TƖƖCHA 3 - WƖA TENIŊ

Bʋa na-kala arɩ ʋ wɩɩ nɛ

¹ Wɩɩ na-kala kɛŋ ʋ bʋa nɛ, wɩɩ na-kala sɩɩ ŋaa dʋnɩa lɛ kɛŋ bʋa-la sɩ maga dɩ ʋ ŋaa nɛ:

² Bʋa-la lɛ ba sɩ jaŋ lʋl nɩa arɩ bʋa-la lɛ ʋ sɩ jaŋ sʋʋ. Bʋa-la lɛ ba sɩ jaŋ chɔnsɛ kɩaa arɩ bʋa-la lɛ ba sɩ jaŋ churi.

³ Bʋa-la lɛ ba sɩ jaŋ kpʋ arɩ bʋa-la lɛ ba sɩ jaŋ tɩɩbɛ. Bʋa-la lɛ ba sɩ jaŋ ŋmoo lo arɩ bʋa-la lɛ ba sɩ jaŋ saa.

⁴ Bʋa-la lɛ nɩaa sɩ jaŋ yel arɩ bʋa-la lɛ ba sɩ jaŋ mɔŋ. Bʋa-la lɛ ba sɩ jaŋ ŋmoo niiŋ arɩ bʋa-la lɛ ba sɩ jaŋ gbieli.

⁵ Bʋa-la lɛ ba sɩ jaŋ kɛŋ tabɩaa pɩsɛ arɩ bʋa-la lɛ ba sɩ jaŋ gbaaba hɛ dɔŋɔ. Bʋa-la lɛ nɩaa sɩ jaŋ guori dɔŋɔ arɩ bʋa-la lɛ ba sɩ jaŋ pɔrɛ dɔŋɔ lɛ.

⁶ Bʋa-la lɛ ba sɩ jaŋ chɛ kɩaa arɩ bʋa-la lɛ ba sɩ jaŋ leŋe ta. Bʋa-la lɛ ba sɩ jaŋ bil kʋa arɩ bʋa-la lɛ ba sɩ jaŋ joŋo yuo ta.

⁷ Bʋa-la lɛ nɩaa sɩ jaŋ kɛŋ kʋa kɩɛsɛ arɩ bʋa-la lɛ ba sɩ jaŋ yɛrɛ. Bʋa-la lɛ nɩaa sɩ jaŋ tɔrɛ ba niiŋ arɩ bʋa-la lɛ ba sɩ jaŋ bʋl wɩaa.

⁸ Bʋa-la lɛ nɩaa sɩ jaŋ cho dɔŋɔ arɩ bʋa-la lɛ ba sɩ jaŋ bɛrɛ dɔŋɔ. Bʋa-la lɛ nɩaa sɩ jaŋ yuo laalɩŋ arɩ bʋa-la lɛ ba sɩ jaŋ hɔŋ arɩ fɩɛlɩŋ.

⁹ Tɩntɩnna sɩ yie tɩma lɔl, bɛɛ nyʋʋrɩ nɛ ʋ yie na?

¹⁰ Mɩ na dɩ chʋgʋ yuŋŋii nɛ Wɩa joŋo daŋ nuhuobiine nyuŋ.

¹¹ Ʋ ŋaa kʋŋkala ʋ bʋa-la lɛ nɛ, a leŋ ʋ zɔŋ. Wɩa nɛ joŋ wɩalɩŋ sɩ jaŋ hɛ nɩmɛ wuu tʋɔbɩɩnaa a pɩ nuhuobiine, aŋ bɩ leŋe ba chaasa jɩŋ wɩalɩŋ ʋ sɩ ŋaa a chɩŋ dɩ-suomuŋ a kaa mʋ dɩ-dɛrɩŋ.

