ZƐKARƖYA 9 - WƖA TENIŊ

Wɩa jaŋ dii Iziral tɩŋŋaa dʋndɔŋŋɔɔ sarɩya

¹ La TƖƖNA bʋl wɩaa a tɩgɛ hɛɛ-la taŋ-la ba sɩɩ yɩrɛ Hadɩrak arɩ Damasɩkʋs tabalɩŋ nɩaa sɩ jaŋ na lɛ. La TƖƖNA sɩaa pɛ nʋʋkala lɛ nɛ, Iziral tɩŋŋaa dʋndʋŋa lɛ dee.

² Ʋ jaŋ dɔgɩsɛ Hamaf sɩ kpagɛ Damasɩkʋs, a pɛ Taaya arɩ Sɩdɔŋ sɩ ŋaa tabalaa lɛ, arɩ ba nɩaa sɩ kɛŋ jɩma ma kala.

³ Taaya saa dɩ-duo nɛ a pɩ ʋ tɩtɩa, a chɛ hɔpʋla chʋɔrɛ a nagɛ hagɩla, a chɛ sɛlɩmɛ ma chʋɔrɛ a nagɛ nʋsʋrʋŋ sɩ pɩŋ womporunuŋ lɛ.

⁴ Ama La TƖƖNA jaŋ laa kɩalɩŋ Taaya sɩ kɛnɛ, a chei dol-la ʋ sɩ kɛnɛ mʋgʋ-balɩŋ lɛ. Nyiniŋ jaŋ diiu.

⁵ Tabal-la ba sɩɩ yɩrɛ Asɩkɛlɔŋ jaŋ naʋ dɩ fawʋllʋŋ kɛnʋ. Hɛɛŋ jaŋ jʋʋ taŋ-la ba sɩɩ yɩrɛ Gaza, a pɛ Ɛkʋrɔŋ lɛ, ʋ yɩɛlaa kala jaŋ lɛl. Ba jaŋ kpʋ Gaza kuoro, ka dɩ Asɩkɛlɔŋ ma pɩŋ jikpeeŋ.

⁶ Nʋhʋɔraa jaŋ hɔŋ Asɩdɔd lɛ. La TƖƖNA sɩ, “Mɩ jaŋ giri Fɩlɩsɩtɩa tɩŋŋaa babii-ballɩɩ-la ta.

⁷ Ba bɩra bɩ jaŋ chaŋ nammɩa arɩ chalɩŋ, koo a dii kʋdiile-la dɔnsʋŋ sɩɩ kɩsʋ. Nɩalɩŋ sɩ ka jaŋ ŋaa mɩ-na Wɩa nɩaa, a ŋaa sɩpaalaaraa Juda lɛ, dɩ Ɛkʋrɔŋ nɩaa ŋaa mɩ nɩaa a nagɛ Jebus tɩŋŋaa fa sɩ kʋ ŋaa mɩ nɩaa ŋɩɩ.

⁸ Ama mɩ jaŋ chɩna pɔ mɩ dɩa dɩ laalɩyuoroo bɩra sɩ́ nɩmɛ jʋʋ. Mɩ bɩra bɩ jaŋ leŋ dɩ nʋʋkala nyagɛ mɩ nɩaa bil. Lɛɛlɛ mɩ pɔ nɛ a bibeŋ.

Zaayɔŋ kuoro jaŋ kɔ

⁹ Zaayɔŋ nɩaa, má faasa jʋɔsɛ. Jerusalɛm nɩaa, má ŋaa goŋ. Ma kuoro ka kɔ ma teeŋ nɛ. Ʋ kɛŋ tʋɔpʋla nɛ a laa nɩaa tɩta, ʋ kɛŋ ʋ tɩtɩa muuri nɛ a jɩl kakumo, a sagɛ kaku-pɔrʋŋ nyuŋ.

