1 Korin 15 - Sabahagiꞌ Kitab Tawrat: Panagnaan ni Awwal Jaman maka Kitab Injil

Umanat mahap pasal Almasi pinakallum pabalik

¹ Na siga danganakan, katoonan ku du tud hilas kam bay pitsayaꞌ ni umanat mahap ma bay pasaplag ku ningkaam. Boꞌ masi du bean bi ngabut sampay batnaa. Sugaꞌ paintoman ta doꞌ kam isi umanat mahap

² batan inaa sina poonan bi salamat, basta yaꞌ jaꞌ labbahan bi. Bong ina labbahan bi, yaꞌ du luu kapuspusan bi bay pitsayaꞌ.

³ Kaam ina, ndang lay na pasampayan ku siga tōꞌ ma hagaan banahan ni umanat mahap ma bay pinalahil niyaku. Duhuꞌ, yana si Isa Almasi bay nongan umu na supaya tatanggung na dusa tabi, meꞌ ndang bay tinunaꞌ njawom kitab.

⁴ Ni kaduwa na, lay na ya kinubu. Pag taabut ni katallu ngallaw, lay na ya pinakallum. Boꞌ sikatuwaꞌ bana ka ilooy ma bay tinunaꞌ njawom kitab.

⁵ Pag-anu, llum jaꞌ siꞌ ya pabalik, lay gi ya patammu ni si Pitel, boꞌ na bay nammuhan siga rasul na ilooy kasohean.

⁶ Paddus mandooy, lay gi ya patammu ni baanan siga danganakan tabi labi lima hatus eka da. Sila ilay siꞌ, agon masi gi llum sikamimon ngabut sampay batnaa. Sugaꞌ luu du baw kasohean, lay na duhuꞌ-duhuꞌ.

⁷ Pag-anu, lay na baw ya patammu ni si Yaꞌkub, boꞌ na patammu pabalik ni siga rasul na sikamimon.

⁸ Dambuli banahan, bay tammuhan na, yana aku na situ. Boꞌ na, meꞌ ku bay dari rasul na, tud bay ag-agan maka talkadjut. Aku itu meꞌ sapantun anak-anak bay pinamaddihan yaꞌ gi sukup buwan na.

⁹ Meꞌ ku ngingat, aku na pinakadiyoꞌ ni rasul si Isa sikamimon. Yaꞌ san ku tawop inawnan rasul na sabap bay ku ngalaugan sagannap ma pitsayaꞌ niiya.

¹⁰ Sugaꞌ san meꞌ looy, lay gi ku dari rasul man sabapan aseꞌ Tuhan niyaku. Boꞌ aseꞌ na ina yaꞌ du bay pasensengan ku sabap labi gi tuyuꞌ ku maghulas-sangsāꞌ kalnaꞌ si Isa man mimon pagkahi ku rasul na. Sugaꞌ saꞌ du baw silay ni kabasag gaos ku, arapun man gaos Tuhan ni jataꞌ ku.

¹¹ Kamasaꞌ, saꞌ baw tu ga mehe niyaku bong soy kami basag banahan masaplag. Ilooy ya hagaan banahan niyaku, basta lay jaꞌ kami kapasaplag sampay lay na kam pitsayaꞌ ni umanat kami.

Sukuꞌ si Isa pinakallum pabalik

¹² Na jaman kami bay masaplag umanat mahap pasal Almasi ningkaam, saꞌ ba, bay halling kami, pus Papuꞌ Isa bay pinapatoy, lay na ya pinakallum pabalik? Pagka meꞌ looy, ongoy baw taggahaꞌ luu gi kasohean kam nnaa māꞌ yaꞌ luu masa jama ma lay na matoy pinakallum pabalik?

¹³ Uy! Bong bilay bana jama matoy yaꞌ na pinakallum, malaingkan sampay Almasi yaꞌ na du bay pinakallum.

¹⁴ Maka bong ilay siꞌ Almasi yaꞌ bay pinakallum, senseng jaꞌ sangsāꞌ kami masaplag. Boꞌ na, pangando bi pun niiya yaꞌ du luu pūs na.

¹⁵ Maka bong siꞌ ilay bana jama matoy yaꞌ na pinakallum pabalik, malaingkan dustaꞌ jaꞌ bitsala kami pasal Tuhan. Batan bbuwatan kami māꞌ Tuhan bay makallum Almasi.

