.

¹⁴ Sugaꞌ sagannap ma yaꞌ pitsayaꞌ ni Almasi, yaꞌ sila doman pakale ni tōꞌ lakka man Rū Sutsiꞌ sabap kaawran sila kahati. Bong ninsila, karupangan jaꞌ. Yaꞌ tahati da hāl Tuhan sabap yaꞌ luu Rū na njawom atay da muwanan sila pangahati.

¹⁵ Boꞌ kitabi itu ma luu na Rū Sutsiꞌ njawom atay tabi, mastiꞌ tahati tabi jaꞌ mimon ma pinalahil meꞌ Rū Sutsiꞌ ningkitabi. Salla na, yaꞌ kitabi tahati meꞌ sagannap ma yaꞌ luu Rū Sutsiꞌ ninsila.

¹⁶ Meꞌ halling sambat njawom kitab, “Soy toon njawom pamiki Tuhan? Soy kapagpandoyan iya?” Boꞌ kitabi itu, katoonan tabi bong oy njawom pamiki na batan sabapan Rū Sutsiꞌ, luu na ningkitabi pamiki Almasi.