Tɩntɩŋŋaa 3 - WƖA TENIŊ

Ba vaarɛ gbɛrɩgɛ

¹ Tapʋlɩɩ kʋbala Pɩɩta arɩ Jɔɔŋ sii a mʋmʋ Wɩa dɩɩ-bal-la. Ba mʋ nɩmɛ kerifi batori wɩɩhɛyɛ, bʋa-la lɛ ba sɩ yie chʋɔlɛ Wɩa.

² Dɩ baal kʋbala hɛ nɩmɛ, ʋ naaŋ lʋlʋ dɩ ʋ gbɛrɩgɛ nɛ. Ba yie chʋŋʋ tapʋlɩɩ-na kala a kaa mʋ Wɩa dɩɩ-bal-la boiŋ niiŋ kʋbala baa yɩrɛ Boi-zɔmʋŋ. Ʋʋ sʋl kɩaa nɩalɩŋ sɩɩ jʋʋ Wɩa dɩɩ-bal-la teeŋ.

³ Ʋ sɩ na Pɩɩta arɩ Jɔɔŋ dɩ ba kʋ jʋʋ Wɩa dɩɩ-bal-la, ʋ sʋl kɩaa ba teeŋ.

⁴ Ba beŋ ʋ sɩaa lɛ fii, ka Pɩɩta bʋla pʋ, “Bibenla.”

⁵ Ŋɩɩ nɛ ʋ bibemba aŋ gbɩgbɛrɛ kʋ-la ba sɩ jaŋ joŋo pʋ.

⁶ Ŋɩɩ nɛ Pɩɩta bʋla pʋ, “Mɩ bɩ moribii kala kɛnɛ mɩ sɩ jaŋ joŋo pɩŋ, ama mɩ jaŋ joŋ kʋ-la mɩ sɩ kɛnɛ a pɩŋ. Yesu Kirisito sɩ lɩɩ Nazarɛt yɩrɩŋ lɛ, sii a vɛŋ.”

⁷ Ʋ sɩ bʋl ŋɩɩ, ʋ kɛŋ ʋ nadiiŋ nɩsɩŋ lɛ a kɛnʋ chʋʋlɛ, ʋ sii. Ʋ naasɩŋ arɩ ʋ naachɩgɩsɩŋ kala guu polli.

⁸ Ʋ sii fɩla chɩŋ ʋ naasɩŋ nyuŋ a suomo vɛŋ, ba jʋʋ Wɩa dɩɩ-bal-la. Ʋ vɛŋ aŋ pɛ fɩfɩl, a dɩdɛnnɛ Wɩa.

⁹ Nɩalɩŋ kala sɩ naʋ dɩ ʋʋ vɛŋ aŋ dɩdɛnnɛ Wɩa,

¹⁰ ba wuo jɩŋ arɩ ʋ nɛ nɩɩ-la fa sɩ yie hɔŋ Wɩa dɩa-la boiŋ niiŋ ba sɩɩ yɩrɛ Boi-zɔmʋŋ aa sʋl kɩaa. Ba hirigi. Wɩɩ-la sɩ ŋaa, ŋaaba wʋkpuŋkpere.

Pɩɩta bʋl Wɩa wɩaa Wɩa dɩɩ-balɩŋ tʋɔŋ

¹¹ Ŋɩɩ nɛ Pɩɩta arɩ Jɔɔŋ arɩ gbɛrɩgʋ-la jʋʋ zawʋra kʋbala baa yɩrɛ Solomoŋ zawʋra. Gbɛrɩgʋ-la kɛŋ Pɩɩta arɩ Jɔɔŋ nɩsaa lɛ, ʋ ŋaa nɩalɩŋ kala wʋkpuŋkpere, ba kire to ba harɩŋ.

¹² Pɩɩta sɩ na nɩalɩŋ dɩ baa ŋaa ŋɩɩ, ʋ bʋla pɩba, “Mɩ naambiiriŋ Iziral tɩmma, ɛɛ nɛ wɩɩŋ deeŋ ŋaa wʋkpuŋkpere ma teeŋ, ma paala faasa chaarɛ sɩaa a bibenla ŋ-la? Ma bɩɩna arɩ la tɩtɩa doluŋ lɛ nɛ koo la sɩɩ to Wɩa woruŋ nɛ wuo ŋaa baala deeŋ sii vɩvɛŋ?