¹⁶ Dari meꞌ halling sambat ku na siꞌ, bong ilay jama matoy yaꞌ na pinakallum pabalik, malaingkan sampay Almasi yaꞌ na du bay pinakallum pabalik.

¹⁷ Maka bong siꞌ ilay mattan Almasi yaꞌ bay pinakallum pabalik, meꞌ halling sambat ku na siꞌ, yaꞌ du luu pūs pangando bi niiya maka masi du yaꞌ puwas dusa bi.

¹⁸ Boꞌ na, bong siꞌ ilay bay mawjud meꞌ looy, malaingkan siga danganakan tabi sukuꞌ Almasi pun ma lay na matoy, yaꞌ na du luu katimbuhan nyawa da.

¹⁹ Sarī gi, bong bana yaꞌ du luu taholat meꞌ tabi njataꞌ Almasi paddus man kaallum tabi ntuu ni junyaꞌ, malaingkan yaꞌ luu manusiyaꞌ ni junyaꞌ tuu kaluuy-luuy labi man kitabi.

²⁰ Sugaꞌ ni sabana na, lai na silay Almasi pinakallum pabalik. Na pagka iya bay duhuꞌ-duhuꞌ pinakallum pabalik, inaa na buktiꞌ mimon sukuꞌ na ma lay na matoy pinakallum du pabalik bbos-bbos.

²¹ Na manusiyaꞌ ina, kon da matoy, sabapan pabuwatan disu jama, yana Boꞌ Adam. Damikiyan, kon tabi pinakallum pabalik, sabapan pabuwatan disu jama du, yana Almasi.

²² Dan jinis meꞌ halling, yana meꞌ tabi sikamimon matoy sabap meꞌ tabi panubuꞌ Boꞌ Adam, damikiyan, pinakallum du kitabi pabalik sabap meꞌ tabi tibuuk na ka Almasi.

²³ Sugaꞌ hāl meꞌ tabi pinakallum itu, luu kitabi ka ira tabi. Almasi doꞌ bay duhuꞌ pinakallum, boꞌ pasunuꞌ sukuꞌ na pag takka na.

²⁴ Pus meꞌ looy, pina-ntan na meꞌ Almasi pamarinta na pa mman Mmaꞌ na Tuhan. Sugaꞌ subay lay doꞌ duhuꞌ katis talloban Almasi mimon banta na, yana mimon kawasa-kapatut ka ga panghuluꞌ ma naggaꞌ pamarinta na.

²⁵ Batan ndang bay ginantaꞌ meꞌ Tuhan subay Almasi marinta ngkod-ngkoran yaꞌ gi katis inannaꞌ mimon banta na ndiyoꞌ pāt battis na.

²⁶ Na banta na ina ma dambuli tinalloban, yana kapatoy.

²⁷ Boꞌ magbēꞌ du bana ka suwat njawom kitab, ilooy ma yuk na, “Mimon-mimon inannaꞌ meꞌ Tuhan ndiyoan kawasa Almasi.” Sugaꞌ ni ayat looy ilay, subay tallak ningkitabi yaꞌ baw lay tabeꞌ Tuhan ni diyoan kawasa Almasi. Batan kawasa-kapatut ma luu ni Almasi, Tuhan mismu bay ngandean.

²⁸ Pag katis jaꞌ ina mimon-mimon inannaꞌ ndiyoan kawasa Almasi, pina-ntan na meꞌ Almasi dī na ndiyoan kawasa Tuhan supaya Tuhan sa patingkat langkaw magtakōk ni mimon-mimon.

²⁹ Balik ta pa hāl jama llum pabalik. Bong ilay bana jama ma lay na matoy yaꞌ na pinakallum, oy sabap kasohean nohoꞌ pinandi para pagkahi da ma lay na matoy? Oy pus da buwat meꞌ looy bong yaꞌ na du pinakallum pabalik siga pagkahi da?

³⁰ Maka kami pun itu, oy tud kami subay lagi narapan umu kami mitsalahan jama nohoꞌ mmeꞌ ni Almasi bong mattan jama matoy yaꞌ na du pinakallum?

³¹ Baan ta kam banahan, llaw-llaw situ ku nontongan kapatoy. Kanaalla situ bitsala ku. Subay yaꞌ bana kagakan ku ni pagkatibuuk ku ka Papuꞌ tabi si Isa Almasi, boꞌ yaꞌ bana bay bitsala ku.

