ZEFANAAYA 3 - WƖA TENIŊ

Jerusalɛm sɩ jaŋ nagɛ ŋɩɩ maachie

¹ Wɩaa puu Jerusalɛm, ʋ nyagɛ nɩaa bil nɛ, a vɩa dagɩŋ aŋ ŋaa wɩaa a kɛŋ disiniŋ.

² Ʋ bɩ nʋʋkala niiŋ ka nɩɩ. Ʋ bɩ sɛyɛ ba dɩdagʋ. Ʋ bɩ La TƖƖNA laa dii. Ʋ bɩ sɛyɛ a mʋ kpɩkpagɛ ʋ Wɩa.

³ Ʋ tɩntɩnnɩ-hɩasɩŋ ka ŋaa goŋ nɛ a nagɛ naachigee sɩɩ yel, ʋ sɩpaalaaraa ma nagɛ losuŋ sɩ kɛŋ guŋgurusuŋ dɩdaanɩŋ, ba bɩ kʋŋ die aŋ kɩka taŋ pʋpʋl.

⁴ Wɩa wʋlaabʋlla-la sɩ hɛ ʋ lɛ kɛŋ babii-ballɩŋ, ba ŋaa zɛmbɛ tɩmma nɛ. Ʋ Wɩɩsʋllɩ sɩpaalaaraa ŋaa disiniŋ hɛ Wɩa dɩɩ-bal-la lɛ nɛ aŋ kɛŋ wombii-la ma ʋ sɩ bile dɩ la tuto kaa bɩrɩmɛ ŋɩɩ ba sɩ cho.

⁵ La TƖƖNA ŋaa tʋɔpʋl Tɩɩna nɛ a hɛ tabal-la lɛ, ʋ bɩ wʋbɔŋ kala ka ŋaa. Tapʋlɩɩ na-kala ʋ yie dagɛ ŋɩɩ ʋ sɩ kɛŋ wʋtɩtɩɩ nɛ, ʋ bɩ giri, ka nɩalɩŋ sɩ kɛŋ tʋɔbɔmʋŋ ha bɩ hɩɩsɩŋ jɩŋ.

⁶ La TƖƖNA sɩ, “Mɩ kpʋ tinteyee nɩaa nɛ a ŋmoo ba dɩɩ-duoruŋ lo. Mɩ leŋe ba womporunuŋ pɩŋ hoi nɛ, nʋʋkala bɩ ba ka to. Mɩ chei ba tabalaa nɛ, nʋʋkala bɩ ka nɩmɛ, nɩbala ma bɩ ka.

⁷ Mɩ fa bɩɩna mɩ nɩaa jaŋ fámɛ, a sɛɩ mɩ dagɩŋ, dɩ mɩ bɩra sɩ́ ba taŋ chei a dɔgɩsɛba. Ama ba haa ŋaa wʋbɔmɔ-la ba fa sɩɩ ŋaa nɛ.”

⁸ Ŋɩɩ wɩaa La TƖƖNA bɩra bʋl, “Má gbɛrɛ tapʋlɩɩ-la mɩ sɩ jaŋ dagɛ tinteyee nɩaa wʋcheelee pɩba. Mɩ kɛŋ mɩ tʋɔŋ dɩ mɩ yɩrɛ tinteyee arɩ kuoru tinteyee nɩaa hilimi nɛ, a kɛŋ baanɩŋ dɔgɩsɛba. Mɩ baanɩŋ chaasa sii ba nyuŋ nɛ. Mɩ baanɩŋ sɩ sie mɩ yaraa bibieri ŋɩɩ, ʋ jaŋ nagɛ nyiniŋ a joŋ dʋnɩa kala dii.

⁹ Ŋɩɩ lɛ nɛ mɩ jaŋ kɛŋ nɩaa deemba niiree bɩrɩmɛ, dɩ ba kala yɩyɩrɛ mɩ-na ba TƖƖNA yɩrɩŋ, a tɩma pɩpɩmɛ arɩ nii-bala.

¹⁰ Mɩ nɩalɩŋ sɩɩ chʋɔlɛmɛ aŋ pɩsɛ a kieli Kus fuonu-la leriŋ a mʋ, jaŋ kɛŋ kɩaa kʋ ŋaa Wɩɩsʋlʋŋ pɩmɛ.

