ZEFANAAYA 2 - WƖA TENIŊ

¹ Ma tintee-la nɩaa hɩɩsɩŋ sɩ die, má bɩɩnɛ wɩaa pɩ ma tɩtɩa, ma bɩɩnɛ wɩaa pɩ ma tɩtɩa

² ka dɩ bʋa-la ba sɩ daga-na yi, chɛɛ-la peliŋ sɩ jaŋ paama a nagɛ mɩɩ-jɔrʋŋ, ka dɩ tapʋlɩɩ-la La TƖƖNA sɩ jaŋ na baanɩŋ ma nyuŋ-na yi. Chɛɛ-la La TƖƖNA baanɩŋ jaŋ faasa sii ma nyuŋ woruŋ.

³ Má chɛ La TƖƖNA, ma nɩalɩŋ kala sɩ kɛŋ ma tɩtɩa muuri a hɛ tintee-la lɛ, ma nɩalɩŋ sɩɩ ŋaa wɩalɩŋ ʋ sɩ daga, má kɛŋ tʋɔpʋla, a kɛŋ ma tɩtɩa muuri, ŋ bɩ pɔ ma jaŋ na leriŋ a kɛŋ ma nyusuŋ pɛllɛ tapʋlɩɩ-la La TƖƖNA sɩ jaŋ na baanɩŋ.

Wɩalɩŋ Zefanaaya sɩ bʋla tɩgɛ Fɩlɩsɩtɩa tɩŋŋaa lɛ

⁴ Ba jaŋ vɩa tabal-la ba sɩɩ yɩrɛ Gaza ta, aŋ ka dɩ taŋ-la ma ba sɩɩ yɩrɛ Asɩkɛlɔŋ pɩŋ jikpeeŋ. Ba jaŋ kiri taŋ-la ba sɩɩ yɩrɛ Asɩdɔd nɩaa ta wɩɩhɛɛ siesee ka dɩ ʋ pɩŋ hoi, a kiri taŋ-la ba sɩɩ yɩrɛ Ɛkʋrɔŋ nɩaa ma ta.

⁵ Wɩɩŋ puu ma nɩalɩŋ sɩ hɔŋ mʋgʋ-balɩŋ niiŋ, tintee-la ba sɩɩ yɩrɛ Kiriti tɩŋŋaa. La TƖƖNA bʋla lɩɩ ma harɩŋ nɛ. Ma Fɩlɩsɩtɩa tɩmma-la sɩ hɔŋ Kɛnaŋ tinteeŋ, La TƖƖNA sɩ, “Mɩ jaŋ cheima, ma kʋbala ma bɩ jaŋ ka.”

⁶ Tintee-la sɩ kpagɛ mʋgʋ-balɩŋ, lee-la Kiriti tɩŋŋaa sɩɩ jʋʋ jaŋ bɩrɩmɛ pie-daaraa arɩ piesee dɩjʋʋlʋŋ.

⁷ Juda nɩkaanaa nɛ jaŋ hɔŋ tintee-la lɛ, nɩmɛ nɛ ba pʋsʋŋ jaŋ didii yaŋ. Dɩdaanɩŋ ba jaŋ pɩŋ Asɩkɛlɔŋ tɩmma-la dɩɩsɩŋ lɛ. Ba TƖƖNA Wɩa jaŋ beŋ ba nyuŋ, ʋ jaŋ leŋ dɩ ba bɩra dʋa.

Wɩalɩŋ La TƖƖNA sɩ bʋla tɩgɛ Mʋab tɩŋŋaa arɩ Amɔŋ tɩŋŋaa lɛ

⁸ La TƖƖNA sɩ, “Mɩ nɩɩ jomo-la Mʋab tɩŋŋaa fa sɩ tʋʋsɛ mɩ nɩaa arɩ ŋɩɩ Amɔŋ tɩŋŋaa sɩ sieri mɩ nɩaa lɛ nɛ. Ba tʋʋsɛ mɩ nɩaa a fugisiba nɛ arɩ ba jaŋ kɛŋ ba tinteeŋ laa.

