Tɩntɩŋŋaa 4 - WƖA TENIŊ

Pɩɩta arɩ Jɔɔŋ chɩŋ nɩalɩŋ sɩ yie hilime vʋvʋʋrɛ wɩaa sɩpaaŋ

¹ Pɩɩta arɩ Jɔɔŋ fa sɩ bʋl wɩaa pɩpɩ nɩalɩŋ ŋɩɩ, dɩ Wɩɩsʋllɩ sɩpaalaaraa arɩ nɩalɩŋ sɩɩ pɔ Wɩa dɩɩ-bal-la kʋhɩaŋ arɩ nɩalɩŋ ba sɩɩ yɩrɛ Saduusi tɩŋŋaa, ba kɔ ba teeŋ.

² Ba fa na baanɩŋ a tɩŋ wɩalɩŋ Yesu nanzɔɔba-la sɩɩ dagʋ. Ba faa dagɛ nɩalɩŋ arɩ Yesu sii sʋʋŋ lɛ nɛ, a dagɛba ŋɩɩ arɩ nʋʋ nɛ sʋba, ʋ jaŋ bɩra sii sʋʋŋ lɛ.

³ Ŋɩɩ nɛ ba kɛŋ Pɩɩta arɩ Jɔɔŋ kaa mʋ tɔ dɩa, taŋ pʋl. Ba fa kɛsɛba dɩ wɩa ka chɛ dɩ ʋ jʋʋ nɛ, ŋɩɩ nɛ tɩɩ ba tɔba taŋ pʋl.

⁴ Ka nɩalɩŋ sɩ nɩɩ wɩalɩŋ ba sɩ bʋla, nɩaa yʋga ba tʋɔŋ a laa Yesu wɩaa dii. Nɩalɩŋ sɩ laa wɩalɩŋ dii, ba tʋɔŋ baalaa pʋŋa yi bʋɩ banɔŋ.

⁵ Taŋ sɩ pʋla, nɩalɩŋ sɩpaalaaraa arɩ Juu tɩŋŋaa kʋhɩasɩŋ arɩ Wɩa teniŋ kerichiba kala kʋ hilimi Jerusalɛm lɛ.

⁶ Wɩɩsʋllɩ sɩpaalaaraa kʋhɩaŋ ba sɩɩ yɩrɛ Anas ma fa hɛ nɩmɛ a pɛ Kayafas arɩ Jɔɔŋ arɩ Alɛkɩzanda, arɩ nʋʋkala sɩ lɩɩ Wɩɩsʋllɩ sɩpaalaaraa kʋhɩasɩŋ doho nɩaa tʋɔŋ nɛ kʋ hilimi ŋɩɩ.

⁷ Ba sɩ hilime ŋɩɩ, ba yɩrɛ Yesu nanzɔɔba-la balɩa a kaa lɩɩ bil ba tʋtʋɔbaanɩŋ a pɩɛsɛba, “Dol bɛɛ nɛ ma kaa ŋaa baala deeŋ duori? Kʋbɛɛ yɩrɩŋ nɛ ma yɩrɛ a ŋaa wɩɩŋ deeŋ?”

⁸ Ŋɩɩ nɛ Wɩa dɩ Dɩŋ-zɔmʋŋ hɛ Pɩɩta lɛ woruŋ, ʋ bʋla pɩba, “Ma sɩpaalaaraa deemba arɩ ma Juu tɩŋŋaa kʋhɩasɩŋ,

⁹ maa pɩɛsɛla jɩnɩŋ a tɩŋ wʋzɔŋ-la la sɩ ŋaa gbɛrɩgʋ-la lɛ dɩ ma jɩŋ ŋɩɩ la sɩ ŋaa ʋ duori.

¹⁰ Ʋ maga dɩ ma nɩaa deemba arɩ Iziral tɩŋŋaa kala jɩŋ arɩ Yesu Kirisito sɩ lɩɩ Nazarɛt, ʋ yɩrɩŋ lɛ nɛ baala deeŋ duori a chɩŋ ma sɩpaaŋ ŋɩɩ. Ʋ nɛ ma leŋ ba kpaasa mɛrɛ daagɛsɛ nyuŋ ʋ sʋʋ, ka Wɩa chɩsʋ sʋʋŋ lɛ.

¹¹ Yesu wɩaa nɛ ba ŋmʋnsɛ Wɩa teniŋ tʋɔŋ a bʋl, ‘Tie-bii-la dɩɩ-saaraa sɩ vɩa, ʋ nɛ kʋ ŋaa tie-bii-duoŋ ba sɩ joŋo bil dɩa gentine.’

