WƖA YƖƖLAA 2 - WƖA TENIŊ

Kuoru-la Wɩa sɩ lɩɩsa

¹ Bɛɛ nɛ tɩɩ tinteyee pɛ niiŋ, ba nɩaa vʋvʋʋrɛ wʋpɛɩba?

² Tinteeŋ kuoroo kʋ hɛ dɔŋɔ lɛ nɛ dɩ ba yuo La Tɩɩna arɩ Nɩɩ-la ʋ sɩ lɩɩsa.

³ Ba sɩ, “Má leŋ dɩ la yuo laa la tɩtɩa ba nɩsɩŋ lɛ dɩ ba bɩra sɩ́ la bibeŋ.”

⁴ La Tɩɩna sɩ hɔŋ ʋ kuoru kpasa nyuŋ Wɩa-jaŋ lɛ mɔŋ, aŋ sieri tinteye-la sɩ vʋʋrɛ wʋpɛɩba-la lɛ.

⁵ La Tɩɩna na baanɩŋ a kpɩa ba lɛ a leŋ fawʋllʋŋ kɛmba aŋ bʋl,

⁶ “Mɩ bil mɩ kuoro nɛ Zaayɔŋ lɛ, mɩ dundolo-la mɩ sɩ lɩɩsa pɩ mɩ tɩtɩa lɛ.”

⁷ Kuoru-la sɩ, “Mɩ jaŋ heele bʋl wɩɩ-la La Tɩɩna sɩ bʋla. Ʋ bʋla pɩmɛ, ‘Ŋ ŋaa mɩ Bii nɛ, jɩnɩŋ mɩ nɛ lʋlʋŋ.

⁸ Pɩɛsɛmɛ, mɩ jaŋ joŋ tinteye-la kala sɩ hɛ tinteeŋ lɛ a pɩŋ dɩ ba ŋaa ŋ kɩaa.

⁹ Ŋ jaŋ bemba arɩ hɔɔ-daaŋ, a kɛnʋ yɛrɛba a nagɛ ba sɩ yie ŋmoo pupoiŋ ʋ yɛrɛ ŋɩɩ muno muno.’ ”

¹⁰ Ŋɩɩ wɩaa, ma dʋnɩa kuoru-balaa arɩ kuoru-biisiŋ, má kɛŋ wʋjɩmɩŋ a jegile nɩɩ ŋɩɩ mɩ sɩɩ chagɩlɛma.

¹¹ Má fá La Tɩɩna a tɩma pʋpʋ, dɩ ma nɩɩ jʋɔsʋ ma, ma ha chɩl.

¹² Má zil ʋ Nanʋala, dɩ ŋɩɩ dee ʋ baanɩŋ jaŋ wuo guu sii dɩ ʋ kpʋma. Wɩa jaŋ pɛ nɩalɩŋ sɩ yuoru lɛ.