⁹ Ŋɩɩ wɩaa, mɩ-na ma TƖƖNA doluŋ kala TƖƖNA sɩ ŋaa Iziral tɩŋŋaa Wɩa ŋmɩɛsa nɛ, mɩ nɛ bʋla: wʋtɩtɩɩ, mɩ jaŋ chei Mʋab dɩ ʋ nagɛ taŋ-la ba sɩɩ yɩrɛ Sodom a chei Amɔŋ tɩŋŋaa dɩ ba ma nagɛ taŋ-la ba sɩɩ yɩrɛ Gomora. Ba leriŋ kala jaŋ tɔ yaŋ arɩ kpesi bʋɔsʋŋ a pɩŋ kʋŋkʋlʋŋ a kaa mʋ wuu. Mɩ nɩalɩŋ sɩ ka jaŋ paa ba kɩaa, mɩ tintee-la nɩalɩŋ sɩ bɩ sʋba jaŋ laa ba tinteeŋ tɩɩ.” La TƖƖNA nɛ bʋla.

¹⁰ Wɩɩ-la sɩ jaŋ ŋaa ba lɛ nɛ ŋɩɩ a tɩŋ ba sɩɩ-duoŋ wɩaa, bɛɛ wɩaa ba tʋʋsɛ ba TƖƖNA Doluŋ kala Tɩɩna nɩaa nɛ a sieri ba lɛ.

¹¹ La TƖƖNA jaŋ chei vʋɩya-la kala sɩ hɛ tintee-la lɛ, dɩ fawʋllʋŋ faasa jʋʋba. Tinteyee kala sɩ hɛ dʋnɩa lɛ jaŋ kpirimi ʋ sɩpaaŋ, nʋʋ na-kala jaŋ ŋaa ŋɩɩ ʋ tɩtɩa tinteeŋ lɛ.

Wɩalɩŋ La TƖƖNA sɩ bʋla tɩgɛ Kus tɩŋŋaa lɛ

¹² La TƖƖNA sɩ, “Ma Kus tɩŋŋaa ma, mɩ jaŋ leŋ dɩ ba kpʋma laalɩŋ lɛ.”

Wɩalɩŋ Zefanaaya sɩ bʋla tɩgɛ Asiiria tɩŋŋaa lɛ

¹³ La TƖƖNA jaŋ lɩɩsɛ ʋ nɩsɩŋ liesi wɩɩpɔsʋŋ nagʋa dɩɩrɩŋ a chei Asiiria tinteeŋ, aŋ ŋaa dɩ tabal-la ba sɩɩ yɩrɛ Nɩnɩvɛ pɩŋ hoi, a hɩla nagɛ tintee-hɩlɩŋ.

¹⁴ Piesee arɩ nɛsɩŋ jaŋ pɩpɩŋ nɩmɛ, pʋŋ-doho na-kala jaŋ pɩŋ nɩmɛ. Hajaaŋkuŋkumba-la sɩ hɛ tintee-hɩlɩŋ lɛ arɩ gʋra-nyilimiba jaŋ chʋchʋa ʋ kɛrɩsɩŋ lɛ. Ba huuno jaŋ to tokoro wuoloo a lɩɩ chɩchɩɩmɛ leriŋ. Chosuŋ arɩ tɩɛrɩŋ jaŋ tele gɩbɛ boi-niiree lɛ, ka dɩ kuolu doloo nyɩɩsɛ.

¹⁵ Wɩɩ-la sɩ jaŋ ŋaa tabal-la nɩaa fa sɩ hɔnɔ ta jɩa, wɩɩ bɩ baa walɩmɛ lɛ nɛ ŋɩɩ. Tabal-la fa bʋl ʋ tɩtɩa lɛ, “Mɩ-na nɛ hɛ nɩmɛ, kʋŋkala tuo a magɛmɛ.” Ʋ nɛ mɩɩra pɩŋ jikpeeŋ ŋɩɩ a ŋaa baga kɩaa dɩjʋʋlʋŋ. Nɩalɩŋ kala sɩ tou bɩbal yie sieri ʋ lɛ aŋ kɛŋ nɩsɩŋ liese dɩdagɛ.