¹³ Wɩa-la sɩ ŋaa la naabalɩmaba Abɩraham arɩ Aɩzɩk arɩ Jekɔb Wɩa, ʋ nɛ joŋ yɩrɩ-balɩŋ a pɩ ʋ Bie Yesu. Ʋ nɛ ma kaa pa ba dii ʋ sarɩya, aŋ bʋl ma bɩ ʋ jɩŋ Paalɩt sarɩya diire-la sɩpaaŋ. Ʋ faa bɩɩnɛ dɩ ʋ joŋu ta, ka ma bɩ sɛyɛ.

¹⁴ Ma vɩa tʋɔpʋl Tɩɩna sɩ bɩ disiniŋ kɛnɛ nɛ, aŋ sʋl dɩ ba joŋ nɩkpʋʋra ta,

¹⁵ aŋ leŋ ba kpʋ nɩɩ-la sɩɩ pɩ nɩaa mɩɩsɩŋ. Ama Wɩa chɩsʋ sʋʋŋ lɛ nɛ. La ŋaa wɩɩŋ deeŋ pɛ-naaraa nɛ.

¹⁶ Yesu yɩrɩŋ lɛ nɛ baala deeŋ ma sɩ na a jɩmʋ duori. La sɩ laa Yesu wɩaa dii nɛ wuo ŋaa baala deeŋ na yarɩfɩɛlaa woruŋ ma kala sɩɩŋ lɛ ŋɩɩ.

¹⁷ Mɩ naambiiriŋ, mɩ jɩma ma dɩ ma kʋhɩasɩŋ sɩ kpʋ Yesu ŋɩɩ, ma bɩ jɩŋ tʋɔŋ lɛ nɛ.

¹⁸ Wɩa leŋe ʋ Wɩa wʋlaabʋllaa bʋl faafaa kala arɩ Kirisito-la jaŋ na hɛɛŋ. Ʋ sɛnɛ kʋ ŋaa wʋtɩtɩɩ ŋ-la.

¹⁹ Má bɩrɩma lɩɩ ma wʋbɔŋŋɔɔ lɛ aŋ to Wɩa, dɩ ʋ joŋ ma wʋbɔŋŋɔɔ chɛma, dɩ La Tɩɩna leŋ dɩ ma dɩnsɩŋ na wiese.

²⁰ Wɩa jaŋ leŋ dɩ Kirisito bɩra kʋ hɛ ma tʋɔŋ lɛ, nɩɩ-la ʋ sɩ lɩɩsa pɩma.

²¹ Ʋ maga dɩ ʋ hɛ Wɩa-jaŋ lɛ, see bʋa-la yie, dɩ Wɩa leŋ dɩ wɩɩkala sɩ hɛ dʋnɩa lɛ bɩrɩmɛ wʋfalɩɩ. Wɩa leŋe ʋ wʋlaabʋllaa bʋl wɩɩŋ deeŋ faafaa kala nɛ.

²² Mosis fa sɩ, ‘La Tɩɩna Wɩa jaŋ lɩɩsɛ nʋʋ ma tʋɔŋ a pɩma dɩ ʋ ŋaa ʋ wʋlaabʋllʋ a nagɛ mɩ-na Mosis. Ʋ maga dɩ ma jegile nɩɩ wɩɩ-la kala ʋ sɩ bʋla pɩma.

²³ Nɩɩ-la kala sɩ bɩ ʋ niiŋ to, Wɩa jaŋ leŋ dɩ ba lɩɩsʋ Wɩa nɩaa tʋɔŋ a ta dɩ ʋ sʋʋ.’

²⁴ Wɩa wʋlaabʋllaa kala, a chɩŋ Samʋɛl lɛ a mʋmʋ nɩalɩŋ kala sɩ to ʋ harɩŋ, ba kala fa bʋl wɩaa deemba ma sɩɩ na nɛ jɩnɩŋ.

²⁵ Wɩalɩŋ Wɩa fa sɩ to ʋ wʋlaabʋllaa lɛ a bʋla pɩ ma naabalɩmaba, ma ma pɛ ba lɛ nɛ. Ʋ fa bil niiŋ nɛ ʋ dɩ ma naabalɩma Abɩraham pɛgɛ: ‘Ŋ doho nɩaa lɛ nɛ mɩ jaŋ to a pɛ dʋnɩa nɩaa kala lɛ.’

²⁶ Ŋɩɩ nɛ Wɩa lɩɩsɛ ʋ tɩntɩnna Yesu, dɩ ʋ laa sɩpaaŋ kɔ ma teeŋ a pɛ ma lɛ, dɩ ma kala bɩrɩma lɩɩ ma wʋbɔŋŋɔɔ ŋaanɩŋ lɛ.”