¹¹ Tapʋlɩɩ-la mɩ bɩ jaŋ tɩŋ wʋbɔmɔ-la ma sɩ ŋaa mɩ lɛ wɩaa a joŋ hɩɩsɩŋ hɛ ma lɛ, bɛɛ wɩaa tabalɩŋ deeŋ lɛ, mɩ jaŋ lɩɩsɛ nɩalɩŋ sɩɩ jʋɔsɛ ba babiibal wɩaa lɛ ta. Ma bɩra bɩ jaŋ kɔ dɩ ma kɛŋ babii-ballɩŋ mɩ dundolo-la sɩ bɩ disiniŋ kɛnɛ lɛ.

¹² Mɩ-na ma TƖƖNA jaŋ leŋ nɩalɩŋ sɩ kɛŋ ba tɩtɩa muuri arɩ nɩalɩŋ sɩaa sɩ fɩɛla tabal-la lɛ, nɩalɩŋ sɩ laamɛ dii.

¹³ Iziral nɩkaana-la sɩ bɩ sʋba bɩ jaŋ ŋaa wʋbɔŋ, ba bɩ jaŋ nyɩnyɩɛ wɩaa, ba bɩ jaŋ nyɩnyɩsɛ nɩaa ma. Ba jaŋ dii kɩaa aŋ pɩŋ sɔm, nʋʋkala bɩ jaŋ ŋaa dɩ fawʋllʋŋ kɛmba.

¹⁴ Zaayɔŋ nɩaa, má yɩɩ yɩɩlaa, Iziral tɩmma, má kpɩa wɩaa. Jerusalɛm nɩaa, má leŋ dɩ ma tʋɔŋ faasa tɔrɛ, dɩ ma jʋjʋɔsɛ.”

¹⁵ La TƖƖNA leŋ ma dɔgʋsʋŋ nɛ, ʋ kiri ma dʋndɔŋŋɔɔ ba mɩɩrɛ nɛ. La TƖƖNA, Iziral tɩŋŋaa Kuoru-balɩŋ hɛ ma teeŋ nɛ, ma bɩra bɩ jaŋ fɩfá wʋwalɩmɩɩ kala.

¹⁶ Tapʋlɩɩ-la ba jaŋ bʋla pɩ Jerusalɛm tɩŋŋaa, “Má sɩ́ fawʋllʋŋ fá, Zaayɔŋ nɩaa, má sɩ́ leŋe dɩ ma nandaasɩŋ yʋɔrɛ.

¹⁷ Ma TƖƖNA Wɩa hɛ ma teeŋ nɛ, ʋ kɛŋ doluŋ nɛ dɩ ʋ laama ta. Ʋ tʋɔŋ jaŋ faasa tɔrɛ ma nyuŋ, ʋ chonuŋ jaŋ leŋ dɩ ma hɔŋ sɔm, dɩ ʋ yɩɩ tʋɔtɔrɛ yɩɩlaa a jʋɔsɛ ma wɩaa.”

¹⁸ La TƖƖNA bʋla, “Mɩ jaŋ lɩɩsɛ tʋɔ-chei-la ma sɩ kɛnɛ a tɩŋ ma bɩra sɩ́ bɩ gbiele-la ma sɩ yie vɛnɛɛ gbieli ka gbieli wɩaa. Ʋ ŋɩɩ fa ŋaa chʋga arɩ hɩɩsɛ nɛ ma lɛ.

¹⁹ Bʋa-la nɛ yie, mɩ jaŋ dɔgɩsɛ nɩalɩŋ kala sɩ wʋrʋgʋma. Mɩ jaŋ laa gbɛrɩgɛɛ ta, aŋ kɛŋ nɩalɩŋ sɩ pɩsa kʋ hɛ dɔŋɔ. Mɩ jaŋ leŋ dɩ ma kɛŋ yɩrɩŋ dɩ nɩaa zizilma tinteye-la kala lɛ ba sɩ hɩɩsɛma.

²⁰ Bʋa-la lɛ, mɩ jaŋ kɛsɛma kʋ hilimi. Bʋa-la nɛ yie, mɩ jaŋ kɛsɛma kɔ dɩa. Mɩ jaŋ leŋ dɩ dʋnɩa nɩaa kala bɩbɛsɛ ma lɛ a zizilma dɩ mɩ nɛ leŋe dɩ ma bɩra dʋa ba sɩɩŋ lɛ.” La TƖƖNA nɛ bʋla.