¹² Nʋʋkala bɩ jaŋ wuo laala ta, see Yesu dʋndʋŋa. Ʋ yɩrɩŋ dʋndʋŋa nɛ Wɩa sɩ la yɩrɛ dʋnɩa lɛ dɩ ʋ laala ta. Nʋʋ dɔŋ bɩra tuo dɩ ʋ laala ta.”

¹³ Nɩalɩŋ sɩ hilime a na Pɩɩta arɩ Jɔɔŋ dɩ baa bʋl wɩaa arɩ nyuduoŋ ŋɩɩ, ʋ ŋaaba wʋkpuŋkpere, bɛɛ wɩaa ba jɩma ba bɩ nɩfɩɛma ŋaa ba taŋ lɛ a bɩ teniŋ ma jɩŋ. Ŋɩɩ nɛ ba wuo jɩŋ arɩ ba faa to Yesu harɩŋ nɛ a gʋnnɛ ʋ wɩaa.

¹⁴ Ka ba na gbɛrɩgʋ-la Pɩɩta arɩ Jɔɔŋ sɩ vaara, dɩ ba kala chɩna, ba niiŋ kala maa.

¹⁵ Ŋɩɩ nɛ ba bʋla pɩba dɩ ba lɩɩ dɩa-la tʋɔŋ ba fa sɩ hɔnɔɔ vʋʋrɛ wɩaa. Ba lɩɩ, aŋ ka ba pɩpɩɛsɛ dɔŋɔ,

¹⁶ “Bɛɛ nɛ la jaŋ ŋaa nɩaa deemba balɩa lɛɛ? Nʋʋkala sɩ hɛ Jerusalɛm lɛ nɛ jɩma arɩ ba nɛ ŋaa wʋkpuŋkpere deeŋ, la saa bɩ wuo kaa lɩlɛrɛ.

¹⁷ Ama má leŋ dɩ la kpʋrɩsɛ ba dɩgɩlaa dɩ ba bɩra sɩ́ Yesu yɩrɩŋ yɩrʋ, a bɩra sɩ́ ʋ wɩaa bʋla pɩ nɩaa, dɩ wɩɩŋ deeŋ bɩra sɩ́ leriŋ deeŋ kala teelu.”

¹⁸ Ŋɩɩ nɛ ba bɩra yɩrɛba kaa jʋʋ, a bʋla pɩba arɩ sɩɩfɩɛsɩŋ dɩ ba bɩra sɩ́ wɩɩkala bʋl, koo a dagɛ nɩaa wɩɩkala a tɩgɛ Yesu lɛ, a bɩra sɩ́ ʋ yɩrɩŋ yɩrʋ.

¹⁹ Ŋɩɩ nɛ Pɩɩta arɩ Jɔɔŋ pɩɛsɛba, “La sɩ to ma niiŋ arɩ la sɩ to Wɩa niiŋ, kʋbɛɛ nɛ zɔmɔ Wɩa teeŋ? Má bʋl.

²⁰ La bɩ jaŋ wuo tɔrɛ la niiŋ, see dɩ la bʋl wɩalɩŋ la sɩ na aŋ nɩɩ maa.”

²¹ Ŋɩɩ nɛ ba bɩra fugisiba woruŋ aŋ jomba ta. Ba bɩ wombiiŋ na dɩ ba dɔgɩsɛba, bɛɛ wɩaa nɩalɩŋ kala ka dɛnnɛ Wɩa nɛ a tɩgɛ wɩɩ-la sɩ ŋaa lɛ.

²² Baala deeŋ lɛ ba fa sɩ ŋaa wʋkpuŋkpere-la ʋ duori, ʋ fa kɩɩ jɩsɩŋ mahɩŋ balɩa nɛ.

Nɩalɩŋ sɩ laa Yesu wɩaa dii sʋl Wɩa chɩchɛ nyuduoŋ

²³ Ba sɩ jomba ta, Pɩɩta arɩ Jɔɔŋ mɩɩra mʋ ba naambiiri-la ba dɩ ba fa sɩ yie hilimi teeŋ, a bʋl wɩalɩŋ kala Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ fa sɩ bʋla pɩba.

²⁴ Ba sɩ nɩɩ ŋɩɩ, ba suomo chʋchʋɔlɛ Wɩa arɩ tʋɔ-bala a bʋl, “La Tɩɩna Wɩɩjarɩbakɔ, ŋ nɛ ŋaa wɩa-nyuŋ arɩ tinteeŋ arɩ mʋgʋ-balaa arɩ fuo-biisiŋ arɩ kɩalɩŋ kala sɩ hɛ ba lɛ.

