Tɩntɩŋŋaa 22 - WƖA TENIŊ

¹ Ŋɩɩ nɛ ʋ bʋla pɩba, “Mɩ nyɩmmaba arɩ mɩ naambiiriŋ, má jegile nɩɩ wɩɩ-la mɩ sɩ kɛnɛ dɩ mɩ bʋla laa mɩ tɩtɩa.”

² Ba sɩ nɩa dɩ ʋ bʋl wɩaa Hiburu yikoro lɛ aa pɩba, ba kala ŋaa fʋɩɩ. Ŋɩɩ nɛ Pɔɔl bʋl,

³ “Mɩ ŋaa Juu tɩɩna nɛ. Ba lʋlmɛ Taasɩs lɛ nɛ, Siliisia tinteeŋ. Mɩ hambiiriŋ lɛ nɛ ba kɛmmɛ kaa kɔ daha a bemmi. Gamalɩɛl nɛ dagɛmɛ. Ʋ dagɛmɛ la naabalɩmaba wombii-la ba sɩɩ to arɩ sɩɩfɩɛsɩŋ. Mɩ tou woruŋ a joŋ mɩ tɩtɩa kala pɩ Wɩa, arɩ ma ma sɩ hɛ daha jɩnɩmba a ŋɩŋaa ŋɩɩ.

⁴ Mɩ to naasɩŋ a dɔgɩsɛ nɩalɩŋ fa sɩɩ to Yesu wombii-la a chɩchɛ dɩ mɩ kpʋba. Mɩ ŋaa ba kɛsɛba a vɔɔba a kɛmba tɔ dɩa, baalaa arɩ haalaa kala.

⁵ Wɩɩsʋllɩ sɩpaalaaraa kʋhɩaŋ, arɩ kʋhɩasɩ-la kala sɩ yie hilime vʋvʋʋrɛ wɩaa ma jaŋ wuo bʋla pɩma arɩ wɩɩŋ deeŋ mɩ sɩ bʋla ŋaa wʋtɩtɩɩ nɛ. Ba ŋmʋnsɛ tenniŋ pɩmɛ dɩ mɩ kaa mʋ Damasɩkʋs a joŋo pɩ Juu tɩmma-la sɩ hɛ nɩmɛ. Ba ŋaa ŋɩɩ dɩ mɩ wuo kɛsɛ nɩalɩŋ sɩ laa Yesu wɩaa dii nɩmɛ a vɔɔba, a kaa kɔ Jerusalɛm a dɔgɩsɛba.

⁶ Mɩ sɩ lɩɩ joŋ wombiiŋ a mʋmʋ Damasɩkʋs a mʋ kpagɛ taŋ-la arɩ wɩɩ-hɛɛ-siesee, pʋlʋmʋŋ guu lɩɩ wɩa-nyuŋ a faasa chaana hɛ mɩ lɛ.

⁷ Mɩ tuu tel tinteeŋ aŋ nɩɩ nʋʋ yikoro dɩ ʋ bʋl mɩ teeŋ a bʋl, ‘Sɔɔl, Sɔɔl, bɛɛ nɛ tɩɩ ŋ to naasɩŋ a dʋdɔgɩsɛmɛ ŋ-la?’

⁸ Ŋɩɩ nɛ mɩ pɩɛsɛ, ‘Kʋbɛɛ nɛ, mɩ Tɩɩna?’ Yikoro-la bʋl, ‘Mɩ-na Yesu sɩ lɩɩ Nazarɛt nɛ, nɩɩ-la ŋ sɩ to naasɩŋ a dʋdɔgɩsɛ.’

⁹ Mɩ dɩ nɩalɩŋ fa sɩɩ vɛŋ, ba na pʋlʋŋ-la nɛ, aŋ bɩ nɩɩ-la fa sɩɩ bʋl wɩaa mɩ teeŋ yikoro nɩa.

¹⁰ Ŋɩɩ nɛ mɩ pɩɛsɛ, ‘Mɩ ŋaa wʋbɛɛ, mɩ Tɩɩna?’ Mɩ Tɩɩna bʋl, ‘Sii jʋʋ Damasɩkʋs, nɩmɛ ba jaŋ dagɩŋ wɩɩ-la kala mɩ sɩɩ chɛ dɩ ŋ ŋaa.’

