Tɩntɩŋŋaa 26 - WƖA TENIŊ

Pɔɔl bʋl wɩaa dɩ ʋ laa ʋ tɩtɩa Agɩrɩpa sɩpaaŋ

¹ Ŋɩɩ nɛ Agɩrɩpa bʋla pɩ Pɔɔl, “Wombiiŋ hɛ nɩmɛ dɩ ŋ bʋl wɩaa a laa ŋ tɩtɩa.” Ŋɩɩ nɛ Pɔɔl kɛŋ nɩsɩŋ vigi dɩ ba kɛŋ goŋ aŋ suomo bʋbʋl wɩaa dɩ ʋ laa ʋ tɩtɩa:

² “Kuoro, mɩ jaŋ bʋl mɩ nyuŋ sɩma jɩnɩŋ mɩ sɩ jaŋ wuo bʋl wɩaa a laa mɩ tɩtɩa ŋ sɩpaaŋ wɩaa deemba kala lɛ Juu tɩŋŋaa sɩɩ bʋl mɩ teeŋ,

³ bɛɛ wɩaa ŋ-na paala chaasa jɩŋ Juu tɩŋŋaa naaba wɩaa kala nɛ arɩ ba wʋkaa-lɛrɩŋ. Mɩ saa sʋlʋŋ dɩ ŋ kɛŋ kenyiri aŋ jegile nɩɩ mɩ teeŋ.

⁴ Juu tɩŋŋaa kala jɩŋ mɩ fa sɩ nagɛ ŋɩɩ nɛ mɩ hambiriŋ kala lɛ, mɩ sɩ hɛ mɩ tinteeŋ lɛ arɩ Jerusalɛm kala lɛ.

⁵ Ba jɩmmɛ faafaa kala nɛ, dɩ ba nɛ jaŋ sɛɩ a bʋl wʋtɩtɩɩ, ba jɩma arɩ bumbuŋ kala mɩ faa to Farisii tɩŋŋaa Wɩɩchʋɔlɛ wombii-duo-la nɛ.

⁶ Ka jɩnɩŋ ba leŋ mɩ chɩŋ daha dɩ ba diimi sarɩya a tɩŋ mɩ sɩɩ yɩɛlɛ wɩɩ-la Wɩa sɩ sɩ ʋ jaŋ ŋaa pɩ la naabalɩmaba.

⁷ La Iziral tɩŋŋaa tinteyee fii arɩ balɩa-la, la kala ka yɩɛlɛ wɩɩŋ deeŋ nɛ, ŋɩɩ wɩaa nɛ tɩɩ la fɩɛsɛ sɩɩŋ a chʋchʋɔlɛ Wɩa wɩɩhɛyɛ arɩ tɩtaŋɩŋ kala ŋɩɩ. Mɩ sɩɩ yɩɛlɛ wɩaa deemba nɛ tɩɩ, Juu tɩŋŋaa bʋbʋl mɩ teeŋ ŋɩɩ, mɩ nyɩna.

⁸ Bɛɛ nɛ tɩɩ ma Juu tɩŋŋaa bɩ wuo laa dii arɩ Wɩa jaŋ wuo chɩsɛ nɩalɩŋ sɩ sʋba, dɩ ba bɩra sii sʋʋŋ lɛ?

⁹ Mɩ ma tɩtɩa fa laa dii arɩ ʋ maga dɩ mɩ ŋaa wɩɩ-la kala mɩ sɩ jaŋ wuo ŋaa a chei Yesu sɩ lɩɩ Nazarɛt yɩrɩŋ nɛ.

¹⁰ Ŋɩɩ nɛ mɩ ŋaa Jerusalɛm lɛ. Mɩ laa doluŋ Wɩɩsʋllɩ sɩpaalaaraa nɩhɩasɩŋ teeŋ, aŋ kɛŋ Wɩa nɩaa yʋgɛ a tɔ dɩa. Dɩ ba nɛ sɩ dɩ ba kpʋba ma, mɩ yie sɛɩ nɛ.

¹¹ Mɩ vɛnɛ dɔgɩsɛba yʋgɛ Wɩɩchʋɔlɛ dɩɩsɩŋ lɛ, aa fʋgɛba dɩ ba bʋl arɩ ba bɩ Yesu jɩŋ aŋ vɩa ʋ wombii-la. Mɩ baanɩŋ faasa sii nɛ kɩŋkɛŋ ba nyuŋ, mɩ paala mʋ tasɩŋ dɔnsʋŋ sɩ tuo Juu tinteeŋ lɛ, a to naasɩŋ a dɔgɩsɛba nɩmɛ.

