Tɩntɩŋŋaa 25 - WƖA TENIŊ

Pɔɔl sʋla dɩ ba kɛnʋ mʋ tinteeŋ kuoru-balɩŋ teeŋ

¹ Fɛsɩtɔs sɩ kʋ laa tinteeŋ, ʋ hɔŋ Sɩzarɩya lɛ tapʋlaa batori nɛ aŋ sii mʋ Jerusalɛm.

² Ʋ sɩ mʋ Jerusalɛm ŋɩɩ, Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ kʋ bʋl wɩalɩŋ Pɔɔl sɩ ŋaa cheiba pʋ, aŋ sʋlʋ

³ dɩ ʋ pɛ ba lɛ a ŋaa dɩ Pɔɔl kɔ Jerusalɛm. Ba fa vʋʋra nɛ dɩ ba lɩɩ faa wombiiŋ lɛ a kpʋʋ.

⁴ Ŋɩɩ nɛ Fɛsɩtɔs bʋl, “Ba kɛŋ Pɔɔl tɔ dɩa nɛ Sɩzarɩya tinteeŋ lɛ, mɩ ma jaŋ mɩɩra mʋ nɩmɛ lɛɛlɛ.

⁵ Má leŋ dɩ ma sɩpaalaaraa dɔnsʋŋ to mɩ harɩŋ mʋ Sɩzarɩya, a bʋl wɩalɩŋ ma sɩ kɛnɛ a tɩgɛ baal-la lɛ, dɩ ma nɛ sɩ ʋ ŋaa wɩɩ nɛ a chei.”

⁶ Fɛsɩtɔs fa chʋa nɩalɩŋ teeŋ Jerusalɛm lɛ arɩ tapʋlaa chori koo fii nɛ aŋ-na mɩɩra mʋ Sɩzarɩya. Ʋ taŋ sɩ pʋla, ʋ mʋ hɔŋ sarɩya dɩ-diiliŋ aŋ ŋaa ba kɛŋ Pɔɔl kaa kɔ.

⁷ Pɔɔl sɩ kɔ, Juu tɩmma-la sɩ lɩɩ Jerusalɛm kɔ, ba kʋ gollu chu a bʋl dɩ wɩalɩŋ Pɔɔl sɩ cheye yʋga nɛ sɩɩfɩɛsɛ, ama ba bɩ wuo dagɛ arɩ wɩalɩŋ ba sɩ bʋla a tɩgɛ ʋ lɛ ŋaa wʋtɩtɩɩba.

⁸ Ŋɩɩ nɛ Pɔɔl ma bʋl wɩaa dɩ ʋ laa ʋ tɩtɩa. Ʋ sɩ, “Mɩ bɩ Juu tɩŋŋaa naabalɩmaba wombii-la ba sɩɩ to wɩɩkala cheye, mɩ bɩra bɩ wɩɩ ma kala cheye a tɩgɛ Wɩa dɩɩ-balɩŋ ma lɛ koo Rom kuoru-balɩŋ ma lɛ.”

⁹ Fɛsɩtɔs ma faa chɛ dɩ Juu tɩmma-la tʋɔŋ tɔrɛ ʋ nyuŋ nɛ, ŋɩɩ nɛ ʋ pɩɛsɛ Pɔɔl, “Ŋ jaŋ cho dɩ ŋ mʋ Jerusalɛm dɩ mɩ dii ŋ sarɩya nɩmɛ a tɩŋ wɩaa deemba ba sɩ bʋla a tɩgɛ ŋ lɛ koo?”

¹⁰ Ŋɩɩ nɛ Pɔɔl bʋl, “Aɩ, mɩ jaŋ cho dɩ mɩ mʋ kuoru-balɩŋ teeŋ. Ʋ maga dɩ ʋ nɛ diimi sarɩya. Ŋ tɩtɩa jɩma woruŋ arɩ mɩ bɩ wɩɩ ŋaa chei Juu tɩŋŋaa lɛ.