¹¹ Pʋlʋŋ-la chʋʋlɛ mɩ sɩaa, mɩ bɩra bɩ na, ŋɩɩ nɛ mɩ dɩ nɩalɩŋ fa sɩɩ vɛŋ kɛŋ mɩ nɩsɩŋ lɛ a lɛrɛ jʋʋ Damasɩkʋs.

¹² Baal kʋbala fa hɛ nɩmɛ, baa yɩrɛ Ananɩas. Ʋ faa fá Wɩa nɛ a tuto wɩalɩŋ Mosis fa sɩ ŋmʋnsa bil dɩ nɩaa tuto. Juu tɩmma-la kala fa sɩ hɛ Damasɩkʋs lɛ zizilu.

¹³ Ʋ kɔ mɩ teeŋ a chɩŋ mɩ sɛmɛ a bʋla pɩmɛ, ‘Mɩ naambii Sɔɔl, kɛŋ ŋ sɩaa suri.’ Bʋa-la tɩtɩa lɛ mɩ sɩaa suri, mɩ bee naʋ.

¹⁴ Ŋɩɩ nɛ Ananɩas bʋla pɩmɛ, ‘Wɩa-la la dɩ la naabalɩmaba sɩɩ to nɛ lɩɩsɩŋ dɩ ŋ jɩŋ wɩɩ-la ʋ sɩɩ chɛ dɩ ŋ ŋaa. Ʋ leŋ ŋ na Wɩa tʋɔpʋl Tɩɩna a nɩɩ ʋ yikoro ma ʋ sɩ bʋl wɩaa pɩŋ.

¹⁵ Ŋ jaŋ ŋaa ʋ pɛ-naara, a bʋla pɩ nɩaa wɩɩ-la ŋ sɩ nɩa aŋ pɛ na.

¹⁶ Bɛɛ nɛ saa tɩɩ ŋ hɔnɔ dieni? Sii mʋ a leŋ dɩ ba foŋ Wɩɩchʋɔlɛ lɩɩŋ a chɛsɛ ŋ wʋbɔŋŋɔɔ ta Yesu yɩrɩŋ lɛ.’

Wɩa yɩrɛ Pɔɔl dɩ ʋ bʋl Wɩa wɩaa a pɩ nɩalɩŋ sɩ bɩ Juu tɩŋŋaa ŋaa

¹⁷ Ŋɩɩ nɛ mɩ mɩɩra mʋ Jerusalɛm a jʋʋ Wɩa dɩɩ-bal-la a chʋchʋɔlɛ Wɩa. Mɩ sɩɩ chʋɔlɛ Wɩa ŋɩɩ,

¹⁸ mɩ na La Tɩɩna Yesu a nagɛ duosoo tʋɔŋ. Ʋ bʋla pɩmɛ, ‘Sii lɩɩ Jerusalɛm lɛ lɩma, bɛɛ wɩaa nɩalɩŋ sɩ hɛ daha bɩ jaŋ sɛɩ wɩalɩŋ ŋ sɩ jaŋ bʋla pɩba a tɩgɛ mɩ lɛ.’

¹⁹ Ŋɩɩ nɛ mɩ bʋla pɩ Yesu, ‘Mɩ Tɩɩna, ba jɩma woruŋ arɩ lee-na kala mɩ sɩ mʋa, mɩ yie jʋʋ Wɩɩchʋɔlɛ dɩɩsɩŋ a kɛsɛ nɩalɩŋ sɩ laa ŋ wɩaa dii nɩmɛ, a ŋmooba aŋ kɛmba tɔ dɩa.

²⁰ Bʋa-la lɛ ba fa sɩ kpʋ Sɩtɩɩvɩŋ, sɩ ŋaa nɩɩ-la sɩ pɛ na ŋ wɩaa a bʋlba wɩaa pɩpɩ nɩaa, mɩ-na Pɔɔl ma fa hɛ nɩmɛ nɛ a sɛɩ dɩ ba kpʋʋ. Ba sɩɩ kpʋʋ, mɩ nɛ fa pɔ nɩaa deemba gɛnnɩŋ ba sɩ wuro, aŋ ka ba kpʋʋ.’

²¹ Ŋɩɩ nɛ mɩ Tɩɩna bʋla pɩmɛ, ‘Sii daha, mɩ jaŋ tɩmɩŋ dɩ ŋ mʋ dɩ-bolii, nɩalɩŋ sɩ bɩ Juu tɩŋŋaa ŋaa leriŋ.’ ”

²² Pɔɔl fa sɩɩ bʋl wɩaa ŋɩɩ, nɩalɩŋ kala fa jegile nɩɩ ʋ teeŋ nɛ. Ama ʋ sɩ bʋl wɩɩŋ deeŋ, ba bɩra suomo ŋaa goŋ a bʋl, “Má kpʋ nɩtɔɔŋ deeŋ, ʋ bɩ maga dɩ ʋ hɛ dʋnɩa lɛ.”

