1 Korin 10 - Sabahagiꞌ Kitab Tawrat: Panagnaan ni Awwal Jaman maka Kitab Injil

Pamintangan pasal jama yaꞌ mmeꞌ ni kahandak Tuhan

¹ Siga danganakan, paintoman ta doꞌ kam salsila kabboꞌ-bboan kami Yahudi ka Nabi Musa bay jaman da pinaddusan man jawom pamarinta bangsa Ejip. Mimon sila bay pinagmundaan meꞌ Tuhan ka disu tayiꞌ baliyu ni duhuan da. Maka man tabang Tuhan, lay na ga pasihaꞌ dilawut man da bay palintas sikamimon pa dambilaꞌ.

² Dari kahalan da ilay siꞌ ni tayiꞌ baliyu looy ka dilawut looy, tabilang lay sila pinandi tandaꞌ da mmeꞌ ni Nabi Musa.

³ Maka sikamimon sila lay kakakan makanan lakka man Tuhan.

⁴ Sampay saliꞌ-saliꞌ sila lay kainum boheꞌ ma bay pinapōꞌ meꞌ Tuhan man jawom disu batu. Na batu looy ilay yana sipat ni Almasi ma bay ngunungan sila.

⁵ Sugaꞌ san meꞌ looy na siꞌ ehe tabang Tuhan ninsila, kuwan kaekahan ninsila, amu-amu yaꞌ mmeꞌ ni kahandak na. Dari tud yaꞌ bay kasulutan Tuhan ninsila. Pag toklas na, kaekahan sila yaꞌ na bay ngabut lahat ma tiniluꞌ meꞌ da. Lay na jaꞌ sila magsunuꞌ-sunuꞌ matoy ni sikaliput lahat lau-lau yaꞌ maglumaꞌ man da bay pingkaꞌ.

⁶ Na ilooy ilay siꞌ ma bay talingkaꞌ meꞌ siga kabboꞌ-bboan kami, yana pamintangan ningkitabi mari kitabi yaꞌ ngakig sila maabak kalaatan.

⁷ Kasohean, kalaatan da, bay sila numba siga tuhan-tuhan. Meꞌ bay sinuwatan njawom kitab, “Lay sila ballang, nginum-mangan ka maglami-lami njawom da numba tuhan-tuhan da.” Sangkon amay-amay, daa na kitabi mmeꞌ meꞌ uwahan da numba siga tuhan-tuhan.

⁸ Maka daa na kitabi ngikut sila kasohean bay magjina. Bistahun bi doꞌ, sabapan kalaatan da meꞌ looy, njawom dangallaw du, duwampuꞌ-tallu libu sila bay matoy.

⁹ Maka daa na kitabi hangat maruga Papuꞌ yaꞌ ngasip niiya. Ilooy na silay kon kabboꞌ-bboan kami kasohean lay matoy tininduk meꞌ siga sō.

¹⁰ Maka daa na du kitabi magdubdub meꞌ bay jaman da kasohean. Sabapan da bay buwat meꞌ looy, lay sila sohoꞌ Tuhan pinapatoy ni malaikat na.

¹¹ Na ilooy ilay ma bay katuwaꞌ ni kabboꞌ-bboan kami bay sinuwatan man mandaan kitabi ni timpu batnaa na, yana timpu man siga tunaꞌ njawom kitab pasal Almasi binakbul.

¹² Sangkon, soysoy kam nnaa mista takkoꞌ banahan pangando bi pa Tuhan, paayad-ayad kam, taggahaꞌ bong yaꞌ iyakinan bi dī bi, lay du kam mintu kapabuwat dusa meꞌ karuha sila du mattoꞌ.

¹³ Intomun bi, oy-oy ina sasat ma tuwaꞌ ningkitabi, sibuꞌ du sina ka siga sasat ma tuwaꞌ ni manusiyaꞌ sikamimon. Kahapan, kanaalla du Tuhan nabangan kitabi. Yaꞌ du sina ya mabiya kitabi njawom sasat ma gantaꞌ yaꞌ takaya tabi. Oy-oy ina sasat njataꞌ tabi, binuwanan du sina tabi meꞌ na gaos supaya kitabi katatas ngilagan dusa.

¹⁴ Na siga kakasi ku, bong kinawnan numba siga tuhan-tuhan, daa na kitabi palamud.

¹⁵ Kaam ina, luu du kam ka honaꞌ-honaꞌ bi. Sangkon bong ina kam mindoga paayad, tabista bi du sina bana bitsala ku.

¹⁶ Katoonan bi na du, tuktuk tabi nginum tubaꞌ anggul bilang pangintoman ni lahaꞌ Almasi, mangaku kitabi tibuuk ka iya. Maka muwan tabi pagsukuhan pa Tuhan. Damikiyan, tuktuk tabi mangan tinapay ma pinong-pōng meꞌ tabi, mangaku du kitabi dambuwaꞌ baran ka iya.