Pɔɔl to ŋɩɩ ʋ sɩ ŋaa a kʋ laa Yesu wɩaa dii

¹² Wɩɩŋ deeŋ wɩaa nɛ tɩɩ mɩ sii mʋ Damasɩkʋs. Wɩɩsʋllɩ sɩpaalaaraa kʋhɩasɩŋ tɩmmɛ a pɩmɛ doluŋ.

¹³ Mɩ sɩɩ mʋ wombiiŋ lɛ mɩ nyɩna, arɩ wɩɩ-hɛɛ-siesee mɩ na pʋlʋmʋŋ dɩ ʋ lɩɩ wɩa-nyuŋ a chaana hɛ mɩ dɩ nɩalɩŋ fa sɩɩ vɛŋ lɛ. Ʋ pʋlla kɩɩ wɩɩpɔsʋŋ.

¹⁴ La kala tuu tel tinteeŋ. Ka mɩ nɩɩ nʋʋ yikoro dɩ ʋ bʋla pɩmɛ Hiburu yikoro lɛ a bʋl, ‘Sɔɔl, Sɔɔl, bɛɛ nɛ tɩɩ ŋ to naasɩŋ a dʋdɔgɩsɛmɛ ŋ-la? Ŋ dɔgɩsɛ ŋ tɩtɩa nɛ, ŋ nagɛ nɛŋ nɩa sɩ kaa vɩvɛŋ nɛ ka ʋ yɩyagɛ daa-la ʋ sɩ koro.’

¹⁵ Ŋɩɩ nɛ mɩ pɩɛsɛ, ‘Kʋbɛɛ nɛ, tɩɩna?’ Ŋɩɩ nɛ tɩɩna bʋl, ‘Mɩ nɛ ŋaa Yesu, nɩɩ-la ŋ sɩ to naasɩŋ a dʋdɔgɩsɛ.

¹⁶ Ama sii chɩŋ, mɩ kɛŋ mɩ tɩtɩa kʋ dagɩŋ dɩ mɩ lɩɩsɩŋ dɩ ŋ tɩŋ tɩntɩŋŋaa pɩmɛ nɛ, a ŋaa nʋʋ sɩ pɛ na mɩ wɩaa, a bʋla pɩ nɩaa ŋɩɩ ŋ sɩ namɛ jɩnɩŋ, arɩ ŋɩɩ ŋ sɩ jaŋ bɩra namɛ maachie.

¹⁷ Mɩ jaŋ tɩmɩŋ dɩ ŋ mʋ Iziral tɩŋŋaa arɩ nɩalɩŋ sɩ bɩ Juu tɩmma ŋaa kala teeŋ. Dɩ ba nɩɩ walɩmɩŋ, mɩ jaŋ laaŋ ta ba nɩsɩŋ lɛ.

¹⁸ Mɩ jaŋ tɩmɩŋ dɩ ŋ mʋ bʋl wɩaa a suri ba sɩaa, dɩ ba bɩrɩma lɩɩ birimiŋ lɛ a kʋ jʋʋ pʋlʋmʋŋ tʋɔŋ, a ŋaa dɩ ba lɩɩ Sɩtaanɩ nɩsɩŋ lɛ a kɔ Wɩa teeŋ. Dɩ ba nɛ ŋaa ŋɩɩ a laa mɩ wɩaa dii, Wɩa jaŋ joŋ ba wʋbɔŋŋɔɔ chɛba. Ba jaŋ na leriŋ nɩalɩŋ Wɩa sɩ lɩɩsa tʋɔŋ.’

Pɔɔl bʋl ŋɩɩ ʋ sɩ tɩŋ tɩntɩŋŋaa pɩ Wɩa

¹⁹ Ŋɩɩ wɩaa kuoro, mɩ bɩ yikoro-la sɩ lɩɩ wɩa-nyuŋ wɩaa vɩa.

²⁰ Ŋɩɩ nɛ mɩ suomo bʋl Wɩa wɩaa Damasɩkʋs lɛ arɩ Jerusalɛm lɛ a kaa mʋ Judiya tinteeŋ kala, arɩ nɩalɩŋ sɩ bɩ Juu tɩmma ŋaa tʋɔŋ. Mɩ bʋla pɩba dɩ ba bɩrɩma lɩɩ ba wʋbɔŋŋɔɔ lɛ aŋ bɩrɩma to Wɩa, a ŋɩŋaa wɩalɩŋ sɩ jaŋ dagɛ arɩ ba bɩrɩma lɩɩ ba wʋbɔŋŋɔɔ lɛ nɛ.

