ZƐKARƖYA 1 - WƖA TENIŊ

La TƖƖNA yɩrɛ ʋ nɩaa dɩ ba mɩɩra kɔ ʋ teeŋ

¹ Daarus sɩ dii kuoruŋ ʋ jɩ-lɩa chɛŋ-chori tʋɔŋ, La TƖƖNA bʋl wɩaa pɩ ʋ wʋlaabʋlla Zɛkarɩya sɩ ŋaa Bɛrɛkɩa nanʋala, aŋ ŋaa Ido ma nihiŋ.

² Ʋ sɩ, “Mɩ-na ma TƖƖNA fa chaasa na baanɩŋ nɛ woruŋ ma naabalɩmaba nyuŋ.

³ Ŋɩɩ wɩaa bʋla pɩ nɩalɩŋ: Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Má mɩɩra kɔ mɩ teeŋ, mɩ ma jaŋ mɩɩra kɔ ma teeŋ. Mɩ-na ma TƖƖNA doluŋ kala Tɩɩna nɛ bʋla.

⁴ Má sɩ́ ma naabalɩmaba nagʋ, ba nɛ mɩ wʋlaabʋlla-la laa sɩpaaŋ kʋ bʋla pa ŋɩɩ: Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ: ‘Má bɩrɩma lɩɩ ma wombii-bɔŋŋɔɔ arɩ wʋbɔmɔ-la ma sɩɩ ŋaa lɛ.’ Ama ba bɩ jegile nɩɩ mɩ teeŋ koo a kaa tɩŋ. Mɩ-na ma TƖƖNA nɛ bʋla.

⁵ Nɩɩ nɛ ma naabalɩmaba-la hɛ lɛɛlɛ? Mɩ wʋlaabʋlla-la ma, ba hɛ nɩmɛ a kaa mʋ wuu nɛɛ?

⁶ Ama mɩ niiŋ wɩaa arɩ mɩ niiri-la mɩ sɩ joŋo dagɛ mɩ tɩntɩnnaa sɩ ŋaa mɩ wʋlaabʋllaa dii ma naabalɩmaba nɛ. Ŋɩɩ nɛ ba bɩrɩma lɩɩ ba wʋbɔŋŋɔɔ lɛ aŋ bʋl, ‘La TƖƖNA doluŋ kala Tɩɩna joŋ la wombiee arɩ la wʋŋaalaa sɩ nagɛ ŋɩɩ chɩmɩŋ nɛ a tiŋ la lɛ, arɩ ŋɩɩ ʋ sɩ bɩɩna dɩ ʋ ŋaa.’ ”

Baal-la sɩ hɛ chɛyɛɛ tʋɔŋ

⁷ Daarus sɩ dii kuoruŋ ʋ jɩ-lɩa lɛ chɛŋ fii arɩ kʋbala tapʋlaa mara arɩ banɛsɛ chɛɛŋ, chɛnɛ-la ba sɩɩ yɩrɛ Sɛbat tʋɔŋ, La TƖƖNA bɩra bʋl wɩaa pɩ ʋ wʋlaabʋlla Zɛkarɩya sɩ ŋaa Bɛrɛkɩa nanʋala, aŋ ŋaa Ido ma nihiŋ.

⁸ Tɩtaŋɩŋ mɩ na wɩaa a nagɛ duosoo tʋɔŋ. Mɩ na baala sɩ jɩl ja-fɩaŋ. Ʋ fa chɩŋ chɛyɛɛ tʋɔŋ nɛ fuonaa-luŋii kʋbala lɛ, ka ja-fɩaŋ, ja-bʋgʋŋ arɩ ja-pʋla hɛ ʋ harɩŋ.

⁹ Ŋɩɩ nɛ mɩ pɩɛsɛ, “Mɩ nɩhɩaŋ, bɛɛ kɩaa nɛ ŋ-la?” Wɩa tɩndaarʋ-la fa sɩɩ bʋl wɩaa mɩ teeŋ bʋl, “Mɩ jaŋ dagɩŋ kɩalɩŋ ba sɩ ŋaa.”

¹⁰ Ŋɩɩ nɛ baal-la sɩ chɩŋ chɛyɛ-la tʋɔŋ bʋl, “Ba nɛ ŋaa kɩalɩŋ La TƖƖNA sɩ tɩma dɩ ba gɔllɔ beŋ dʋnɩa.”

