Tɩntɩŋŋaa 6 - WƖA TENIŊ

Nɩaa balɩpɛ kʋ pɛ Yesu nanzɔɔba-la lɛ

¹ Bʋa-la lɛ Yesu harɩ-tooro-la kʋ pʋŋa yʋgɛ. Ŋɩɩ nɛ ba tʋɔŋ Giriik tɩŋŋaa suomo nyɩnyaŋ Hiburu tɩŋŋaa. Ba bʋla arɩ ba sɩ yie joŋ moribie-la a pɩpɩ yo-haalaa tapʋlɩɩ kala, ba yie bee kikieli ba-na yo-haalaa nɛ.

² Ŋɩɩ nɛ Yesu harɩ-tooro-la fii arɩ balɩa yɩrɛ nɩalɩŋ kala sɩ laa Yesu wɩaa dii a hilimi, a bʋla pɩba, “Ʋ bɩ maga dɩ la bibeŋ moribiee wɩaa aŋ ka Wɩa wɩaa ta.

³ Mɩ naambiiriŋ, má lɩɩsɛ ma tʋɔŋ nɩaa balɩpɛ ma sɩ jɩma dɩ nɩaa ka zilba, ka Wɩa Dɩŋ-zɔmʋŋ hɛ ba lɛ aŋ kɛŋ wʋjɩmɩŋ ma, dɩ la joŋ wɩɩŋ deeŋ hɛ ba nɩsɩŋ lɛ.

⁴ Ka dɩ la-na joŋ la nyuŋ kala hɛ aa chʋɔlɛ Wɩa aŋ pɛ bʋbʋl Wɩa niiŋ wɩaa.”

⁵ Ŋɩɩ nɛ nɩalɩŋ kala sɩ hɛ nɩmɛ tʋɔŋ tɔrɛ arɩ wɩalɩŋ Yesu harɩ-tooro-la sɩ bʋla. Ba lɩɩsɛ baal kʋbala baa yɩrɛ Sɩtɩɩvɩŋ. Ʋ fa ŋaa baal-la sɩ laa Wɩa dii nɛ woruŋ. Wɩa Dɩŋ-zɔmʋŋ ma hɛ ʋ lɛ. Ba bɩra lɩɩsɛ Fɩlɩp arɩ Pʋrɔkɔrʋs arɩ Nɩkanɔ arɩ Tɩmɔŋ arɩ Paamɩnas arɩ Nɩkɔlas. Nɩkɔlas lɩɩ Antɩɔk nɛ. Ʋ fa bɩ Juu tɩɩna ŋaa aŋ tuto Juu tɩŋŋaa Wɩɩchʋɔlɛ wombiiŋ.

⁶ Ŋɩɩ nɛ ba kɛŋ nɩalɩŋ balɩpɛ-la ba sɩ lɩɩsa a kaa mʋ Yesu nanzɔɔba-la sɩpaaŋ. Ba chʋɔlɛ Wɩa pɩba aŋ joŋ ba nɩsaa daŋ ba lɛ.

Ba kɛŋ Sɩtɩɩvɩŋ

⁷ Wɩa niiŋ wɩaa ha gaara su lee-la kala. Nɩalɩŋ sɩ laa Yesu wɩaa dii pʋŋ woruŋ Jerusalɛm lɛ. Nɩalɩŋ ma sɩ ŋaa Wɩɩsʋllɩ sɩpaalaaraa yʋga a ma sɛɩ Wɩa niiŋ wɩalɩŋ.

⁸ Wɩa lahɔrɩmɔ lɛ Sɩtɩɩvɩŋ kɛŋ doluŋ woruŋ, a wuo ŋɩŋaa wʋkpuŋkperisiŋ arɩ wʋmagɩlaa nɩalɩŋ tʋɔŋ.

⁹ Nɩaa dɔnsʋŋ fa hɛ nɩmɛ, a ŋaa Juu tɩŋŋaa a lɩɩ Siriini, arɩ Alɛkɩzandɩrɩa. Ba fa lɩɩ Wɩɩchʋɔlɛ dɩa-la ba fa sɩɩ yɩrɛ ‘yosuŋ ba sɩ joŋo ta’. Dɔnsʋŋ ma fa ŋaa Juu tɩŋŋaa a ma lɩɩ Siliisia arɩ Esia. Ba lɩɩ Sɩtɩɩvɩŋ harɩŋ a kɛŋ wɩaa lɩlɛrɛ.

¹⁰ Ama Wɩa Dɩŋ-zɔmʋŋ fa pɩ Sɩtɩɩvɩŋ wʋjɩmɩŋ nɛ woruŋ nɩalɩŋ bɩ ʋ wuo pagɩsɛ.

¹¹ Ŋɩɩ nɛ ba lʋara hɛ nɩaa, ba bʋl, “La nɩa dɩ ʋʋ chei Mosis arɩ Wɩa yɩrɩŋ nɛ.”

¹² Ba bʋl ŋɩɩ a nyɩsɛ nɩalɩŋ arɩ nɩhɩasɩ-la arɩ Wɩa teniŋ kerichiba hɛ. Ba baanɩŋ sii Sɩtɩɩvɩŋ nyuŋ. Ba kɛnʋ kaa mʋ nɩhɩasɩ-la sɩ yie hilime vʋvʋʋrɛ wɩaa teeŋ.

¹³ Ba kɛŋ nɩaa kaa kɔ dɩ ba kʋ nyɩɛ wɩaa pʋ a bʋl, “Baala deeŋ yie vɛnɛɛ bʋl wɩaa aa chei Wɩa dɩɩ-bal-la ba sɩ joŋo hɛ Wɩa nɩsɩŋ lɛ, arɩ wɩalɩŋ Mosis sɩ ŋmʋnsa bil dɩ la tuto nɛ.

¹⁴ La nɩa dɩ ʋ sɩ dɩ Yesu deeŋ sɩ lɩɩ Nazarɛt jaŋ yigi Wɩa dɩa-la lo, aŋ kɛŋ wɩalɩŋ Mosis fa sɩ dagɛ la naabalɩmaba dɩ ba tuto a kaa bɩrɩmɛ.”

¹⁵ Nɩalɩŋ kala fa sɩ hilimi lee-la chaarɛ sɩaa a pɛ Sɩtɩɩvɩŋ lɛ. Ba na dɩ ʋ sɩaa nagɛ Wɩa tɩndaara sɩaa.