1 Korin 14 - Sabahagiꞌ Kitab Tawrat: Panagnaan ni Awwal Jaman maka Kitab Injil

Palbiatan si Pol pasal ladjikiꞌ lakka man Rū Sutsiꞌ

¹ Siga danganakan, pakutuun bi na meꞌ bi sikaaseꞌ-kaaseꞌ. Maka subay kam magkainagon banahan ni siga kapandoyan bilang ladjikiꞌ ma lakka man Rū Sutsiꞌ, labi na hāl kapandoyan masampay siga umanat ma pinalahil meꞌ Rū Sutsiꞌ.

^2-4 Kaam ina, katoonan ku meka kam doman kaladjikian mitsala ni siga pallun ag-agan ma yaꞌ san bay pingkaꞌ kapandoyan bi. Sugaꞌ soysoy ina mitsala ni pallun ag-agan, isu-isu nyawa da dī da pasambu da. Saꞌ sina ga manusiyaꞌ pakalehan da. Iya pakalehan da, yana Tuhan, batan isu-isu iya kahati ni bitsala da. Sangkon, gam na kam magkainagon kaladjikian masampay siga umanat man Rū Sutsiꞌ sabap kasambu ni nyawa sikamimon ni baanan bi. Boꞌ na, ladjikiꞌ meꞌ naa ina mataggu iman pagkahi bi lagi sampay magamgaman atay da.

⁵ Sugaꞌ yaꞌ baw tu ku kabāꞌ ga yaꞌ luu guna na mitsala ni siga pallun ag-agan. Gam pin kainagon ku mimon kam nnaa kaladjikian mōꞌ siga pallun meꞌ looy. Sat na jaꞌ, mas mehe tabang ni baanan bi bong kam kaladjikian masampay siga umanat man Rū Sutsiꞌ. Kamasaꞌ, bong baw ina luu du kam nnaa kaladjikian muwan maana ni siga pallun ag-agan, malaingkan kasambu du ni nyawa sikamimon njawom baanan bi.

⁶ Siga danganakan, bong sawpama bay ku pilu, boꞌ bbuwatan ku mitsala ni siga pallun ag-agan, pooy meꞌ bitsala ku katabang ni baanan bi? Sugaꞌ bong ina ku makoy pallun tabi mismu man ku masampay umanat ma bay pinalahil meꞌ Rū Sutsiꞌ niyaku, mastiꞌ katabang jaꞌ sina ningkaam. Damikiyan, bong ku makoy pallun tabi mismu man noan kaam ilooy ma katoonan ku pasal Tuhan atawa pun magnasihat, mastiꞌ katabang jaꞌ du sina ningkaam sikamimon.

⁷ Boꞌ kaam ina ma kaladjikian mitsala ni siga pallun ag-agan, bong yaꞌ du luu ni baanan bi tukang muwan maana, yaꞌ du katabang. Sibuꞌ du karuha bi ka suling tiniyup saꞌ biddaꞌ atawa biyulla kinehet saꞌ biddaꞌ. Batan bong ina yaꞌ du tahilaliꞌ laggoꞌ na, oy pūs na?

⁸ Sibuꞌ du sina karuha bi ka tabuliꞌ tiniyup saꞌ biddaꞌ man ninyalan siga sundalu ni bonoꞌ mehe. Dari pagka yaꞌ tahilaliꞌ da halling na, yaꞌ tasinyal da bong sila nohoꞌ pasōng atawa pasuhut.

⁹ Kaam pun ina, bong kam mitsala, boꞌ saꞌ du ni pallun ma tahati, oy takoleꞌ-koleꞌ pagkahi bi? Bitsala bi ina sibuꞌ du ka baliyu pingkaꞌ jaꞌ ni tinga jama.

¹⁰ Na ni junyaꞌ tuu itu, meka jinisan pallun. Maka labbasakayi luu jaꞌ sina ka hatiyan da.

¹¹ Sugaꞌ bong sabagay luu disu pagkahi ku bay mitsala niyaku ka pallun ma yaꞌ tahati ku, pangissahan ku jama sampi ya. Iya pun ina, bong ku bay mitsala niiya ka pallun yaꞌ tahati na, pangissahan na sampi du ku.

¹² Sangkon, pagka kam magkainagon ni siga ladjikiꞌ man Rū Sutsiꞌ, ilooy pakuhun bi, yana siga ladjikiꞌ ma kasambu ni nyawa mimon pagkahi bi sukuꞌ si Isa.

¹³ Sangkon, soysoy bay kaladjikian mitsala ni siga pallun ag-agan, subay du sila maku pa Tuhan mari sila binuwanan kapandoyan muwan maana ni pallun meꞌ looy.

