ZƐKARƖYA 6 - WƖA TENIŊ

Laalɩŋ janɩŋ torukoba banɛsɛ

¹ Mɩ bɩra beŋ, a na laalɩŋ janɩŋ torukoba banɛsɛ dɩ ba lɩɩ kɔlɩɩŋ peelee balɩa pɛgɛ a kʋkɔ.

² Laalɩŋ janɩŋ toruko bumbuŋ janɩŋ ŋaa kʋfɩɛsɩŋ nɛ, lɩa kʋa ma janɩŋ ŋaa kʋbisi,

³ tori kʋa ma janɩŋ ŋaa kʋpʋlʋŋ, nɛsɛ kʋa janɩŋ ma ŋaa kʋŋmʋŋmʋnaa. Ba kala ŋaa ja-duoru nɛ.

⁴ Mɩ pɩɛsɛ Wɩa tɩndaarʋ-la sɩɩ bʋl wɩaa mɩ teeŋ, “Mɩ nɩhɩaŋ, bɛɛ kɩaa nɛ kɩaa deemba?”

⁵ Ʋ bʋla pɩmɛ, “Dɩnsɩŋ banɛsɛ sɩ hɛ Wɩa-jaŋ lɛ nɛ ŋɩɩ. Ba lɩɩ La TƖƖNA sɩ tɩɩ dʋnɩa kala sɩpaaŋ nɛ a kʋkɔ ŋɩɩ.

⁶ Laalɩŋ janɩŋ toruko-la sɩ kɛŋ ja-bisiŋ ka mʋ wɩɩpɔsʋŋ nagʋa dɩɩrɩŋ tinteeŋ nɛ, kʋ-la ma sɩ kɛŋ ja-pʋllʋŋ mʋmʋ wɩɩjʋʋlʋŋ dɩɩrɩŋ, kʋ-la ma sɩ kɛŋ ja-ŋmʋŋmʋnaa ka mʋ wɩɩpɔsʋŋ nadiiŋ dɩɩrɩŋ nɛ.”

⁷ Ja-duoru-la sɩ lɩa, ba kpʋkpʋ ba tɩtɩa dɩ ba wuo gɔllɛ dʋnɩa kala. Wɩa tɩndaarʋ-la bʋl, “Má gɔllɛ dʋnɩa kala.” Ŋɩɩ nɛ ba gɔllɛ ʋ kala.

⁸ Ŋɩɩ nɛ Wɩa tɩndaarʋ-la yɩrɛmɛ a bʋl, “Bee na, janɩ-la sɩɩ mʋ wɩɩpɔsʋŋ nagʋa dɩɩrɩŋ tinteeŋ leŋe mɩ Dɩma na wiesee nɛ wɩɩpɔsʋŋ nagʋa tintee-la lɛ.”

Josua kuoru nyunchuulo

⁹ Ŋɩɩ nɛ La TƖƖNA bʋl wɩaa pɩmɛ:

¹⁰ Laa hɔpʋla arɩ sɛlɩmɛ nɩaa deemba sɩ lɩɩ yoŋ-baga Babɩlɔŋ lɛ a kɔ teeŋ: Hɛlɩdaɩ, Tobija arɩ Jedaaya. Tapʋlɩɩ-la tɩtɩa, mʋ Zefanaaya nanʋala Josaaya dɩa.

¹¹ Kɛŋ hɔpʋla-la arɩ sɛlɩmɛ-la a ŋaa kuoru nyunchuulo a joŋo chu Jehozadak nanʋala Josua sɩ ŋaa Wɩɩsʋllɩ sɩpaalaaraa nɩhɩaŋ.

¹² Bʋla pʋ wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: “Baal-la ba sɩɩ yɩrɛ Naakeliŋ nɛ ŋ-la. Ʋ jaŋ kele lɩɩ ʋ lee-la ʋ sɩ hɛ, a saa mɩ-na ma TƖƖNA dɩɩ-bal-la.

¹³ Ʋ nɛ jaŋ saa mɩ-na ma TƖƖNA dɩɩ-bal-la, ʋ jaŋ kɛŋ yɩrɩŋ woruŋ. Ʋ jaŋ hɔŋ ʋ kuoru kpasa nyuŋ a beŋ ʋ nɩaa, a bɩra ŋaa nʋʋ sɩ jaŋ laa nɩaa nyuŋ a tɩma pɩpɩ mɩ-na Wɩa. Ʋ jaŋ ŋaa wɩalɩŋ balɩa kala hɩhɛ dɔŋɔ dɩ fɩɛlɩŋ hɛ nɩmɛ.

¹⁴ Kuori nyunchuul-la jaŋ hɛ mɩ-na ma TƖƖNA dɩɩ-bal-la lɛ dɩ ba kaa liliisi Hɛlɩdaɩ, Tobija, Jedaaya arɩ Zefanaaya nanʋala Josaaya wɩaa.”

¹⁵ Nɩalɩŋ sɩ hɛ dɩ-bolii jaŋ kʋ pɛ dɩ ma saa La TƖƖNA dɩɩ-bal-la, dɩ ŋɩɩ nɛ ŋaa, ma jaŋ jɩŋ arɩ La TƖƖNA doluŋ kala Tɩɩna nɛ tɩmmɛ ma teeŋ. Wɩɩŋ deeŋ jaŋ ŋaa dɩ ma nɛ chaasa to ma TƖƖNA Wɩa niiŋ.