ZƐKARƖYA 8 - WƖA TENIŊ

La TƖƖNA hɛ niiŋ arɩ ʋ jaŋ pɛ Jerusalɛm lɛ

¹ La TƖƖNA doluŋ kala Tɩɩna bɩra bʋl wɩaa pɩmɛ.

² Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Mɩ yaraa chaasa bibieri nɛ Zaayɔŋ wɩaa. Mɩ yaraa ka bieri ʋ wɩaa nɛ.”

³ Wɩɩ-la La TƖƖNA sɩ bʋla nɛ ŋ-la: “Mɩ jaŋ mɩɩra kɔ Zaayɔŋ a hɛ Jerusalɛm lɛ. Ŋɩɩ nɛ ba jaŋ yɩyɩrɛ Jerusalɛm tabal-la sɩ kɛŋ wʋtɩtɩɩ. Ba jaŋ yɩyɩrɛ mɩ-na ma TƖƖNA doluŋ kala Tɩɩna peeliŋ ma, Peel-la sɩ bɩ disiniŋ kɛnɛ.”

⁴ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Baalaa arɩ haalaa sɩ chaasa hɩɛsɛ jaŋ hɔŋ Jerusalɛm womporunuŋ lɛ, a kori dantɩgɩsɩŋ a tɩŋ ba sɩ hɩɛsa wɩaa.

⁵ Hambolibiisiŋ arɩ hantolibiisiŋ jaŋ su tabal-la womporunuŋ a gbigbieli.”

⁶ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Bʋa-la lɛ ʋ jaŋ wuo ŋaa wʋkpuŋkpere nɩalɩŋ nɩkaana-la teeŋ, ama ʋ bɩ jaŋ wuo ŋaa wʋkpuŋkpere mɩ-na teeŋ. Mɩ-na ma TƖƖNA doluŋ kala Tɩɩna nɛ bʋla.”

⁷ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Mɩ jaŋ laa mɩ nɩaa ta wɩɩpɔsʋŋ arɩ wɩɩjʋʋlʋŋ tinteye-la lɛ.

⁸ Mɩ jaŋ kɛmba mɩɩra kɔ dɩ ba hɔŋ Jerusalɛm lɛ. Ba jaŋ ŋaa mɩ nɩaa, dɩ mɩ kɛŋ wʋtɩtɩɩ arɩ tʋɔpʋla ba teeŋ a ŋaa ba Wɩa.”

⁹ Wɩɩ-la La TƖƖNA doluŋ kala sɩ bʋla nɛ ŋ-la: “Ma-na nɩalɩŋ lɛɛlɛ sɩɩ nɩɩ wɩalɩŋ mɩ wʋlaabʋlla-la fa sɩ bʋla bʋa-la lɛ ba sɩɩ bil mɩ-na ma TƖƖNA doluŋ kala Tɩɩna dɩɩ-bal-la gentine, má nyɩrɛ bɔyɛ a wasa saa mɩ dɩɩ-bal-la.

¹⁰ Faafaa la, ba fa bɩ nɩaa koo pʋsʋŋ ka tiŋ dɩ ba nɛ tɩma. Nʋʋkala fa bɩ ʋ tɩntɩŋŋaa wuo tɩma tɩta jɩa a tɩŋ ʋ dʋndɔmɔ wɩaa, bɛɛ wɩaa mɩ fa yigi nʋʋkala hɛ ʋ dɔŋɔ tɩɩna lɛ nɛ.

¹¹ Ama lɛɛlɛ, mɩ bɩ jaŋ ŋaa wɩaa nɩaa deemba nɩkaana-la lɛ a nagɛ mɩ fa sɩ ŋaa ŋɩɩ faafaa-la.” La TƖƖNA doluŋ kala Tɩɩna nɛ bʋla.

¹² Ba jaŋ duu ba kɩaa arɩ yarɩfɩɛlaa. Ba girep tɩɩsɩŋ jaŋ nɛŋ, tinteeŋ jaŋ leŋ dɩ kɩalɩŋ ba sɩ duo wasɛ, dɩ duonuŋ ma nɩɩ woruŋ. Mɩ jaŋ joŋ kɩaa deemba kala a pɩ mɩ nɩaa nɩkaana-la.