²³ Ba ŋɩŋaa goŋ, aŋ kɛŋ ba gɛnnɩŋ kpikpesi a ŋaa hagɩla yuyuo.

²⁴ Ŋɩɩ nɛ Rom laalɩyuoroo kʋhɩaŋ-la bʋl dɩ laalɩyuoro-la kɛŋ Pɔɔl kaa jʋʋ laalɩyuoroo dɩɩ-duo-la. Ʋ sɩ dɩ ba vɩɩrʋ aŋ pɩɛsa na wɩɩ-la sɩ tɩɩ nɩalɩŋ kala lɩɩ ʋ harɩŋ aŋ ŋɩŋaa goŋ ŋ-la.

²⁵ Ŋɩɩ nɛ ba vɔbʋ dɩ ba vɩɩrʋ. Ba sɩɩ chɛ dɩ ba vɩɩrʋ, Pɔɔl pɩɛsɛ laalɩyuoroo kʋhɩaŋ-la fa sɩ chɩŋ nɩmɛ, “Ʋ maga dɩ ba vɩɩrɛ nʋʋ sɩ ŋaa Rom tɩɩna aŋ bɩ ʋ sarɩya die, a dagʋ ʋ wʋcheeliŋ nɛɛ?”

²⁶ Ʋ sɩ nɩɩ wɩɩ-la Pɔɔl sɩ bʋla, ʋ ma bɩra mʋ ʋ kʋhɩaŋ teeŋ a bʋla pʋ, “Bee na ŋ sɩɩ chɛ dɩ ŋ ŋaa wɩɩ-la, baal-la ŋaa Rom tɩɩna nɛ.”

²⁷ Ŋɩɩ nɛ laalɩyuoroo kʋhɩaŋ-la tɩtɩa sii kɔ Pɔɔl teeŋ a pɩɛsʋ, “Ŋ ŋaa Rom tɩɩna nɛɛ? Bʋla pɩmɛ.” Ŋɩɩ nɛ Pɔɔl sɩ, “Oo.”

²⁸ Laalɩyuoroo kʋhɩaŋ-la ma bʋl, “Mɩ ma ŋaa dɔŋɔ nɛ. Mɩ ta tiŋ moribiee yʋgɛ nɛ aŋ-na kʋ ŋaa Rom tɩɩna.” Ŋɩɩ nɛ Pɔɔl bʋl, “Ba paala lʋlmɛ dɩ mɩ ŋaa Rom tɩɩna nɛ.”

²⁹ Ŋɩɩ nɛ nɩalɩŋ fa sɩɩ chɛ dɩ ba vɩɩrɛ Pɔɔl aŋ pɩɛsʋ, ba sʋʋsa lɩɩ ʋ teeŋ lɩma lɩma. Laalɩyuoroo kʋhɩaŋ-la sɩ kʋ jɩŋ arɩ Pɔɔl ŋaa Rom tɩɩna nɛ, ka ʋ ŋaa ba kɛŋ chɔrʋmɔɔ kaa vɔbʋ, fawʋllʋŋ kɛnʋ ma.

Pɔɔl chɩŋ nɩalɩŋ sɩ yie hilime vʋvʋʋrɛ wɩaa sɩpaaŋ

³⁰ Ŋɩɩ nɛ laalɩyuoroo kʋhɩaŋ-la chɩchɛ dɩ ʋ sɛnɛ jɩŋ wɩɩ-la sɩ tɩɩ Juu tɩŋŋaa bʋbʋl Pɔɔl teeŋ ŋɩɩ. Ʋ taŋ sɩ pʋla ʋ ŋaa ba kɛnʋ puri, a ŋaa Wɩɩsʋllɩ sɩpaalaaraa kʋhɩasɩŋ arɩ kʋhɩasɩ-la sɩ yie hilimi a vʋvʋʋrɛ wɩaa kʋ hilimi. Ŋɩɩ nɛ ʋ kɛŋ Pɔɔl kaa lɩɩ a ŋaa ʋ chɩŋ ba sɩpaaŋ.