¹¹ Dɩ mɩ nɛ fa ŋaa wɩɩ chei a magɛ dɩ ba kpʋmɛ, mɩ faa sɛɩ nɛ, ama dɩ wɩalɩŋ kala ba sɩɩ bʋl ŋaa wʋnyɩɛrɩŋ nɛ, nʋʋkala tuo dɩ ʋ wuo jommi hɛ ba nɩsɩŋ lɛ dɩ ba kpʋmɛ. Mɩɩ sʋlʋŋ dɩ ŋ leŋ dɩ mɩ mʋ kuoru-balɩŋ teeŋ dɩ ʋ nɛ diimi sarɩya.”

¹² Ŋɩɩ nɛ Fɛsɩtɔs arɩ ʋ nɩhɩasɩŋ kɛŋ nyusuŋ hɛ dɔŋɔ lɛ. Ka ʋ bʋla pɩ Pɔɔl, “Na ŋ sɩ ŋ jaŋ mʋ kuoru-balɩŋ teeŋ dɩ ʋ nɛ dii ŋ sarɩya. Ŋ saa jaŋ mʋ.”

Pɔɔl chɩŋ Agɩrɩpa arɩ Bɛɛnɩs sɩpaaŋ

¹³ Tapʋlaa baŋmɛnɛ harɩŋ dɩ kuoru kʋbala ba sɩɩ yɩrɛ Agɩrɩpa arɩ ʋ dɩhaala Bɛɛnɩs kɔ dɩ ba chʋɔlɛ Fɛsɩtɔs Sɩzarɩya lɛ.

¹⁴ Ba sɩ hɛ nɩmɛ a dieni, Fɛsɩtɔs bʋl Pɔɔl wɩaa kala a pɩba. Ʋ sɩ, “Baal kʋbala nɛ hɛ daha, Fɛlɩs nɛ kɛnʋ kaa tɔ dɩa.

¹⁵ Mɩ sɩ mʋ Jerusalɛm, Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa nɩhɩasɩŋ kʋ bʋl wɩalɩŋ ʋ sɩ ŋaa cheiba, aŋ bʋl dɩ mɩ diiu sarɩya a joŋ cheeriŋ pʋ.

¹⁶ Ŋɩɩ nɛ mɩ bʋla pɩba arɩ la-na Rom tɩŋŋaa naabarɩŋ lɛ, la bɩ jaŋ bʋl nʋʋ laa cheeriŋ nɛ aŋ joŋu hɛ ʋ dʋndɔŋŋɔɔ nɩsɩŋ lɛ, see dɩ ba kala balɩa hɔnɔ, dɩ dɔŋɔ bil ʋ niiŋ, dɩ dɔŋɔ ma bil ʋ niiŋ.

¹⁷ Ŋɩɩ nɛ ba kɔ daha. Ba sɩ kɔ, mɩ bɩ kaa dieni. Ʋ taŋ sɩ pʋla, mɩ mʋ sarɩya dɩ-diiliŋ aŋ ŋaa ba kɛŋ baal-la kaa kɔ.

¹⁸ Nɩalɩŋ fa sɩɩ bʋl Pɔɔl teeŋ sɩ sii chɩŋ a bʋl wɩaa, ba bɩ wuo dagɛ wʋbɔŋ kala mɩ fa sɩ bɩɩna dɩ Pɔɔl ŋaa.

¹⁹ Wɩɩ-la ba sɩ bʋla ŋaa wʋkaalɛrɩɩ nɛ ba kaa lɛrɛ a mʋ tɩgɛ ba Wɩɩ-chʋɔlʋŋ lɛ. Baal kʋbala nɛ sʋba, baa yɩrɛ Yesu, Pɔɔl yie bʋbʋl arɩ ʋ sii sʋʋŋ lɛ nɛ a hɛ ʋ mɩɩsɩŋ lɛ.

²⁰ Mɩ fa bɩ jɩŋ ŋɩɩ mɩ sɩ jaŋ to a jɩŋ wɩɩŋ deeŋ tʋɔŋ. Ŋɩɩ nɛ mɩ pɩɛsɛ Pɔɔl arɩ ʋ jaŋ sɛɩ a mʋ Jerusalɛm dɩ ba diiu sarɩya nɩmɛ a mʋ tɩgɛ wɩalɩŋ ba sɩ sɩ ʋ ŋaa lɛɛ?