¹³ Tinteyee nɩaa fa kɛŋ ma-na Juda arɩ Iziral nɩaa yɩrɩŋ a ŋmɩɛsa hɩhɛ nɩaa lɛ nɛ. Ama lɛɛlɛ mɩ jaŋ laama ta a to ma lɛ a pɛ ba lɛ. Má sɩ́ leŋe dɩ fawʋllʋŋ kɛmma, má nyɩrɛ bɔyɛ.

¹⁴ Wɩɩ-la La TƖƖNA doluŋ kala bɩra sɩ bʋla nɛ ŋ-la: “A nagɛ mɩ fa sɩ kɛŋ mɩ tɩtɩa hɛ dɔŋɔ dɩ mɩ kɛŋ wʋlɔrʋŋ kʋ hɛ ma lɛ ŋɩɩ, a sɩ́ ma nenige fá a tɩŋ ma nyɩmmaba fa sɩ leŋe mɩ baanɩŋ sii wɩaa,

¹⁵ mɩ kɛŋ mɩ tɩtɩa hɛ dɔŋɔ nɛ lɛɛlɛ dɩ mɩ bɩra ŋaa wʋzɔŋŋɔɔ a pɩ Jerusalɛm arɩ Juda nɩaa. Má sɩ́ fawʋllʋŋ fá.

¹⁶ Wɩalɩŋ sɩ maga dɩ ma ŋaa nɛ ŋ-la: Má bʋl wʋtɩtɩɩ a pɩpɩ dɔŋɔ. Ma sarɩya dɩ-diilee, má to wʋtɩtɩɩ sɩ jaŋ leŋ dɩ ma hɔŋ arɩ fɩɛlɩŋ.

¹⁷ Má sɩ́ wʋbɔŋ bɩɩnʋ a mʋʋ tɩgɛ ma dɔŋɔ tɩɩna lɛ, a sɩ́ wɩaa nyɩɛ aŋ ŋmɩŋmɩɛsɛ. Mɩ bɛrɛ wɩaa deemba kala nɛ. Mɩ-na ma TƖƖNA nɛ bʋla.”

¹⁸ La TƖƖNA doluŋ kala Tɩɩna bɩra bʋl wɩaa pɩmɛ:

¹⁹ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Ma sɩ yie vɔɔ niiŋ chɛŋ-nɛsɛ, chɛŋ-nɔŋ, chɛŋ-pɛɩ arɩ chɛŋ-fii lɛ ŋɩɩ, ba jaŋ ŋaa jʋɔsa tapʋlɩa arɩ tʋɔtɔrɛ gbielee a pɩ ma Juda nɩaa. Ŋɩɩ wɩaa má cho wʋtɩtɩɩ, a hɔŋ arɩ fɩɛlɩŋ.”

²⁰ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Nɩ-daŋ arɩ tabal daŋ nɩaa ha jaŋ kɔ Jerusalɛm.

²¹ Tabalɩŋ nɩaa jaŋ mʋ tabalɩŋ dɔŋɔ nɩaa teeŋ a bʋl, ‘Má leŋ dɩ la guu mʋ La TƖƖNA doluŋ kala Tɩɩna teeŋ a sʋlʋ. La-naa mʋ nɛ.’

²² Nɩ-daŋ arɩ tintee-duoruŋ jaŋ kɔ Jerusalɛm a chɩchɛ La TƖƖNA doluŋ kala Tɩɩna dɩ ba sʋlʋ dɩ ʋ pɛ ba lɛ.”

²³ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Bʋa-la lɛ nɩaa fii jaŋ lɩɩ tintee-wogusuŋ kala sɩɩ bʋl yikorusuŋ sɩ bɩ dɔŋɔ naga, a kʋ kɛŋ Juu tɩɩna gɛrɩŋ lɛ aŋ bʋl, ‘Leŋ dɩ la to ŋ harɩŋ mʋ, bɛɛ wɩaa la nɩa arɩ Wɩa hɛ ma teeŋ nɛ.’ ”