¹⁴ Na bong ina kita maku duwaa ni pallun ag-agan, inaa jalan man nyawa ta sadjaꞌ maku duwaa, sugaꞌ yaꞌ baw luu tahati ta.

¹⁵ Dari pagka meꞌ looy, aku itu, bong ku maku duwaa, tamūd maku ku duwaa ni pallun nyawa ku ma ag-agan, maka tamūd makoy ku pallun ku ma tahati meꞌ sikamimon. Damikiyan, bong ku ngalang kalangan pudji, tamūd makoy du ku pallun nyawa ku maka tamūd makoy ku pallun ku ma tahati.

¹⁶ Dari bong ina kam mudji atawa muwan pagsukuhan pa Tuhan njawom baanan bi, boꞌ kam makoy isu-isu pallun nyawa bi, malaingkan yaꞌ du luu san disu kahati. Maka yaꞌ du luu dapat jama ngaminan kaam.

¹⁷ San gi pooy ayad meꞌ bi bay muwan pagsukuhan pa Tuhan, bong ina ni pallun ma yaꞌ tahati leꞌ pagkahi bi, yaꞌ du kasambu ni nyawa da.

¹⁸ Na san ku ilay siꞌ bay halling meꞌ looy, daa kam mista ga yaꞌ luu guna na niyaku siga pallun ag-agan. Gam pin, magsuku gi ku pa Tuhan lay ku kaladjikian mitsala ni siga pallun meꞌ looy. Maka bistahan ku basag gi ku makoy pallun meꞌ looy man kaam sikamimon.

¹⁹ Sugaꞌ bong baw sasang ku njawom baanan siga jamaa, gam na ku makoy san lasa lima kabtang jaꞌ ma tahati mari pasōng pangahati jama man ku nnaa mōꞌ sapū libu kabtang ni pallun ma yaꞌ tahati. Boꞌ kaam baw ina, ilooy ya ladjikiꞌ patingkat ningkaam yana mitsala ni siga pallun ag-agan.

²⁰ Siga danganakan, kaam ina ma bay kaladjikian mitsala ni siga pallun ag-agan, sibuꞌ du karuha bi ka anak-anak luu kuli-kulihan na bahau tud kinasengan meꞌ na. Sugaꞌ ddong na kam ngakig pamiki anak-anak. Akigun bi na siga matatoa patong pamiki da. Luu baw beꞌ disu pakaradjaan ma pataꞌ man bi ngantanan pamiki anak-anak dikiꞌ, yana hāl meꞌ da yaꞌ kapiki nulun-nulun kalaatan.

²¹ Intomun bi doꞌ palman looy ma bay sinuwatan njawom kitab, ilooy ma yuk Tuhan, “Bbos-bbos, sohoꞌ ku pilu jama man bangsa sarī ka pallun sarī mitsala ni ga jama looy ma yaꞌ ngasip ni siga panohoan ku. Sugaꞌ san meꞌ looy, masi du sila yaꞌ kuhi pakale niyaku.”

²² Dari bong tabi mindoga man bitsala looy siꞌ, tahati tabi na bong inawnan siga pallun ag-agan, yana sipat kawasa Tuhan para sagannap ma yaꞌ pitsayaꞌ ni Almasi. Boꞌ ladjikiꞌ masampay siga umanat ma pinalahil meꞌ Rū Sutsiꞌ ina, yana sipat kawasa Tuhan para sagannap ma pitsayaꞌ.

²³ Sugaꞌ ni kapasal siga pallun ag-agan, minsan inaa sipat kawasa para jama ma yaꞌ pitsayaꞌ, bong ina man gundalaꞌ pamiki da ngita kaam, yaꞌ du sina sila koleꞌ kaayaran njataꞌ bi. Nnaꞌ ta na, luu paasok ni baanan bi jama ma yaꞌ pitsayaꞌ ni Almasi atawa ma kulang pangahati ni hāl Tuhan, bong ina ndaꞌ da labbasakayi na kam mitsala ni jinisan pallun ag-agan, mastiꞌ panganna da bilawan na baw kam, saꞌ ba?

²⁴ Sugaꞌ bong ina luu paasok jama meꞌ looy sasangan bi masampay siga umanat man Rū Sutsiꞌ ni pallun ma tahati da, halin sina parasahan da. Batan man sabapan umanat bi, tabista da na sina baldusa sila. Maka tumatandaꞌ na ninsila pataꞌ sila kalabuan hukuman Tuhan.

²⁵ Lagiꞌ na, tabista da na katoonan Tuhan mimon ma bay sinipuk njawom atay da. Dari pahangkop na sina sila numba Tuhan maka yuk da ina ningkaam, “Tumatandaꞌ na la ningkami tud inunungan du kam meꞌ Tuhan.”

