ZƐKARƖYA 13 - WƖA TENIŊ

La Tɩɩna jaŋ pɩɩsɛ Jerusalɛm nɩaa wʋbɔŋŋɔɔ ta

¹ La TƖƖNA sɩ, “Tapʋlɩɩ-la mɩ jaŋ suri lɩɩ-bul-sɩɩŋ a pɩ Devit doho nɩaa arɩ Jerusalɛm nɩaa, a chɛsɛ ba wʋbɔŋŋɔɔ arɩ ba disiniŋ ta.

² Tapʋlɩɩ-la, mɩ jaŋ lɩɩsɛ tɔŋŋɔɔ yɩraa ta tintee-la lɛ, dɩ nɩaa bɩra sɩ́ ba wɩaa liisu. Mɩ-na ma TƖƖNA doluŋ kala Tɩɩna nɛ bʋla. Mɩ jaŋ lɩɩsɛ ba nɩalɩŋ sɩ nyɩa wɩaa arɩ ba ŋaa mɩ wʋlaabʋllaa arɩ jɩnsɩ-la sɩ kɛmba tɩtɩŋ ta tintee-la lɛ.

³ Dɩ nʋʋkala nɛ ha pɛsɛ a nyɩɛ bʋbʋl wɩaa mɩ yɩrɩŋ lɛ, ʋ nyɩmma arɩ ʋ naaŋ-la sɩ lʋlʋ jaŋ bʋla pʋ, ‘Ʋ maga ba kpʋŋ nɛ, bɛɛ wɩaa ŋ nyɩɛ wɩaa nɛ La TƖƖNA yɩrɩŋ lɛ.’ Dɩ ʋ nɛ nyɩɛ bʋl wɩaa mɩ yɩrɩŋ lɛ, ʋ nyɩmma arɩ ʋ naaŋ jaŋ tɔbʋ kpʋ.

⁴ Tapʋlɩɩ-la, hɩɩsɩŋ jaŋ kɛŋ wʋnyɩɛrɩ wʋlaabʋllʋ kala a mʋ tɩgɛ wɩalɩŋ ʋ sɩɩ na arɩ duosoo tʋɔŋ lɛ. Ʋ bɩ jaŋ laalɛ ʋ wʋnyɩɛrɩ wʋlaabʋllʋ gɛrɩŋ sɩ kɛŋ pʋnaa aa nyɩsɛ nɩaa.

⁵ Ʋ jaŋ bʋl, ‘Mɩ bɩ Wɩa wʋlaabʋllʋ ŋaa. Mɩ ŋaa paarʋ nɛ, mɩ pɛrɛ ŋɩɩ nɛ mɩ bapʋɔsʋŋ kala lɛ.’

⁶ Dɩ nʋʋ nɛ pɩɛsʋ, ‘Bɛɛ kɩaa naawɩɩla nɛ hɛ ŋ yaraa lɛ ŋɩɩ?’ Ʋ jaŋ bʋl, ‘Mɩ nandɔŋɔ dɩa lɛ nɛ ba pɩrɛmɛ.’ ”

Ba kpʋ pie-daara ka piesee pɩsɛ

⁷ La TƖƖNA doluŋ kala Tɩɩna sɩ, “Tokobiiŋ, sii chɩŋ mɩ pie-daara lɛ, sii chɩŋ nɩɩ-la sɩ kpagɛmɛ lɛ. Kpʋ pie-daarʋ-la, piese-la jaŋ pɩsɛ, ka dɩ mɩ joŋ sɩaa chaasɛ pie-biisi-la.”

⁸ La TƖƖNA bɩra sɩ, “Tintee-la kala lɛ, dɩ ŋ nɛ kɛŋ nɩalɩŋ kpaa leree batori, mɩ jaŋ ŋmoo leree balɩa kala lo dɩ ba sʋʋ, ama kʋbala ha jaŋ ka.

⁹ Kʋbala deeŋ ma, mɩ jaŋ joŋu hɛ nyiniŋ lɛ. Mɩ jaŋ wasɛba ta a nagɛ ba sɩ yie joŋ hɔpʋla hɛ nyiniŋ lɛ a lɩɩsɛ ʋ hɔɔ-bɩnɩŋ ta ŋɩɩ. Mɩ jaŋ magɩsɛba na a nagɛ ba sɩ yie joŋ sɛlɩmɛ hɛ nyiniŋ lɛ a magɩsa na ʋ zɔmʋŋ ŋɩɩ. Ba jaŋ yɩrɛmɛ dɩ mɩ sɛɩ. Mɩ jaŋ bʋl, ‘Ba ŋaa mɩ nɩaa nɛ,’ dɩ ba ma bʋl, ‘La TƖƖNA nɛ la Wɩa.’ ”