³² Ntuu tu ni Epesus, tandaꞌ ehe duga jama niyaku, subay ga sila baanan sattuwa tawun meꞌ da bay magkanaman aku. Na bong mattan yaꞌ du luu masa jama pinakallum pabalik, oy tud ku amu-amu masaplag? Gam na tagongan ku, boꞌ ku mmeꞌ ni sagannap ma magsambatan, “Tu kam. Nginum-mangan jaꞌ kitabi maglami-lami, taggahaꞌ matoy na kitabi sumawung.”

³³ Sugaꞌ daa kam ngandupang dī bi ngakig pamiki meꞌ looy. Arapun ituu kannahun bi: Bong ina tabi samod ka jama maat, song hallom kalakkotan du tabi meꞌ kadarihan da.

³⁴ Sangkon, mamiki doꞌ kam paayad. Pakutuun bi na kaintongan maka tagongan bi na meꞌ bi buwat dusa. Batan kaam ina nnaa ma amu-amu buwat dusa, tumatandaꞌ na masi gi kam awam pasal Tuhan. Kon ku halling meꞌ tuu mari kam iyaꞌ.

Karuha baran jama ma pinakallum pabalik

³⁵ Na adakala luu na baw nilaw, “Pooy meꞌ Tuhan makallum jama matoy? Pooy bantuk baran tabi pag taabut tabi pinakallum pabalik?”

³⁶ Na jama ma nilaw meꞌ looy ilay, yaꞌ san bay pakoy da honaꞌ-honaꞌ da. Subay siꞌ mindoga doꞌ kam ni karuha bigi tinanom. Yaꞌ sina tomoꞌ bong yaꞌ doꞌ bay duhuꞌ llabbong, boꞌ tinambunan meꞌ kadari jama matoy.

³⁷ Pamintangan bi na bigi gandum. Bila ina bay na tinanom, pag tomoꞌ na, mehe na pagbiddaan bantuk na ka jaman na bay llabbong.

³⁸ Pag sangkad na, luu na ya ka bantuk ma ndang bay ginantaꞌ meꞌ Tuhan niiya. Maka mimon jinisan bigi, kaniya-kaniya ka hantang na pag sulig da.

³⁹ Damikiyan, meꞌ looy du silay karuha siga balnyawa ntuu ni junyaꞌ. San sila sibuꞌ-sibuꞌ balnyawa ma luu lahaꞌ da ka isi da, magjinisan du baran da. Luu manusiyaꞌ, kahayop-hayopan, siga manuk-manuk ka daying, boꞌ yaꞌ sibuꞌ-sibuꞌ baran da.

⁴⁰ Maka sarī man jinisan baran ntuu ni junyaꞌ, luu du jinisan baran taꞌ langit. Boꞌ yaꞌ du sibuꞌ lingkat siga baran taꞌ langit ka siga baran ntuu ni junyaꞌ.

⁴¹ Boꞌ na, siga baran taꞌ langit ina, yaꞌ du sibuꞌ sahayaꞌ da. Sahayaꞌ mataallaw yaꞌ sibuꞌ ka sahayaꞌ buwan. Siga potean pun, sarī du sahayaꞌ da, boꞌ kaniya-kaniya du ka jinisan sahayaꞌ da.

⁴² Dari yana meꞌ siga baran taꞌ langit lawak pagbiddaan na ka siga baran ntuu ni junyaꞌ, damikiyan, meꞌ naa du sina pagbiddaan baran tabi ma kuhi gi matoy ka baran tabi ma llum saumu-umu. Kuwan baran tabi ma kuhi gi matoy, pag llabbong, ngahansu. Sugaꞌ taabut tabi pinakallum, luu na baran tabi ma yaꞌ na kuhi matoy saumu-umu.

⁴³ Baran tabi itu ma llabbong, sallahan maka kulang basag. Sugaꞌ pag taabut tabi ina pinakallum, luu na baran tabi ma sukup kabantugan ka kawasa.

⁴⁴ Maka baran tabi itu ma llabbong, yana baran biyasa ma mandang ni hāl junyaꞌ. Sugaꞌ pag taabut tabi ina pinakallum, luu na baran tabi ma tattap mandang hāl Tuhan. Batan tiyap-tiyap ina luu baran ma mandang ni hāl junyaꞌ, mastiꞌ luu du baran ma mandang ni hāl Tuhan.