¹⁷ Na pagka saliꞌ-saliꞌ kitabi mangan tinapay looy dambatang, hati na, san kitabi meka, ingat tabi dī tabi disu baran du.

¹⁸ Mamintang jaꞌ kam ni arat bangsa Israil. Tuktuk da mangan sumbalian kulban ma bay sinongan pa Tuhan, magtibuuk sila numba Tuhan. Siga kapil pun ina, tuktuk da mangan sumbalian kulban ma bay sinongan ni tuhan-tuhan da, magtibuuk du sila numba tuhan-tuhan da.

¹⁹ Sugaꞌ saꞌ baw silay hantak bitsala ku ga luu kawasa-kapatut siga tuhan-tuhan. Tud yaꞌ sina luu. Maka kulban pun ma sinongan ni tuhan-tuhan, yaꞌ du luu sōng na.

²⁰ Arapun awnan ku, tuktuk siga kapil nongan kulban da, ilooy ya sinumba meꞌ da siga seytan, saꞌ ga Tuhan. Boꞌ aku tu, bong kinawnan siga seytan, karomanan ku yaꞌ luu lamud bi ninsila.

²¹ Yaꞌ sina dari bosbos mmeꞌ kam nginum-mangan para pangintoman ni kapatoy Papuꞌ, bosbos mmeꞌ na baw kam ni siga kapil nginum-mangan taabut da numba siga seytan.

²² Ongoy, doman kam maruga Tuhan? Uy, bistahan bi kaatu manusiyaꞌ pa Tuhan?

²³ Sugaꞌ sambat kasohean, “Pagka sukuꞌ Almasi na kitabi, sumunsayaꞌ na situ kitabi buwat oy-oy karomanan tabi.” Bana du baw silay, sugaꞌ saꞌ baw lay mimon pabuwatan kasampulnaꞌ ningkitabi.

²⁴ Sangkon, oy-oy pabuwat ta, pamikihan ta doꞌ duhuꞌ bong kasampulnaꞌ ni pagkahi ta atawa niyaꞌ. Daa isu-isu pabuwat ta ma karomanan ta sadjaꞌ.

²⁵ Na balik ta pa sumbalian, oy-oy jaꞌ sumbalian pinaballihan ni tabuꞌ, takakan bi jaꞌ sina. San kam yaꞌ na nilaw bong bay sinongan pa siga tuhan-tuhan.

²⁶ Katoonan bi du sina, junyaꞌ tuu sampay mimon-mimon njawom na, Tuhan du dapu. Sangkon, meꞌ kitabi sukuꞌ na, dari san tabi mangan oy-oy lawuk.

²⁷ Dari bong kam bay kinaddoꞌ mangan ni lumaꞌ jama ma yaꞌ pitsayaꞌ ni si Isa, boꞌ doman du kam mmeꞌ, pilayun bi jaꞌ. Mangan jaꞌ kam oy-oy pinaawop ningkaam. San kam yaꞌ na nilaw bong bay sinongan pa siga tuhan-tuhan.

²⁸ Sugaꞌ bong baw luu pagkahi bi ndooy, boꞌ yuk na, “Lawuk tuu bay pingkaꞌ sinongan pa tuhan-tuhan,” daa na kam mangan kalnaꞌ iya, taggahaꞌ lingog na baw pamiki na bong ya ngita kaam mangan.

²⁹ Dari san yaꞌ nulang ni honaꞌ-honaꞌ ta mangan lawuk meꞌ looy, bong tabista ta kalingog ni pamiki pagkahi ta, subay kita yaꞌ mangan. Na adakala yuk kasohean, “Ongoy subay na pin ku naggaan dawom ku mangan sukat kanna soheꞌ ku maat niyaku mangan? Ndang-ndang, sumunsayaꞌ du ku njawman Almasi.

³⁰ Bong ina lawuk ndang lay na pagsukuhan ku pa Tuhan, mastiꞌ yaꞌ du luu laat ku ni bandingan Tuhan bong kakan ku. Sangkon batōy ku bong jama mista dari dusa niyaku bong ku mangan?”

³¹ Sugaꞌ ituu baw meꞌ ku ka jama ma mitsala meꞌ looy: Oy-oy kakan bi ka inum bi atawa oy-oy pabuwat bi, subay kaboo kabantugan pa Tuhan maksud bi.

³² Sangkon, iyakinan bi dī bi mari kam yaꞌ kapabuwat oy maka oy na ma kaboo jama yaꞌ doman pitsayaꞌ ni si Isa. Bangsa Yahudi atawa ssaꞌ, sukuꞌ si Isa atawa ssaꞌ, daa kam buwat man da nuwak si Isa.

³³ Aku pun itu, inaa du aturan bean ku. Wā ku ngilag oy-oy pabuwatan ma binista meꞌ jama maat. Batan yaꞌ ku muhung kaayaran ni dī ku. Arapun ilooy ya puhung ku, kaayaran ni pagkahi ku manusiyaꞌ bong pin sila nammu jaꞌ kasalamatan.