¹² Ŋɩɩ nɛ mɩ jɩŋ dɩ nuhuobiine mɩɩsɩŋ lɛ kʋŋkala tuo a kpɩa tʋɔtɔrʋŋ arɩ wʋzɔŋŋɔɔ ŋaanɩŋ.

¹³ Nʋʋkala maga dɩ ʋ dii aŋ nyʋa a nɩɩ kɩalɩŋ ʋ sɩ tɩma na sɩma, Wɩa nɛ pʋ.

¹⁴ Mɩ jɩma kʋŋkala Wɩa sɩ ŋaa jaŋ hɛ nɩmɛ a kaa mʋ wuu. Nʋʋ bɩ kʋŋ wuo kaa pɛ nʋʋ bɩ kʋŋ wuo kaa lɩɩsa ta ma. Wɩa ŋaa ŋɩɩ dɩ nɩaa fɩfáʋ nɛ.

¹⁵ Wɩɩ-la kala sɩ hɛ nɩmɛ, laa sɩpaaŋ hɛ nɩmɛ nɛ, wɩɩ-la sɩ jaŋ ŋaa maachie, laa sɩpaaŋ hɛ nɩmɛ nɛ. Wɩa yie leŋ wɩɩ-la sɩ ŋaa faafaa kala, bɩra ŋaa nɛ.

¹⁶ Mɩ na wɩɩ dɔŋ ma nɛ dʋnɩa lɛ: Sarɩya dɩ-diiliŋ sɩ maga dɩ ba bʋl wʋtɩtɩɩ, mɩ na wʋnyɩɛrɩŋ hɛ nɩmɛ. Lee-la sɩ maga dɩ ba ŋaa wɩaa ba bʋa lɛ, mɩ na wʋbɔŋŋɔɔ nɩmɛ.

¹⁷ Mɩ bɩɩnɛ mɩ tʋɔŋ lɛ, “Wɩa jaŋ dii tʋɔpʋl tɩŋŋaa arɩ nɩbɔŋŋɔɔ kala sarɩya, bɛɛ wɩaa wɩɩkala kɛŋ bʋa nɛ, wʋŋaalɩɩ ma kala kɛŋ ba bʋa.”

¹⁸ Mɩ bɩra bɩɩnɛ mɩ tʋɔŋ lɛ, “Wɩa ka magɩsɛ nuhuobiinee dɩ ʋ dagɛ arɩ ba ma nagɛ pʋsʋŋ nɛ.

¹⁹ Nuhuobiinee arɩ pʋsʋŋ kala wɩɩŋ ŋaa kʋbala nɛ, wʋbala nɛ gbɛrɛ ba kala: Dɔŋɔ sɩɩ sʋʋ ŋɩɩ, ŋɩɩ nɛ dɔŋɔ ma sʋsʋʋ. Ba kala ka wiesi nɛ. Nuhuobiine ma bɩ pʋna lɛ kpɩa, kʋŋkala bɩ bʋbʋɔ kɛnɛ.

²⁰ Ba kalaa mʋ dɩ-bala nɛ, ba kala lɩɩ hagɩla lɛ nɛ, ba kala jaŋ bɩra bɩrɩmɛ hagɩla.

²¹ Kʋbɛɛ nɛ jɩma dɩ nuhuobiine dɩma ka jɩl wɩa-nyuŋ nɛ, aŋ ka pʋna kʋa tutuu tinteeŋ?”

²² Ŋɩɩ lɛ nɛ mɩ na dɩ kʋŋkala tuo a kpɩa nuhuobiine teeŋ, a kɩɩ ʋ sɩ jaŋ kɛŋ kɩalɩŋ ʋ sɩ tɩma na a nɩɩ sɩma, ʋ kpaalɩŋ nɛ ŋɩɩ. Nʋʋkala tuo sɩ jaŋ kɛŋ nʋʋ sɩ sʋba mɩɩra kɔ dɩ ʋ na wɩalɩŋ sɩɩ ŋaa ʋ harɩŋ.