^45-47 Baran biyasa ina, ilooy ma luu isi na ka lahaꞌ na, luu bay sinuwatan njawom kitab bong pooy meꞌ na bay pinapayak. Baran sibuwa ina yana tanaꞌ bay pinabuwat meꞌ Tuhan lalla, boꞌ na bay pinakallum. Boꞌ ilooy na silay Boꞌ Adam ma ginalla Adam Sibuwa lakka man tanaꞌ junyaꞌ. Sugaꞌ hallom maka hallom na, luu na baw bay lahil Adam ni kaduwa, ginalla Adam Dambuli yana Almasi lakka man sulgaꞌ. Boꞌ luu gi sina pagbiddaan da mehe, batan Adam Sibuwa ilay bay binuwanan kaallum. Boꞌ Adam Dambuli, lay ya dari Rū ma muwan kaallum ma natas saumu-umu. Sangkon, ndang mastiꞌ luu doꞌ duhuꞌ baran ma mandang ni hāl junyaꞌ, boꞌ pasunuꞌ baran ma mandang ni hāl Tuhan.

⁴⁸ Pagka meꞌ looy, yana meꞌ mimon manusiyaꞌ nutu lalla looy ma bay pinapayak lakka man tanaꞌ, damikiyan, sagannap ma sukuꞌ Tuhan nutu na lalla looy ma bay lakka man sulgaꞌ.

⁴⁹ Dan jinis meꞌ halling, sibuwa arat-tabiat lalla looy ma bay pinapayak lakka man tanaꞌ tutu tabi. Pag batnaa, arat-tabiat lalla looy na ma lakka man sulgaꞌ tutu tabi.

⁵⁰ Siga danganakan, hantak bitsala ku ilay siꞌ, baran tabi itu ma luu isi na ka lahaꞌ na, yaꞌ luu lamud na ni pamarinta Tuhan. Batan baran tabi itu ma kuhi gi matoy sampay ngahaluꞌ, yaꞌ luu kabigiꞌ-bigian na ni hāl ma yaꞌ luu masa na.

⁵¹ Batnaa baan ta doꞌ kam hāl ma yaꞌ gi bay pinalahil meꞌ Tuhan maruhuꞌ. Ni katakka Almasi ina bbos-bbos, kasohean sukuꞌ na yaꞌ gi bay matoy, sugaꞌ mimon kitabi, ma llum ma matoy, pinabahauwan na.

⁵² Ilooy ilay mintu binakbul meꞌ looy sakayi mata pakiraw du, magsabtan ka tabuliꞌ ma dambuli tiniyup. Kuwan mimon sukuꞌ Almasi ma ndang lay na matoy, pinakallum na pabalik sampay luu na baran da bahau. Boꞌ yaꞌ na kuhi matoy maka yaꞌ na kuhi ngahaluꞌ. Kuwan sagannap ma masi llum, pinabahauwan na du baran da.

⁵³ Batan baran tabi itu ma kuhi gi matoy sampay ngahaluꞌ mastiꞌ ginantian na ka ilooy ma yaꞌ na kuhi matoy ka yaꞌ na ngahaluꞌ saumu-umu.

⁵⁴ Dari pag ina mintu luu na baran tabi ma yaꞌ kuhi matoy, bohoꞌ na sina mintu binakbul na suwat njawom kitab, ilooy ma yuk na, “Lay na ā kapatoy.

⁵⁵ Yaꞌ na luu dapat na makaat kitabi. Sampay yaꞌ na luu kawasa na njataꞌ tabi.”

⁵⁶ Na kon ilay manusiyaꞌ matoy sabapan dusa. Ilooy man da yaꞌ kailag buwat dusa sabapan saraꞌ. Batan tiyap-tiyap luu saraꞌ, mastiꞌ tomoꞌ jaꞌ napsu manusiyaꞌ ngalangga.

⁵⁷ Sugaꞌ mehe meꞌ tabi magsuku pa Tuhan sabapan pabuwatan Papuꞌ tabi si Isa Almasi. Sabapan Papuꞌ Isa, tumanjataꞌ jaꞌ kitabi man dusa sampay kapatoy.

⁵⁸ Sangkon siga danganakan ku, kakasi ku, pahallotun bi pangando bi ni Papuꞌ Isa maka daa kam kuhi pinagsian. Gam pin pakutuun bi meꞌ bi maghulas-sangsāꞌ kalnaꞌ iya. Ndang-ndang katoonan bi na du, yaꞌ du senseng oy-oy pabuwat bi kalnaꞌ iya.