ZEFANAAYA 1 - WƖA TENIŊ

¹ La TƖƖNA fa bʋl wɩaa pɩ Zefanaaya sɩ ŋaa Kusi nanʋala, a ŋaa Gedalia ma nihiŋ, aŋ ŋaa Amarɩa nihi-lɩɛrɛ. Amarɩa nyɩmma nɛ fa ŋaa Hezikaaya. Bʋa-la lɛ dɩ Josaaya sɩ ŋaa Amɔŋ nanʋala nɛ fa dii kuoruŋ Juda tinteeŋ lɛ.

Wɩa jaŋ dii nɩaa sarɩya

² La TƖƖNA sɩ, “Mɩ jaŋ tii paa kʋŋkala sɩ hɛ dʋnɩa lɛ.

³ Mɩ jaŋ tii paa nuhuobiinee arɩ pʋsʋŋ, diibiisiŋ arɩ chenfilee sɩ hɛ mʋgʋ-balɩŋ tʋɔŋ. Nɩbɔŋŋɔɔ jaŋ daŋ dɔŋɔ lɛ a sii chʋɔrɛ, dɩ mɩ nɛ kpʋ dʋnɩa nɩaa kala.” La TƖƖNA nɛ bʋla.

⁴ “Mɩ jaŋ dɔgɩsɛ Juda nɩaa arɩ nɩalɩŋ kala sɩ hɛ Jerusalɛm lɛ. Mɩ jaŋ kpʋ nɩalɩŋ sɩ ka daha a tuto Baal vene-la, dɩ nɩalɩŋ sɩɩ kpaarʋ yɩrɩŋ lɛl.

⁵ Mɩ jaŋ chei nɩalɩŋ sɩ yie jɩl lusuŋ a kpirime chʋɔlɛ wɩɩpɔsʋŋ, chɛnɛ arɩ chɛnwʋlaa, arɩ nɩalɩŋ sɩ yie kpirime chʋɔlɛ mɩ-na ba TƖƖNA a ŋmɩɛsɛ mɩ yɩrɩŋ lɛ, aŋ ha bɩra ŋmɩŋmɩɛsɛ vene-la ba sɩɩ yɩrɛ Mɔlɛk ma yɩrɩŋ lɛ.

⁶ Mɩ jaŋ chei nɩalɩŋ sɩ mɩɩrɛ mɩ-na ba TƖƖNA harɩŋ tonuŋ, a bɩ mɩ bee chɩchɛ, a bɩ mɩ pɩɛsa nɩna wɩaa.”

⁷ Má ŋaa fʋɩɩ La TƖƖNA Wɩɩjarɩbakɔ sɩpaaŋ, bɛɛ wɩaa La TƖƖNA tapʋlʋŋ kpaga nɛ. La TƖƖNA fa leŋe ʋ nɩaa nagɛ pʋsʋŋ nɛ dɩ ba kpʋ a lɩɩsɛ nɩalɩŋ ma sɩ jaŋ kpʋba.

⁸ La TƖƖNA sɩ, “Tapʋlɩɩ-la mɩ sɩ jaŋ dii mɩ nɩaa sarɩya, mɩ jaŋ dɔgɩsɛ ba sɩpaalaaraa arɩ kuoru-biiriŋ arɩ nɩalɩŋ kala sɩɩ to nɩwogusuŋ naabarɩŋ.

⁹ Tapʋlɩɩ-la mɩ jaŋ dɔgɩsɛ nɩalɩŋ kala sɩɩ ŋaa wɩaa a nagɛ vʋɩ-kpaaraa, nɩalɩŋ sɩ gɩrɩma laa kɩaa a kpʋ nɩaa ma laa kɩaa su ba vene dɩɩ-balɩŋ.”

¹⁰ La TƖƖNA bɩra sɩ, “Tapʋlɩɩ-la ma jaŋ nɩɩ dɩ nɩaa ŋmoo niiŋ Jerusalɛm boi-baal-la ba sɩɩ yɩrɛ Chenfilee Boi-baalɩŋ lɛ, a nɩɩ yele ma ja-falɩɩ-la ba sɩ saa lɛ, a nɩɩ goŋ ma ba sɩ faasa ŋaa dundolluŋ nyuŋ.

