WƖA YƖƖLAA 60 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ bʋa-la lɛ ʋ sɩ mʋ yuo Aram Naharem arɩ Aram Zoba, arɩ bʋa-la lɛ Jʋa sɩ mʋ kpʋ Ɛdɔm tɩŋŋaa bʋɩ fii arɩ balɩa Yɩsɩŋ Fuonaaŋ lɛ aŋ mɩɩra kɔ.

¹ Wɩa, ŋ fa na baanɩŋ nɛ la nyuŋ a vɩala ta, la bɩ doluŋ kɛnɛ. Leŋ dɩ la bɩra kɛŋ doluŋ.

² Ŋ leŋe tinteeŋ zigili nɛ a faasa yɛrɛ. Leŋ dɩ dɩ-yɛrɩɛ-la bɩra tɔ, bɛɛ wɩaa ʋ haa zigili nɛ.

³ Ŋ leŋe ŋ nɩaa na hɛɛŋ kɩŋkɛŋ nɛ. La kala bugo nɛ a gɩgɛrɛ a nagɛ nɩaa sɩ nyʋa sɩnɩŋ bugi.

⁴ Ama nɩalɩŋ sɩɩ fáŋ, ŋ kɛŋ ŋ jɔnjɔŋ je nɛ a dagɛba dɩ ba fá a laa ba mɩɩsɩŋ.

⁵ Kɛŋ ŋ naduo-la pɛ la lɛ a laala ta. Laa nɩalɩŋ ŋ sɩ cho ta.

⁶ Wɩa bʋl ŋ-la nɛ ʋ dɩɩ-bal-la lɛ: “Mɩ tʋɔŋ jaŋ tɔrɛ dɩ mɩ kɛŋ taŋ-la ba sɩɩ yɩrɛ Sɛkɛm a kaa kpaa, a kɛŋ fuonaa-la ba sɩɩ yɩrɛ Sʋkɔf ma kpaa a pɩ mɩ nɩaa.

⁷ Mɩ nɛ tɩɩ Gɩlɩad tinteeŋ, a tɩɩ Manasɛ tinteeŋ ma. Efirem nɛ ŋaa mɩ laalɩyuori nyunchu-gbaŋkogo, ka Juda ma ŋaa mɩ kuoru dantɩga.

⁸ Mʋab nɛ ŋaa gbaŋa-la mɩ sɩ kaa ŋaa lɩɩŋ a sʋsɔŋ mɩ naasɩŋ. Ɛdɔm tinteeŋ lɛ nɛ mɩ yie chaarɛ mɩ nɛntɛŋŋɛɛ bil, aŋ ŋaa laalɩyuori diiri goŋ Fɩlɩsɩtɩa tɩŋŋaa lɛ.”

⁹ Kʋbɛɛ nɛ jaŋ kɛmmɛ kɔ taŋ-la ba sɩ saa kɛrɛ golli? Kʋbɛɛ nɛ jaŋ laa mɩ sɩpaaŋ a kɛmmɛ kɔ Ɛdɔm tinteeŋ?

¹⁰ Wɩa, ŋ nɛ vɩala ta, a bɩra bɩ la laalɩyuoroo kaa mʋ laalɩŋ.

¹¹ Pɛ la lɛ dɩ la yuo la dʋndɔŋŋɔɔ, nuhuobiine pɛnɩŋ bɩ bʋbʋa kala kɛnɛ.

¹² Wɩa chɩŋ la harɩŋ nɛ, la jaŋ yuo dii. Ʋ jaŋ yuo dii la dʋndɔŋŋɔɔ.