²¹ Wɩɩŋ deeŋ wɩaa nɛ tɩɩ Juu tɩŋŋaa kɛmmɛ Wɩa dɩɩ-bal-la lɛ aa chɛ dɩ ba kpʋmɛ.

²² Ama arɩ jɩnɩŋ kala Wɩa haa pɛ mɩ lɛ nɛ, ŋɩɩ nɛ tɩɩ mɩ chɩŋ daha aa bʋl wɩaa deemba kala mɩ sɩ pɛ na aŋ nɩɩ ma a pɩpɩma, ma nɩbalaa arɩ ma nɩbiisiŋ kala. Wɩɩŋ deeŋ mɩ sɩɩ bʋl, ʋ tɩtɩa nɛ Wɩa wʋlaabʋllaa arɩ Mosis kala fa bʋl arɩ wɩɩ-la jaŋ ŋaa.

²³ Ba fa bʋla arɩ Kirisito jaŋ na hɛɛŋ a sʋʋ, a laa sɩpaaŋ a sii sʋʋŋ lɛ nɩalɩŋ sɩ sʋba kala tʋɔŋ. Ba bɩra bʋla pɩ Juu tɩŋŋaa arɩ nɩalɩŋ sɩ bɩ Juu tɩŋŋaa ma ŋaa ŋɩɩ ba sɩ jaŋ to a na pʋlʋmʋŋ.”

²⁴ Pɔɔl sɩɩ bʋl wɩaa dɩ ʋ laa ʋ tɩtɩa ŋɩɩ, Fɛsɩtɔs kpɩaʋ lɛ a bʋl, “Pɔɔl, ŋŋ nyaasɛ nɛ. Ŋ wʋjɩŋ kɩŋkɛŋ kɛnɩŋ nyɩnyaasɛ nɛ.”

²⁵ Ŋɩɩ nɛ Pɔɔl bʋl, “Mɩ bɩ nyaasɛ mɩ nyɩna. Wʋtɩtɩɩ nɛ mɩɩ bʋl. Mɩ sɩaa kala nɛ fɩɛla.

²⁶ Kuoro Agɩrɩpa, ŋ jɩŋ wɩaa deemba kala nɛ. Ŋɩɩ nɛ tɩɩ mɩ wuo bʋbʋlba arɩ nyuduoŋ. Mɩ jɩma arɩ wɩaa deemba kʋŋkala tuo ŋ sɩ bɩ jɩŋ. Wɩaa deemba kala sɩ ŋaa, ba bɩ wʋfaalɩa ŋaa.

²⁷ Kuoro, ŋ laa Wɩa wʋlaabʋllaa wɩaa dii nɛɛ? Mɩ jɩma ŋ laa dii nɛ.”

²⁸ Ŋɩɩ nɛ kuoro Agɩrɩpa pɩɛsɛ Pɔɔl, “Ŋ bɩɩna lɛɛlɛ-bie deeŋ ŋ jaŋ wuo leŋ dɩ mɩ laa Yesu wɩaa dii a tutou koo?”

²⁹ Ŋɩɩ nɛ Pɔɔl bʋl, “Ʋ ŋaa lɛɛlɛ koo ʋ dieni mʋa, mɩ Wɩɩsʋlʋŋ nɛ dɩ ŋ dɩ nɩkaana-la kala sɩɩ jegile mɩ teeŋ jɩnɩŋ deeŋ, dɩ ma kʋ laa Yesu wɩaa dii a nagɛmɛ. Ama mɩ bɩ chɛ dɩ ma nagɛmɛ arɩ ba sɩ vɔɔmɛ arɩ chɔrʋmɔɔ ŋ-la.”

³⁰ Pɔɔl sɩ bʋl wɩaa deemba dɛrɛ, ŋɩɩ nɛ kuoro arɩ nɩɩ-la sɩ chɩŋ kuoru-balɩŋ nyuŋ arɩ Bɛɛnɩs arɩ nɩalɩŋ kala fa sɩ hɔnɔ, ba sii.

³¹ Ba sɩ lɩɩ dɩ-jalɩŋ ŋɩɩ, ba bʋla pɩpɩ dɔŋɔ, “Baala deeŋ bɩ wɩɩkala cheye a magɛ dɩ ba kpʋʋ koo dɩ ba kɛnʋ tɔ dɩa.”

³² Ŋɩɩ nɛ Agɩrɩpa bʋla pɩ Fɛsɩtɔs, “Dɩ baala deeŋ fa bɩ wombiiŋ sʋla arɩ ʋ jaŋ mʋ kuoru-balɩŋ teeŋ dɩ ʋ dii ʋ sarɩya, mɩ fa jaŋ bʋl dɩ ŋ joŋu ta.”