ZƐKARƖYA 2 - WƖA TENIŊ

Baala sɩ kori ŋmɛnɩŋ ba sɩ kaa mɩmagɩsɛ kɩaa

¹ Ŋɩɩ nɛ mɩ beŋ a na baal kʋbala dɩ ʋ kori ŋmɛnɩŋ ba sɩ kaa mɩmagɩsɛ kɩaa.

² Mɩ pɩɛsʋ, “Nɩɩ nɛ ŋ mʋmʋ?” Ʋ bʋla pɩmɛ, “Mɩɩ mʋ mɩ magɩsɛ Jerusalɛm nɛ, a na ʋ jalɩŋ arɩ ʋ duomuŋ sɩ magɛ ŋɩɩ.”

³ Ŋɩɩ nɛ Wɩa tɩndaarʋ-la fa sɩɩ bʋl wɩaa mɩ teeŋ viviiri, Wɩa tɩndaara dɔŋɔ kʋ chemu

⁴ a bʋla pʋ: “Fá mʋ bʋla pɩ bapʋɔsɩ-bie-la, ‘Jerusalɛm jaŋ ŋaa tabal kɛrɩsɩŋ sɩ bɩ gollo, a tɩŋ nɩaa arɩ pʋsʋŋ sɩ jaŋ faasa yʋgɛ ʋ lɛ wɩaa.

⁵ Mɩ tɩtɩa jaŋ nagɛ kɛrɛ sɩ kɛŋ nyiniŋ a gollu, mɩ jaŋ hɛ ʋ tʋɔŋ a ŋaa ʋ tʋla.’ ” La TƖƖNA nɛ bʋla.

⁶ La TƖƖNA sɩ, “Má kɔ, má kɔ. Má fá lɩɩ wɩɩpɔsʋŋ nagʋa tinteeŋ lɛ. Mɩ kɛmma pɩsa hɛ dʋnɩa loŋgorunuŋ banɛsɛ-la lɛ nɛ.

⁷ Má kɔ, má foro fá lɩɩ Babɩlɔŋ lɛ a mɩɩra kɔ Jerusalɛm.”

⁸ Wɩɩ-la La TƖƖNA doluŋ kala Tɩɩna sɩ bʋla nɛ ŋ-la, “Ʋ sɩ zilmi harɩŋ lɛ nɛ, ʋ tɩmmɛ tinteye-la sɩ yuo paa ma kɩaa teeŋ. Nɩɩ-la kala sɩ digima, ʋ tʋʋ mɩ-na Wɩa sɩɩŋ lɛ nɛ ŋɩɩ.

⁹ Mɩ jaŋ sɛnɛ lɩɩsɛ mɩ nɩsɩŋ liesiba, dɩ ba tɩtɩa yosuŋ yuo diiba a paa ba kɩaa. Ŋɩɩ lɛ nɛ ma jaŋ jɩŋ arɩ La TƖƖNA doluŋ kala Tɩɩna nɛ tɩmmɛ.”

¹⁰ La TƖƖNA sɩ, “Jerusalɛm nɩaa, má ŋaa goŋ arɩ tʋɔtɔrʋŋ. Mɩɩ kɔ nɛ dɩ mɩ hɛ ma tʋɔŋ.”

¹¹ Tinteyee jaŋ yʋgɛ dɩ ba nɩaa kɔ La TƖƖNA teeŋ bʋa-la lɛ, a ŋaa ʋ nɩaa. Mɩ jaŋ hɛ ma tʋɔŋ, dɩ ma jɩŋ arɩ La TƖƖNA doluŋ kala Tɩɩna nɛ tɩmmɛ ma teeŋ.

¹² La TƖƖNA jaŋ laa Juda tɩɩ dɩ ʋ ŋaa ʋ kpaalɩŋ tintee-la sɩ bɩ disiniŋ kɛnɛ lɛ, aŋ bɩra lɩɩsɛ Jerusalɛm dɩ ʋ ŋaa tabal-la ʋ sɩ cho.

¹³ Nuhuobiinee kala, má chɩŋ sɔm La TƖƖNA sɩpaaŋ, bɛɛ wɩaa ʋ sii ʋ dɩjʋʋlʋŋ sɩ bɩ disiniŋ kɛnɛ lɛ nɛ a kʋkɔ.