1 Korin 13 - Sabahagiꞌ Kitab Tawrat: Panagnaan ni Awwal Jaman maka Kitab Injil

Aseꞌ numbul satu

¹ San kita sawpama pandoy mitsala kajinisan pallun manusiyaꞌ sampay pallun siga malaikat, bong kita yaꞌ du pandoy maaseꞌ ni pagkahi ta manusiyaꞌ, yaꞌ du luu pūs ta. Bong yaꞌ luu aseꞌ ta, sibuꞌ du hagaꞌ bitsala ta ka agung pinepek yaꞌ biddaꞌ atawa sembal pinagsipangkiꞌ manunsāp.

² Damikiyan, san sawpama kita lay kaladjikian masampay siga umanat Tuhan, boꞌ katoonan ta lagi mimon ilmuꞌ ma yaꞌ gi bay pinalahil ni manusiyaꞌ, bong yaꞌ du luu aseꞌ ta ni jama, yaꞌ du luu pūs ta. Damikiyan, san sawpama yaꞌ luu kulang pangahati ta ni mimon-mimon, boꞌ sukup lagi pangando ta pa Tuhan sampay takaya ta nohoꞌ punu paenseg, bong yaꞌ du luu aseꞌ ta ni jama, yaꞌ du luu pūs ta.

³ San gi dean ta mimon altaꞌ ta jama miskin, maka san gi atas ta baran ta tinunu kalnaꞌ si Isa, bong yaꞌ du luu aseꞌ ta ni jama, yaꞌ du luu sōng na.

⁴ Na arat jama ina maaseꞌ meꞌ tuu: Tahaꞌ pasensiya na, manimbang ni pagkahi na manusiyaꞌ, yaꞌ dangkiꞌ, yaꞌ ngabbu atawa malangkaw dī na

⁵ maka yaꞌ ya halipulu. Yaꞌ ya nabiat miha kaayaran ni dī na sadjaꞌ. Yaꞌ ya mura dugahan, maka yaꞌ ya ngannaꞌ njawom atay na dusa jama niiya.

⁶ Bong jama maaseꞌ, yaꞌ gāk ni oy-oy pabuwatan maat. Ilooy ya kagakan na, bong jama buwat kaintongan.

⁷ Bong jama maaseꞌ, tatasan na jaꞌ sina salla arat pagkahi na manusiyaꞌ. Maka tattap jaꞌ pangando na ka holat na. San gi oy katuwaꞌ niiya, natas na jaꞌ ya.

⁸ Na mimon ladjikiꞌ meꞌ sapantun masampay siga umanat Tuhan atawa pun mitsala ni jinisan pallun ma yaꞌ san bay pingkaꞌ kapandoyan na, ahi maka ahi na, luu jaꞌ du sina ka katapusan da. Sampay ilmuꞌ, bbos-bbos tamban du sina. Boꞌ aseꞌ, yaꞌ luu masa na.

⁹ Batnaa tu, pangahati tabi bohoꞌ sabahagiꞌ batan yaꞌ gi sukup. Maka bila tabi masampay siga umanat Tuhan, bohoꞌ du sabahagiꞌ, batan meka gi sina yaꞌ bay pinalahil ningkitabi.

¹⁰ Sugaꞌ pag ina mintu taabut na llaw man magjatu na maksud Tuhan labbasakayi, yaꞌ na luu guna siga ladjikiꞌ looy siꞌ.

¹¹ Batan meꞌ tuu karuha na: Bay jaman tabi ina anak-anak, bitsala tabi ka pamiki tabi meꞌ ni anak-anak du. Maka akka tabi pun, akka anak-anak du. Sugaꞌ pag lay jaꞌ sangkad ehe tabi, lay na labbahan tabi bay akka tabi jaman tabi anak-anak.

¹² Batnaa, kulang gi pangahati tabi. Pangandaan tabi hāl Tuhan sibuꞌ du karuha na ka jama ngandaꞌ lingu na ni jawom sammin ginagat. Sakayi ina sukup pangahati tabi, noy mintu kitabi sitammu na ka Tuhan balharapan. Batnaa itu, bohoꞌ sabahagiꞌ pangahati tabi, sugaꞌ bbos-bbos, yaꞌ na luu kulang na, sibuꞌ na du ka pangahati Tuhan pasal kitabi.

¹³ Dari luu situ tallu pakaradjaan subay tattap kinanna meꞌ tabi, yana pangando pa Tuhan ka holat ni siga janjiꞌ Tuhan sampay aseꞌ pa Tuhan ka pagkahi tabi manusiyaꞌ. Sugaꞌ ni ituu siꞌ sikatallu, ilooy patingkat hagaan, yana aseꞌ.