¹¹ Ŋɩɩ nɛ ba bʋla pɩ La TƖƖNA tɩndaarʋ-la fa sɩ chɩŋ chɛyɛ-la tʋɔŋ, “La gɔllɛ dʋnɩa kala nɛ a na dɩ ʋ fɩɛla pɩŋ, wʋwalɩmɩɩ tuo.”

¹² Ŋɩɩ nɛ La TƖƖNA tɩndaarʋ-la bʋl, “La TƖƖNA doluŋ kala Tɩɩna, ɛɛ nɛ ŋŋ chɛ ŋ vɩa Jerusalɛm nɩaa arɩ Juda tasɩŋ nenige fanɩŋ a diene magɛ, nɩalɩŋ nyuŋ ŋ sɩ na baanɩŋ jɩsɩŋ mahɩŋ batori arɩ fii?”

¹³ Ŋɩɩ nɛ La TƖƖNA fɩɛlɛ bʋl wɩaa sɩ zɔmɔ a tutuu tʋɔŋ a pɩ ʋ tɩndaarʋ-la sɩɩ bʋl wɩaa mɩ teeŋ.

¹⁴ Ŋɩɩ nɛ Wɩa tɩndaarʋ-la sɩɩ bʋl wɩaa mɩ teeŋ sɩ, “Heele bʋl wɩɩŋ deeŋ: Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: ‘Mɩ yaraa chaasa bibieri Jerusalɛm nɩaa arɩ Zaayɔŋ wɩaa nɛ.

¹⁵ Ama mɩ baanɩŋ chaasa sisii tinteye-la sɩ hɔnɔ wɩɩkala bɩ baa walɩmɛ nyuŋ nɛ. Mɩ fa na baanɩŋ mʋa nɛ mɩ nɩaa nyuŋ, ka nɩalɩŋ mɩɩra leŋ ba hɛɛŋ yʋgɛ.’

¹⁶ Ŋɩɩ wɩaa, wɩɩ-la La TƖƖNA sɩ bʋla nɛ ŋ-la: ‘Mɩ jaŋ mɩɩra kɔ a fá Jerusalɛm nɩaa nenige, dɩ ba paa mɩ dɩɩ-bal-la wasa saa nɩmɛ. Mɩ jaŋ kɛŋ ŋmɛŋ-la ba sɩ kaa mɩmagɩsɛ kɩaa a magɩsa lɩɩsɛ Jerusalɛm,’ La TƖƖNA doluŋ kala Tɩɩna nɛ bʋla.

¹⁷ Ha heele bʋl: Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: ‘Dʋa jaŋ bɩra yʋgɛ mɩ tasɩŋ lɛ. Mɩ-na ma TƖƖNA jaŋ nyagɛ Zaayɔŋ bɔyɛ, aŋ lɩɩsɛ Jerusalɛm dɩ ʋ ŋaa mɩ tabalɩŋ.’ ”

Nyilliŋ banɛsɛ arɩ libiree ma banɛsɛ

¹⁸ Ŋɩɩ nɛ mɩ beŋ a na nyilliŋ banɛsɛ mɩ sɩpaaŋ.

¹⁹ Ŋɩɩ nɛ mɩ pɩɛsɛ Wɩa tɩndaarʋ-la sɩɩ bʋl wɩaa mɩ teeŋ, “Bɛɛ kɩaa nɛ ŋ-la?” Ʋ bʋla pɩmɛ, “Nyilliŋ deemba nɛ pɩsɛ Juda, Iziral arɩ Jerusalɛm nɩaa ŋɩɩ.”

²⁰ Ŋɩɩ nɛ La TƖƖNA dagɛmɛ libiree banɛsɛ.

²¹ Mɩ pɩɛsɛ, “Bɛɛ kʋŋ nɛ kɩaa deemba arɩ nɩaa deemba kʋkɔ dɩ ba ŋaa?” Ʋ bʋl, “Nyilliŋ deemba nɛ pɩsɛ Juda dɩ nʋʋkala sɩ wuo kɛŋ nyuŋ je nɩmɛ. Ama libire-la kɔ dɩ ba joŋ fawʋllʋŋ hɛ ba lɛ nɛ a chei tinteyee nɩaa dol-la ba sɩ kaa pɛsɛ Juda lɛ dɩ ba leŋ dɩ ʋ nɩaa pɩsɛ.”