TƖƖCHA 12 - WƖA TENIŊ

¹ Ŋ bapʋɔsʋŋ lɛ, liise yi Wɩa sɩ ŋaaŋ lɛ, ka dɩ tapʋlɩɩ-la wɩaa sɩ jaŋ jʋʋŋ-na yi, ka dɩ jɩsɩ-la sɩ jaŋ yi dɩ ŋ bʋl, “Mɩ bɩ sɩma kala nɩa.”

² Liisi ʋ wɩaa ka dɩ wɩɩpɔsʋŋ pʋlʋmʋŋ, chɛnɛ arɩ chɛnwʋlaa-na biri ŋ sɩaa lɛ, dɩ duonuŋ nɩɩ aŋ ha nagɛ ʋ tɩna ŋ sɩaa lɛ.

³ Ka dɩ ŋ nɩsaa sɩɩ pɔŋ-na chichel, dɩ ŋ naasɩŋ sɩ kɛŋ doluŋ daagɛ, dɩ ŋ nyɩlaa ŋ sɩ kaa chaŋ kɩaa churi, aŋ ka mʋa ŋ bɩra bɩ kɩaa wuo chaŋ, dɩ ŋ sɩaa gʋɔlɛ a bɩra bɩ na woruŋ,

⁴ dɩ ŋ dɩgɩlaa tɔ a bɩra bɩ goŋ ba sɩɩ ŋaa wombiiŋ lɛ ka nɩɩ, a bɩ ba sɩɩ nɔŋ kɩaa dɔmʋŋ ma ka nɩɩ, kɩaa chɩɩrɩŋ jaŋ chɩsɩŋ doŋ lɛ ama ŋ bɩ diibiisiŋ yele ka nɩɩ.

⁵ Ŋ jaŋ fɩfá dundolluŋ jɩlɩŋ, dɩ ŋ vɛnɩŋ ŋaa wʋduo, ŋ nyuŋ jaŋ pʋllɛ, dɩ ŋ bɩra bɩ ŋ tɩtɩa wuo lɛrɛɛ vɛŋ, dɩ ŋ kʋchooloo kala lɛl. Ŋɩɩ lɛ nɛ nuhuobiine jaŋ mʋ ʋ dɩ-wiesiŋ, dɩ nɩaa yiyel wombiee lɛ.

⁶ Liisi Wɩa wɩaa ka dɩ ŋ mɩɩsɩŋ sɩ nagɛ hɔpʋla banzɔlɔ-na kɛrɛ, dɩ ŋ sɛlɩmɛ chaanɩŋ tele yɛrɛ, dɩ ŋ gʋʋga ŋmɛnɩŋ kɛrɛ, dɩ ŋ lɩɩŋ pupoiŋ ma tele yɛrɛ muno muno.

⁷ Ŋɩɩ nɛ nuhuobiine jaŋ bɩrɩmɛ hagɩla a gʋra jʋʋ tintee-la ba sɩ lɔgɔ mɛʋ, ka ʋ wiese mɩɩra mʋ Wɩa teeŋ, nɩɩ-la sɩ joŋu hɛ ʋ lɛ.

⁸ Wɩɩkala bɩ bʋbʋɔ kɛnɛ, wɩɩkala bɩ bʋbʋɔ kɛnɛ, nɩɩ-la sɩ jɩŋ wɩaa a dɩdagɛ nɩaa nɛ bʋla: Wɩɩkala bɩ bʋbʋɔ kɛnɛ.

⁹ Nɩɩ-la sɩɩ dagɛ nɩaa fa kɛŋ wʋjɩmɩŋ nɛ woruŋ, a joŋ wɩalɩŋ ʋ sɩ jɩma a dagɛ nɩaa. Ʋ chaasa hɔnɔ bɩɩnɛ wɩaa nɛ aŋ magɛ namagaba ba lɩɩ aŋ ka pɩ dɔŋɔ.

¹⁰ Nɩɩ-la sɩ jɩŋ wɩaa a dɩdagɛ nɩaa hɛ ʋ doluŋ a walɩmɛ nɛ, dɩ ʋ dagɛ nɩaa wɩalɩŋ sɩ jaŋ leŋ dɩ ba nyuŋ nyaasɛ. Wɩalɩŋ ʋ sɩ ŋmʋnsa chɩŋ ba bʋa-la lɛ nɛ a ŋaa wʋtɩtɩɩba.

¹¹ Wɩalɩŋ wʋjɩnna sɩ bʋla nagɛ daaŋ niiŋ sɩ ŋaa chʋla chʋla nɛ, kʋdaaraa kori a kaa daa pʋsʋŋ. Namagaba-la ba sɩ kaa hɛ dɔŋɔ lɛ ka dienu a nagɛ ba sɩ joŋ hɛŋŋɛɛ ŋmoo hɛ kʋa lɛ ʋ chɩŋ kpaŋkpaŋ nɛ. Wɩa nɛ joŋo pɩla, nɩɩ-la sɩɩ daa la kala.

¹² Mɩ nanʋala, wɩɩ dɔŋ nɛ hɛ nɩmɛ mɩɩ chɛ dɩ ŋ kɛŋ ŋ tɩtɩa arɩ wɩɩ-la: Teniŋ ŋmʋnsʋŋ bɩ dɩdɛrɩ kɛnɛ, dɩ ŋ nɛ gʋnnɛ wɩaa ma kɩŋkɛŋ ŋɩɩ jaŋ leŋ dɩ ŋ kɔsɛ.

¹³ Wɩaa deemba kala dɩdɛrɩŋ, wʋbala nɛ mɩ kɛŋ dɩ mɩ bʋl: Fɩfá Wɩa a tuto wɩalɩŋ ʋ sɩ daga, bɛɛ wɩaa ŋɩɩ wɩaa nɛ Wɩa ta nuhuobiine.

¹⁴ Wɩa jaŋ dii la sarɩya wɩɩ na-kala la sɩ ŋaa lɛ, dɩ ba ŋaa wʋzɔmɔ koo wʋbɔmɔ, a pɛ wɩalɩŋ kala la sɩ lʋara ŋaa lɛ.