¹⁰ Mɩ jaŋ leŋ dɩ laalɩŋ janɩŋ torukoba-la kala lɛl Efirem lɛ, arɩ laalɩŋ janɩ-la sɩ hɛ Jerusalɛm lɛ, aŋ bori ba laalɩŋ tosuŋ. Ma kuoro jaŋ heele bʋl fɩɛlɩŋ wɩaa a pɩ tinteyee nɩaa kala. Ʋ jaŋ bibeŋ nɩaa a lɩɩ mʋgʋ-balɩŋ dɔŋɔ lɛ a mʋ yi dɔŋɔ, a lɩɩ Yufireti fuo-la lɛ a kaa mʋ dʋnɩa dɩdɛrɩŋ.

¹¹ Ama ma-na mɩ nɩaa, a tɩŋ nii-la sɩ hɛ mɩ dɩ ma pɛgɛ la kɛŋ chalɩŋ magɩlɛ wɩaa, mɩ jaŋ lɩɩsɛ ma nɩalɩŋ sɩ ŋaa dansarɩkaba buotuo-la sɩ bɩ lɩɩŋ kɛnɛ lɛ.

¹² Má mɩɩra mʋ ma dɩɩ-duoruŋ, ma-na dansarɩkaba sɩ kɛŋ yɩɛlaa. Lɛɛlɛ mɩ heele bʋl arɩ mɩ jaŋ bɩra pɩma kɩaa magɛ ŋɩɩ ma fa sɩ kɛnɛ naansɩɩŋ bʋlɩa.

¹³ Mɩ jaŋ kɛŋ Juda gʋɔrɛ a nagɛ mɩ sɩ gʋɔrɛ mɩ toŋ, dɩ Efirem nɛ ŋaa ʋ to-hɛŋŋɛɛ. Mɩ jaŋ leŋ dɩ Zaayɔŋ nɩaa nagɛ laalɩyuori babii-balɩŋ tokobiiŋ, dɩ mɩ kaa yuo Giriisi nɩaa.”

La TƖƖNA jaŋ kɔ

¹⁴ La TƖƖNA jaŋ kʋ chuguli ʋ nɩaa nyuŋ. Ʋ to-hɛŋŋɛɛ jaŋ lɩlɩgɩsɛ a nagɛ taŋ sɩɩ lɩgɩsʋ. La TƖƖNA Wɩɩjarɩbakɔ jaŋ ŋmʋʋ banyile, aŋ to wɩɩpɔsʋŋ nadiiŋ pel-duoruŋ tʋɔŋ.

¹⁵ La TƖƖNA doluŋ kala Tɩɩna jaŋ chu tɔ ʋ nɩaa lɛ. Ba jaŋ kɛŋ kpalaa a yuo dii ba dʋndɔŋŋɔɔ. Ba jaŋ kpɩa goŋ laalɩŋ lɛ a nagɛ nɩaa sɩ nyʋa girep nɛnɛɛ sɩnɩŋ a bugi. Ba jaŋ leŋ dɩ ba dʋndɔŋŋɔɔ chalɩŋ jaasɛ a nagɛ ba sɩ joŋ chalɩŋ hɛ gbaŋa lɛ a mɩsɛ Wɩɩsʋllɩ koruŋ gʋnaa.

¹⁶ Ba TƖƖNA Wɩa jaŋ laaba ta tapʋlɩɩ-la a tɩŋ ba sɩ ŋaa ʋ nɩaa. Ba jaŋ tʋtʋl ʋ tinteeŋ lɛ a nagɛ kpɩɛraa ba sɩ joŋo hɛ kuori-nyunchuulo lɛ.

¹⁷ Ba jaŋ ŋaa nɩa sɩ zɔmɔ a kɛŋ buno. Bapʋɔsaa jaŋ dii tintee-la kɩaa a waa woruŋ, dɩ hatoloo ma nyʋa girep nɛnɛɛ sɩ-falɩŋ a kɛŋ buno.