TƖƖCHA 11 - WƖA TENIŊNuhuobiine wʋjɩmɩŋ magɩsɩŋ 1 Ŋaa ŋ kɩaa a kpaa, tapʋlaa baŋmɛnɛ pɛgɛ ŋ jaŋ bɩra naba. 2 Ŋaa kpaa nɩaa balɩpɛ, koo chori, bɛɛ wɩaa ŋ bɩ jɩŋ tapʋlɩɩ-la wʋlɔrʋŋ sɩ jaŋ jʋʋ tinteeŋ. 3 Dɩ duonuŋ nɛ tɩna dɛrɛ, ʋ yie nɩɩ nɛ. Sɛmɛ na-kala tɩa sɩ tele, nɩmɛ nɛ ʋ yie pɩŋ, dɩ wɩɩpɔsʋŋ nadiiŋ nɛ koo dɩ wɩɩpɔsʋŋ nagʋa nɛ. 4 Nʋʋ na-kala sɩ beŋ ŋɩɩ leriŋ sɩ naga bɩ jaŋ wuo duu kʋŋ koo a kʋŋ kɩaa. 5 Ŋ sɩ bɩ peliŋ wombiiŋ jɩŋ ŋɩɩ koo ŋɩɩ ba sɩ mɛ nuhuobiine ʋ naaŋ luoruŋ tʋɔŋ, ŋɩɩ tɩtɩa nɛ ŋ bɩ jaŋ wuo jɩŋ Wɩa wʋŋaalaa. Wɩa nɛ ŋaa kʋŋkala. 6 Duu ŋ kɩaa chʋchʋɔŋ, dɩdaanɩŋ ma sɩ́ pɛɩ hɔŋ. Ŋ bɩ jɩŋ ba kʋ-la sɩ jaŋ wasɛ, dɩ dɔŋɔ nɛ jaŋ wasɛ a kɩɩ dɔŋɔ koo, dɩ ba kala nɛ jaŋ wasɛ magɛ dɔŋɔ. Liisi La Tɩɩna wɩaa ŋ hambiriŋ lɛ 7 Ʋ ŋaa wʋzɔŋ nɛ dɩ la na pʋlʋmʋŋ, ʋ ŋaa tʋɔtɔrɛ wɩɩ nɛ dɩ la hɛ dʋnɩa lɛ. 8 Jɩsɩŋ magɛ ŋɩɩ na-kala nuhuobiine sɩ hɛ ʋ mɩɩsɩŋ lɛ, ʋ maga dɩ ʋ nɩɩ ba kala sɩma nɛ. Ama ʋ maga dɩ ʋ liise yi ʋ sʋʋŋ tapʋlaa lɛ nɛ, ba nɛ jaŋ dieni a kɩɩ ʋ sɩ weye. Wɩɩkala bɩ bʋbʋɔ kɛnɛ. 9 Bapʋɔsɛ bie, leŋ dɩ ŋ tʋɔŋ tɔrɛ ŋ bapʋɔsʋŋ lɛ, nɩɩ sɩma ŋ hambiriŋ lɛ. Ŋaa wɩalɩŋ kala ŋ sɩɩ chɛ arɩ wɩɩ na-kala ŋ sɩ na, ama jɩŋ dɩ wɩaa deemba kala ŋ sɩɩ ŋaa lɛ Wɩa jaŋ diiŋ sarɩya. 10 Sɩ́ leŋe dɩ wɩɩkala walɩmɩŋ, wɩɩ-la kala sɩɩ wɩɩŋ, joŋo ta, bɛɛ wɩaa hambiriŋ arɩ bapʋɔsɛ doluŋ bɩ dieni. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.