ZƐKARƖYA 4 - WƖA TENIŊ

Ba sɩ kɛŋ sɛlɩmɛ ŋaa chaaŋ daaŋ arɩ Olif tɩɩsɩŋ balɩa

¹ Ŋɩɩ nɛ Wɩa tɩndaarʋ-la sɩɩ bʋl wɩaa mɩ teeŋ mɩɩra kɔ a chɩsɛmɛ a nagɛ ba sɩ chɩsɛ nɩa doŋ lɛ.

² Ʋ pɩɛsɛmɛ, “Bɛɛ kʋŋ nɛ ŋ na?” Mɩ bʋl, “Mɩ na ba sɩ kɛŋ sɛlɩmɛ ŋaa chaaŋ daaŋ, chaaŋ gbaŋa daŋ ʋ nyuŋ, chaanaa balɩpɛ hɛ nɩmɛ a kɛŋ chaaŋ ŋmɛnɩŋ leree ma balɩpɛ.

³ Olif tɩɩsɩŋ balɩa ma nɛ fa chɩna kpagʋ. Dɔŋɔ hɛ gbaŋa-la nadiiŋ, dɔŋɔ ma hɛ nagʋa.”

⁴ Ŋɩɩ nɛ mɩ pɩɛsɛ Wɩa tɩndaarʋ-la sɩɩ bʋl wɩaa mɩ teeŋ, “Mɩ nɩhɩaŋ, bɛɛ kɩaa nɛ ŋ-la?”

⁵ Ʋ bʋl, “Ŋ bɩ kɩaa deemba jɩŋ?” Mɩ bʋl, “Aɩ, mɩ nɩhɩaŋ.”

⁶ Ŋɩɩ nɛ ʋ bʋla pɩmɛ, “Wɩɩ-la La TƖƖNA sɩ bʋla pɩ Zerubabɛl nɛ ŋ-la: ‘Ŋ ballɩŋ lɛ dee koo ŋ doluŋ lɛ dee ŋ jaŋ yuo dii, ama mɩ-na Wɩa Dɩma lɛ nɛ ŋ jaŋ to yuo dii.’ La TƖƖNA doluŋ kala Tɩɩna nɛ bʋla.

⁷ Peel-duo, ŋ nɛ kʋbɛɛ? Ŋ jaŋ bɩrɩmɛ tintee-taala Zerubabɛl sɩpaaŋ. Ŋɩɩ nɛ ʋ jaŋ joŋ tiebii-katɩɩ a daŋ, ka dɩ nɩaa ŋaa goŋ a bʋl, ‘Wɩa jaŋ pɛ! Wɩa jaŋ pɛ!’ ”

⁸ Ŋɩɩ nɛ La TƖƖNA bʋl wɩaa pɩmɛ:

⁹ Ʋ sɩ, “Zerubabɛl nɛ bil mɩ dɩɩ-balɩŋ deeŋ gentine. Ʋ nɛ saa jaŋ saaʋ dɛrɛ ma, dɩ ŋɩɩ nɛ ŋaa, mɩ nɩaa jaŋ jɩŋ arɩ ba TƖƖNA doluŋ kala Tɩɩna nɛ tɩmmɛ ba teeŋ.

¹⁰ Má sɩ́ bee gʋʋnɛ wɩaa dɩ-suomuŋ sɩ muuro. Nɩaa tʋɔŋ jaŋ tɔrɛ dɩ ba nɛ na Zerubabɛl kori dɩɩsaarɩ-ŋmɛnɩŋ. Chaaŋ ŋmɛsɩ-la balɩpɛ nɛ ŋaa mɩ-na Wɩa sɩaa mɩ kaa bibeŋ dʋnɩa kala.”

¹¹ Ŋɩɩ nɛ mɩ pɩɛsɛ Wɩa tɩndaarʋ-la, “Bɛɛ kɩaa nɛ olif tɩɩsɩŋ deemba balɩa sɩ hɛ chaaŋ daaŋ nadiiŋ arɩ nagʋa ŋɩɩ?”

¹² Mɩ bɩra pɩɛsʋ, “Bɛɛ kɩaa nɛ olif naakelee deemba balɩa sɩ hɛ sɛlɩmɛ fuolo-ŋmʋlba-la balɩa sɛmɛ, olif nʋʋŋ lɩlɩɩ ba lɛ?”

¹³ Ʋ bʋl, “Ŋ bɩ kɩaa deemba jɩŋ?” Mɩ bʋl, “Aɩ, mɩ nɩhɩaŋ.”

¹⁴ Ŋɩɩ nɛ ʋ bʋl, “Kɩaa deemba balɩa ŋaa nɩa nɛ Wɩa lɩɩsɛ dɩ ba tɩma pɩpɩ ʋ-na La TƖƖNA sɩ tɩɩ dʋnɩa kala.”