Palbiatan ni sukuꞌ si Isa bila sila kumpo-kumpo numba

²⁶ Na siga danganakan, bila kam kumpo-kumpo numba, ituu palbiatan ku ningkaam. Mahap sina bong kasohean ngalang kalangan pudji pa Tuhan; maka mahap du bong kasohean nganasihat maka kasohean masampay umanat ma bay pinalahil meꞌ Rū Sutsiꞌ ninsila. Maka mahap du bong kasohean mitsala ni siga pallun ag-agan, basta luu jaꞌ tukang muwan maana. Sugaꞌ junjung ku na ningkaam, oy-oy pabuwat bi, subay kasambu ni siga nyawa sikamimon njawom baanan bi.

²⁷ Maka bong luu kam mitsala ni siga pallun ag-agan, subay ga duwa-tallu jaꞌ kam. Maka subay kam magsing-sīng mitsala. Yaꞌ dari sama-sama. Maka subay du luu nnaa ma pandoy muwan maana.

²⁸ Bong gantaan yaꞌ du luu nnaa ma pandoy muwan maana, gam na kam yaꞌ mōꞌ pallun meꞌ looy. Bong hati kam doman makoy pallun meꞌ looy, subay gantaꞌ yaꞌ takale sarī man dī bi maka Tuhan.

²⁹ Ni kapasal jama ni baanan bi ma bay kaladjikian masampay siga umanat lakka man Tuhan, bong sila masampay, sapatut na subay meꞌ looy du siꞌ ga duwa-tallu jaꞌ du sila. Maka umanat da subay binanding paayad meꞌ sikamimon bong magbēꞌ du ka tōꞌ si Isa atawa niyaꞌ.

³⁰ Bong sasang disu masampay umanat meꞌ looy, boꞌ luu na baw disu bay kabuwanan umanat man Tuhan, ngagad na doꞌ ya. Noy lupus na ilooy ma bay duhuꞌ mitsala boꞌ na pasīng.

³¹ Batan bong ina kam siagad-agad ka ira bi masampay umanat man Tuhan, malaingkan mahap jaꞌ sina meꞌ sikamimon kale. Dari luu na dapat mimon pagkahi bi koleꞌ pangahati. Boꞌ na, pataggu lagi iman da.

³² Kitabi itu ma lay na kaladjikian masampay siga umanat man Tuhan, yaꞌ pataꞌ bong kitabi sitaban-taban mitsala. Subay kitabi ngagak dī tabi

³³ batan kahandak Tuhan ina, subay hatu meꞌ tabi numba iya. Yaꞌ ya doman hipos njawom baanan tabi. Na kuwan karandahan ma mmeꞌ numba, subay akig da tabiat inikut meꞌ mimon baanan sukuꞌ Papuꞌ Isa.

³⁴ Hati na, subay sila diyam-diyam sasang baanan bi numba. Yaꞌ sila dari hibuk. Maka subay sila lillaꞌ ni kalallahan meꞌ ndang bay tinōꞌ njawom kitab.

³⁵ Bong hati luu tilaw da, agad da na doꞌ takka lumaꞌ boꞌ da nilaw ni lla da. Batan tampalasa sina bong sila hibuk sasang siga jamaa numba.

³⁶ Na bong luu nnaa yaꞌ kasulutan ni palbiatan tuu siꞌ, intomun bi, saꞌ silay kaam bay duhuꞌ-duhuꞌ mōꞌ umanat Tuhan. Maka daa kam mista isu-isu kaam bay tapasampayan umanat man Tuhan.

³⁷ Soysoy kam nnaa mista kaam tukang masampay umanat man Tuhan sampay tattap ngasip ni Rū Sutsiꞌ, bong ina bana du, tabista bi jaꞌ sina ituu ma sinuwatan meꞌ ku ningkaam tud lakka man panohoan Papuꞌ Isa.

³⁸ Sugaꞌ bong baw ina luu nnaa tud yaꞌ kuhi ngahasi bitsala ku, labi na bitsala da yaꞌ dari hinasi.

³⁹ Dari siga danganakan, subay kam magkainagon banahan ni ladjikiꞌ hāl meꞌ masampay siga umanat man Tuhan. Sugaꞌ daa na baw taggahun bi siga pagkahi bi mitsala ni siga pallun ag-agan.

⁴⁰ Maka intomun bi. Bila kam kumpo-kumpo numba, oy-oy pabuwat bi, subay hatu sampay pataꞌ ka kaam inawnan sukuꞌ si Isa.