¹¹ Ma nɩalɩŋ sɩ hɛ yɔbɔ leriŋ, má yel. Ba jaŋ kpʋ ma bayalaa kala. Ma nɩalɩŋ sɩɩ yɔɔ kɩaa arɩ nɩalɩŋ sɩɩ yallɛ kɩaa nɩmɛ kala jaŋ sʋʋ.

¹² Tapʋlɩɩ-la mɩ jaŋ nyɩgɛ chaanɩŋ a gbilli Jerusalɛm a dɔgɩsɛ nɩalɩŋ sɩ bɩ sɩɩfɩɛsɩŋ kɛnɛ, nɩalɩŋ sɩ nagɛ sɩnɩŋ ba sɩ nyʋa aŋ ka bʋbʋɔŋ, nɩalɩŋ sɩ bɩɩna mɩ-na ba TƖƖNA bɩ jaŋ ŋaa ba wɩɩkala, wʋzɔŋ koo wʋbɔŋ.

¹³ Ba dʋndɔŋŋɔɔ jaŋ kɛŋ ba dʋa laa, aŋ ŋmoo ba dɩɩsɩŋ lo. Ba jaŋ saa dɩɩsɩŋ aŋ bɩ jaŋ jʋʋba. Ba jaŋ chɔnsɛ girep tɩɩsɩŋ, aŋ bɩ jaŋ nyʋa tɩɩsɩ-la sɩnɩŋ.”

La TƖƖNA tapʋl-balɩŋ

¹⁴ La TƖƖNA tapʋl-bal-la kpaga nɛ, ʋ kpaga nɛ a kʋkɔ lɩma lɩma. Má jegile nɩɩ, La TƖƖNA tapʋlɩɩ-la nɩaa jaŋ ŋmoo niiŋ bagɛ-bagɛ, laalɩyuori wajɩa ma jaŋ paala ŋmoo niiŋ.

¹⁵ Tapʋlɩɩ-la Wɩa jaŋ dagɛ ʋ baanɩŋ, nɩaa jaŋ na hɛɛŋ dɩ ba tʋɔŋ faasa chei, tapʋlɩɩ-la ba jaŋ chei nɩaa ka dɩ jikpeeŋ pɩŋ, ʋ jaŋ ŋaa birimiŋ tapʋlɩɩ dɩ leriŋ faasa biri, a ŋaa tapʋlɩɩ duoŋ-bɩlɩmbaanaa sɩ jaŋ tɔ dɩ leriŋ faasa biri.

¹⁶ Ba jaŋ ŋmʋʋ banyile tapʋlɩɩ-la aŋ ŋaa laalɩyuori goŋ aŋ yuyuo tabala-la ba sɩ saa kɛrɩsɩŋ golli arɩ dɩɩ-leŋie-la sɩ chɩŋ ba gʋnaa lɛ.

¹⁷ La TƖƖNA sɩ, “Mɩ jaŋ leŋ dɩ nɩaa na hɛɛŋ, ba jaŋ gɔllɔ baarɛ leriŋ a nagɛ nyʋlɩmaa, a tɩŋ ba sɩ ŋaa wʋbɔŋŋɔɔ mɩ-na ba TƖƖNA lɛ wɩaa. Ba chalɩŋ jaŋ jaasɛ a pɛllɛ nagɛ lɩɩŋ, dɩ ba kʋsʋʋnʋŋ ma pɩna pʋa.

¹⁸ Tapʋlɩɩ-la mɩ-na ba TƖƖNA sɩ jaŋ na baanɩŋ, ba warɩpʋla koo ba sɛlɩmɛ bɩ jaŋ wuo laaba ta. Mɩ yarɩ-bieri baanɩŋ jaŋ nagɛ nyiniŋ a joŋ dʋnɩa kala dii, bɛɛ wɩaa mɩ jaŋ leŋ dɩ nʋʋkala sɩ hɛ dʋnɩa lɛ guu sʋʋ.”