²¹ Pɔɔl bɩ sɛyɛ, aŋ sʋlmɛ dɩ mɩ leŋ dɩ ba benu a kɛnʋ kaa mʋ kuoru-balɩŋ teeŋ dɩ ʋ dii ʋ sarɩya. Ŋɩɩ nɛ mɩ leŋ ʋ ha hɛ bɩnɩŋ dɩa lɛ ba bibenu, a kaa mʋ yi bʋa-la lɛ mɩ sɩ jaŋ leŋ dɩ ba kɛnʋ mʋ kuoru-balɩŋ teeŋ dɩ ʋ dii ʋ sarɩya.”

²² Ŋɩɩ nɛ Agɩrɩpa bʋla pɩ Fɛsɩtɔs, “Mɩ tɩtɩa jaŋ cho dɩ mɩ ma nɩɩ baal-la niiŋ nɛ.” Ŋɩɩ nɛ Fɛsɩtɔs bʋla pʋ, “Chie ŋ jaŋ nɩɩ ʋ niiŋ.”

²³ Ʋ taŋ sɩ pʋla, Agɩrɩpa arɩ Bɛɛnɩs kpɩɛrɛ ba tɩtɩa woruŋ nɩaa zuuriba a mʋ jʋʋ sarɩya dɩ-diiliŋ dɩɩ-bal-la. Ba dɩ laalɩyuoroo nɩhɩasɩŋ arɩ taŋ-la nɩbalaa, ba kala kʋ jʋʋ a hɔŋ. Ŋɩɩ nɛ Fɛsɩtɔs ŋaa ba kɛŋ Pɔɔl kʋ jʋʋ.

²⁴ Fɛsɩtɔs bʋl, “Kuoro Agɩrɩpa, ŋ dɩ nɩalɩŋ kala sɩ hɛ daha, ma na baala deeŋ. Ʋ wɩaa nɛ tɩɩ Juu tɩmma-la sɩ hɛ Sɩzarɩya deeŋ lɛ arɩ Juu tɩmma-la sɩ lɩɩ Jerusalɛm kala kʋ wʋwalɩmɛmɛ. Baa ŋaa goŋ a bʋl dɩ ʋ bɩ maga dɩ ʋ kɛŋ mɩɩsɩŋ.

²⁵ Mɩ-na bɩ wɩɩ-la ʋ sɩ ŋaa chei a maga dɩ ba kpʋʋ na. Ama ʋ tɩtɩa nɛ sʋlmɛ dɩ mɩ leŋ dɩ ʋ mʋ kuoru-balɩŋ teeŋ Rom lɛ dɩ ʋ diiu sarɩya. Mɩ saa jaŋ kɛnʋ mʋ.

²⁶ Ama mɩ paala bɩ chaasa jɩŋ wɩɩ-la kala mɩ sɩ jaŋ ŋmʋnsa pɩ kuoru-balɩŋ a mʋ tɩgɛ ʋ lɛ. Ŋɩɩ nɛ tɩɩ mɩ kɛnʋ kaa kɔ ma teeŋ dɩ ma nɩɩ ʋ niiŋ. Ŋ-na kuoro Agɩrɩpa teeŋ nɛ mɩ saa paala kɛnʋ kaa kɔ. Mɩ bɩɩna arɩ ŋ ma nɛ jʋʋ wɩɩ-la tʋɔŋ, ŋ jaŋ wuo na wɩɩ dɩ mɩ wuo ŋmʋnsɛ teniŋ pɩ kuoru-balɩŋ.

²⁷ Mɩ-na teeŋ, ʋ bɩ wombii ŋaa dɩ mɩ nɛ leŋe dɩ ba kɛŋ nʋʋ ba sɩ kaa tɔ bɩnɩŋ dɩa kaa mʋ kuoru-balɩŋ teeŋ, aŋ bɩ chaasa bʋl wɩɩ-la ʋ sɩ ŋaa chei.”