ZƐKARƖYA 7 - WƖA TENIŊ

Má kɛŋ wʋtɩtɩɩ aa fá nɩaa nenige, nii-vɔbʋŋ dee

¹ Daarus sɩ dii kuoruŋ ʋ jɩ-nɛsɛ lɛ nɛ La TƖƖNA bʋl wɩaa pɩ Zɛkarɩya chɛŋ-nibi tʋɔŋ tapʋlaa banɛsɛ chɛɛŋ, chɛnɛ-la ba sɩɩ yɩrɛ Kɩsɩlɛf nɛ ŋɩɩ.

² Bɛtɛl nɩaa fa tɩŋ Sarɛza arɩ Regem-Mɛlɛk nɛ, a pɛ ba nɩaa dɔnsʋŋ lɛ dɩ ba mʋ chɛ na wɩɩ-la La TƖƖNA sɩɩ chɛ.

³ Dɩ ba pɩɛsɛ Wɩɩsʋllɩ sɩpaalaaraa sɩ hɛ La TƖƖNA doluŋ kala Tɩɩna dɩa lɛ arɩ Wɩa wʋlaabʋllaa wɩɩŋ deeŋ, “Ʋ maga dɩ la ha yel aŋ vɔɔ niiŋ chɛŋ-nɔŋ lɛ arɩ ŋɩɩ la sɩ vɛnɛɛ ŋaa jɩ-daŋ-la sɩ bala lɛ nɛɛ?”

⁴ Ŋɩɩ nɛ La TƖƖNA doluŋ kala Tɩɩna bʋla pɩmɛ:

⁵ “Pɩɛsɛ tintee-la nɩaa arɩ Wɩɩsʋllɩ sɩpaalaaraa kala: Ma sɩ vɔɔ niiŋ a yel chɛŋ-nɔŋ arɩ chɛŋ-pɛɩ tʋɔŋ jɩsɩŋ mahɩŋ batori arɩ fii-la kala sɩ bala lɛ, mɩ wɩaa nɛ ma sɛnɛ vɔɔ nii-la?

⁶ Ma fa sɩ yie gbiele dii kɩaa aŋ nyʋnyʋa kɩaa, ma tɩtɩa dee ma ŋaa wɩaa deemba a pɩpaa?

⁷ Wɩɩ-la tɩtɩa mɩ-na ma TƖƖNA sɩ to mɩ wʋlaabʋlla-la sɩ laa sɩpaaŋ kɔ, bʋa-la lɛ Jerusalɛm arɩ ʋ tasɩ-la sɩ gollu fa sɩ kɛŋ nɩaa yʋgɛ ba hɔŋ sɔm a kɛŋ dʋa, a pɛ wɩɩpɔsʋŋ nadiiŋ dɩɩrɩŋ arɩ wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ a bʋl nɛ ŋɩɩ.”

⁸ La TƖƖNA bɩra bʋl wɩaa a pɩ Zɛkarɩya:

⁹ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má leŋ dɩ wʋtɩtɩɩ chaasa chɩŋ ʋ bʋa lɛ. Má fɩfá nɩaa nenige, a fɩfá dɔŋɔba nisusuŋ.

¹⁰ Má sɩ́ yo-haalaa, biisinsiŋ, nʋhʋɔraa arɩ summoo nyaga bil. Má sɩ́ wʋbɔŋŋɔɔ bɩɩnʋ a mʋʋ tɩgɛ dɔŋɔba lɛ.

¹¹ Ama ba vɩa dɩ ba jegile nɩɩ nɛ. Ba kɛŋ nyuduoŋ nɛ a joŋ harɩŋ yɩa wɩalɩŋ a bɩ chɛ ba jʋʋ ba dɩgɩlaa.

¹² Ba leŋe ba tʋɔŋ dol nɛ a nagɛ tabɩɩ-naŋkpachɩla a bɩ chɛ ba jegile nɩɩ wombie-la mɩ-na ba TƖƖNA sɩ bile dɩ ba tuto koo wɩalɩŋ mɩ-na ba TƖƖNA doluŋ kala Tɩɩna sɩ to mɩ Dɩma lɛ a bʋla pɩ mɩ wʋlaabʋlla-la sɩ laa sɩpaaŋ kɔ. Ŋɩɩ nɛ mɩ-na ba TƖƖNA doluŋ kala Tɩɩna faasa na baanɩŋ ba nyuŋ.

¹³ Mɩ fa sɩ bʋl wɩaa pɩba, ba bɩ jegile nɩɩ, ŋɩɩ wɩaa ba ma sɩ yɩrɛmɛ, mɩ bɩ jegile nɩɩ. Mɩ-na ma TƖƖNA doluŋ kala Tɩɩna nɛ bʋla.

¹⁴ Mɩ leŋe pel-duo nɛ kɛmba pɩsa hɛ tinteyee lɛ, ba ŋaa nʋhʋɔra. Tintee-la fa pɩŋ hoi nɛ, nʋʋkala bɩ nɩmɛ ka mʋ koo a lɩɩ nɩmɛ kʋkɔ. Wɩalɩŋ ba sɩ ŋaa a leŋ tintee-zɔŋ-la pɩŋ hoi nɛ ŋɩɩ.”