²⁵ Ŋ Dɩŋ-zɔmʋŋ doluŋ lɛ, ŋ wuo leŋ la naabalɩma Devit sɩ ŋaa ŋ tɩntɩnna bʋl, ‘Bɛɛ nɛ tɩɩ nɩalɩŋ sɩ bɩ Juu tɩŋŋaa ŋaa, ba faasa na baanɩŋ? Bɛɛ nɛ tɩɩ nɩalɩŋ vʋʋrɛ dɩ ba jaŋ chei Wɩa tɩntɩŋŋaa aŋ lɔl?

²⁶ Tinteeŋ kuoroo kʋ hɛ dɔŋɔ lɛ nɛ, ba taŋ kʋhɩasɩŋ, ma hilimi dɩ ba yuo La Tɩɩna arɩ nɩɩ-la ʋ sɩ lɩɩsa.’

²⁷ Wɩaa deemba sɛnɛ kʋ ŋaa wʋtɩtɩɩ nɛ, Hɛrɔd arɩ Pɔntɩɔs Paalɩt arɩ nɩalɩŋ sɩ bɩ Juu tɩŋŋaa ŋaa arɩ Iziral tɩŋŋaa, ba kala hilime nɛ taŋ deeŋ lɛ dɩ ba yuo Yesu, ŋ tɩntɩnnɩ-la sɩ bɩ disiniŋ kɛnɛ ŋ sɩ lɩɩsa.

²⁸ Ba hilime ŋaa wɩalɩŋ kala ŋ sɩ paala jɩŋ ŋ doluŋ arɩ ŋ tʋɔbɩɩnaa lɛ arɩ ba jaŋ ŋaa nɛ.

²⁹ La Tɩɩna, beŋ ŋɩɩ ba sɩ fugisila, aŋ pɛ ŋ tɩntɩnnaa lɛ dɩ la wuo bʋl ŋ niiŋ wɩaa arɩ nyuduoŋ.

³⁰ Dagɛ ŋ doluŋ aŋ leŋ dɩ puwuoloo duori, dɩ la ma wuo ŋɩŋaa wʋkpuŋkperisiŋ arɩ wʋmagɩlaa ŋ tɩntɩnna Yesu sɩ bɩ disiniŋ kɛnɛ yɩrɩŋ lɛ.”

³¹ Ba sɩ chʋɔlɛ Wɩa dɛrɛ, lee-la ba sɩ hilime zigili. Wɩa Dɩŋ-zɔmʋŋ kʋ hɛ ba kala lɛ. Ba suomo bʋbʋl Wɩa niiŋ wɩaa arɩ nyuduoŋ.

Nɩalɩŋ sɩ laa Yesu wɩaa dii ka pɛ dɔŋɔ lɛ

³² Nɩalɩŋ kala fa sɩ laa Yesu wɩaa dii, ba kala kɛŋ tʋɔ-bala arɩ nii-bala. Dɩ nʋʋ nɛ kɛŋ kʋŋ ma, ʋ bɩ jaŋ bʋl ʋ nɛ tɩɩ kʋa deeŋ, ba kala nɛ yie tɩɩʋ.

³³ Wɩa dol-bal-la nɛ tɩɩ Yesu nanzɔɔba-la wuo na wombiiŋ a bʋlaa pɩ nɩaa arɩ La Tɩɩna Yesu sii sʋʋŋ lɛ nɛ. Ŋɩɩ nɛ Wɩa chaasa pɛ ba kʋŋkala lɛ woruŋ.

³⁴ Ba nɩalɩŋ kʋŋkala fa bɩ kʋŋ chɛɛ ka, bɛɛ wɩaa nɩalɩŋ kala fa sɩ kɛŋ tinteyee arɩ dɩɩsɩŋ, ba yie joŋo yallɛ nɛ, a kɛŋ moribie-la ba sɩ na

³⁵ a kaa mʋ Yesu nanzɔɔba-la teeŋ. Ba kaa kpaa magɛ ŋɩɩ kala nʋʋkala sɩɩ chɛ.

³⁶ Baal kʋbala ma nɛ fa hɛ nɩmɛ, baa yɩrɛ Josɛf. Ʋ fa ŋaa Levi doho nʋʋ nɛ a lɩɩ Saapʋrɔs tinteeŋ. Yesu nanzɔɔba-la ma kɛnʋ kaa yɩyɩrɛ Banabas. (Ʋ bʋbʋɔŋ nɛ, ʋ fa yie bʋl wɩaa pɩ nɩaa ba nyusuŋ nyɩnyaasɛ.)

³⁷ Ʋ nɛ joŋ ʋ baga ʋ fa sɩ kɛnɛ a yallɛ, a kɛŋ moribie-la kaa mʋ Yesu nanzɔɔba-la teeŋ.